Estere
4 Tangua Mordekayi wavuile ndaga jiagasue jiakalegewe, watawudile milele yenji, wasudigile ngombo* nu wadimbile fuphi mu muila. Gungima wayile hakatshi na katshi dia dimbo, wasendesele gukaluguga mangololo nu gikenene giagasue. 2 Wayile uu nu ha mufulo wa inzo ya fumu. Ganginyilego mu luphango handaga nga muthu mumoshi gakhalelego mungina muene nu ngombo gu muila. 3 Tangua enya Yuda a mu provense jiagasue avuile mbimbi nu mukhuala wambile fumu, ahagele masaga akola, atunyile gudia ha gukombelela, adidile nu akhalele mukaluluga nu gikenene giakola. Athu avula mukatshi diawo abandele holu dia ngombo nu holu dia fuphi. 4 Tangua enya mudimo a Estere a mala anyi akhalele agutungula* nu enya mudimo enji a akhetu ajile gumuwambela ndaga yene, wadisagesele muavula. Gungima watumidile Mordekayi milele asudige hafundo dia gukhala nu ngombo yenji gumuila, uvi Mordekayi watunyile. 5 Gungima Estere watamegele Hataka muenya mudimo wa fumu watungudiwe, munu watombewe gudi fumu ha gukalegela Estere mudimo. Estere wamutumile ha guya muhula Mordekayi gula mukunda natshi gakhalele ngenyi nu ndaga itshi yakhalele mubalega.
6 Hene Hataka wayile gudi Mordekayi ha fundo dia athu avula dia dimbo, fundo diene diakhalele gutuama dia mufulo wa inzo ya fumu. 7 Mordekayi wamuwambelele ndaga jiagasue jiamubuidile, nu mutango wa mbongo unu Amane walayele ha gumba ha fundo akhalele mubamba umonyi wa fumu hagula enya Yuda ashiyiwe. 8 Mordekayi wamuhanele nji mukanda wakhalele nu mukhuala wambile fumu gu Suse hagula enya Yuda ashiyiwe. Hataka wakhalele naye gudijiga Estere mukanda wene nu gumukotelesela ndaga jiakhalele mukatshi nu gumuwambela nji ha guya gudi fumu ha gumububila hagula fumu amuvuile khenda nu akuaku’enji.
9 Hataka wawambelele Estere ndaga jiazuelele Mordekayi. 10 Gungima Estere watumile Hataka ha guya muwambela Mordekayi egi: 11 “Enya mudimo agasue a fumu nu athu a mu provense jia fumu ana jiya muabonga egi, gula yala nga mukhetu mumoshi waya mu gibanzala gia mukatshi dia inzo ya fumu, uvi muene nu gutamegewa ndo, mukhuala wana zuela egi: Udi naye gushiyiwa. Muthu muene wajiya gusala nu monyo phamba gula fumu wamusunuina muhango wenji wa wolo. Uvi masugu 30 abalega gale fumu khenji gangutamega ndo ha guya gumbo dienji.”
12 Tangua awambelele Mordekayi ndaga jiazuelele Estere, 13 Mordekayi wamuvutudile egi: “Udi mutangiza egi tangua enya Yuda agasue mbaashiyiwa, aye mbawubembewa gaye handaga udi mu inzo ya fumu ba? 14 Mu tangua edi gula wahena tedie, muthu muko mbawukuatesa enya Yuda nu mbawaahuluisa, uvi aye nu enya mu inzo ya sh’aye mbamushiyiwa. Nanyi udi mujiya gula wabuile mukaji’a fumu mukunda nu ndaga ya luholo elu?”
15 Gungima Estere wawambelele Mordekayi egi: 16 “Nda, bungisa enya Yuda agasue adi gu Suse, tunenu nji gudia hagula mukombelele mukunda nu ame. Mudigo, munuigo nji matombe masugu thathu phipha nu muanya. Ame nu enya mudimo ami a akhetu nji mbatutuna gudia ha gukombelela. Gungima mbanguya gumbodi’a fumu ikhale mukhuala udi mutunyisa gutshita ngenyi, gula idi mutoga egi ngufue, mbangumufua gami. 17 Hene Mordekayi wayile, watshitshile ndaga jiagasue jiamuwambelele Estere.