Mulongeshi
3 Ima yagasue yana khala nu tangua dienji diatombewe,
Ndaga jiagasue jia ha mavu jiana khala nu tangua dienji:
2 Tangua dia guvualewa nu tangua dia gufua;
Tangua dia gukuna nu tangua dia guvuza ima yakunyiwe.
3 Tangua dia gushiya nu tangua dia gusaga;
Tangua dia gumuanga nu tangua dia gutunga;
4 Tangua dia gudila nu tangua dia gulela;
5 Tangua dia gusonona maseso nu tangua dia gubungisa maseso;
Tangua dia guyamba nu tangua dia gutuna guyamba.
6 Tangua dia gukamba nu tangua dia gubemba gukamba gima giatotshi;
Tangua dia gubamba nu tangua dia gubishila;
7 Tangua dia guphasula mulele nu tangua dia guwunyiga;
Tangua dia guhena tedie nu tangua dia guzuela;
8 Tangua dia guzumba nu tangua dia umbalagaji;
Tangua dia ita nu tangua dia guhuima.
9 Gubonga gutshi mutshitshi wa mudimo wana heta gu mudimo wenji wakola? 10 Ngamonele mudimo wahanele Nzambi gudi ana a athu ha gutshita. 11 Walondele ima yagasue yabonga* mu tangua diayo. Wambile nji matangi a gujinga mayilago mu mitshima ya athu. Uvi ene mbaashigo mukotelesa nga hazonda midimo ya Nzambi wa giamatshidia sendese gu gisendeselo uu nu gu gisugishilo.
12 Ngakotelesele egi gushigo nu ndaga yabonga mukunda nu athu gubalega gusuanguluga nu gukalagala ndaga jiabonga mu monyo wawo. 13 Ngakotelesele nji egi muthu wagasue udi naye gudia, gunua nu gusuanguluga mukunda nu mudimo wenji wagasue wakola. Idi khapho dia Nzambi.
14 Ngakotelesele nji egi Nzambi wa giamatshidia wafugile ima yagasue hagula ikhale mayilago. Gushigo nu gima tuajiya gulunda nga gukatula gu ima yene. Nzambi wa giamatshidia wayilondele ngenyi, hagula athu amuvile woma.
15 Ndaga jiagasue jidi mubua mangino jiabuile gale, ndaga mbajikalegewa mu masugu adi muza jiakalegewe gale nji; uvi Nzambi wa giamatshidia wana kamba ndaga jinyi athu akhalele mulandula.*
16 Ndaga iko ngana mona ha mavu yene eyi: Ndaga jiabola jidi mukalegewa ha fundo didi naye gubatudiwa milonga mu luholo luabonga nu luatagana. 17 Ngazuelele mu mutshima wami egi: “Nzambi wa giamatshidia mbawusophesa athu abonga nu abola, handaga ndaga jiagasue nu midimo yagasue yana khala nu tangua diayo.”
18 Ngazuelele nji mu mutshima wami mukunda nu ana a athu egi, Nzambi wa giamatshidia mbawaalola nu mbawaamonesa egi adi luholo lumoshi nu shitu, 19 handaga athu ana khala nu gisugishilo, shitu nji jiana khala nu gisugishilo; mukut’awo agasue ana khala nu gisugishilo gia luholo lumoshi. Athu ana fua, shitu nji jiana fua. Mukut’awo agasue adi nu nyuma ya luholo lumoshi. Hene, muthu gashigo ya gubalega shitu, handaga ima yagasue idi ima ya githuhu. 20 Mukut’awo agasue anaya fundo dimoshi. Mukut’awo agasue akatugile mu fuluguta dia mavu, ana vutuga nji mu mavu. 21 Nanyi udi diago mujiya gula nyuma ya athu yana kanduga gosa, nu gula nyuma ya shitu yana bulumuga mu mavu? 22 Ngakotelesele egi gushigo nu gima giabonga mukunda nu muthu gubalega gusuanguluga guajiya guheta muene mukunda nu mudimo wenji, handaga luene lufuto luenji;* nanyi wajiya gumukuatesa ha gumona ndaga mbajibua gungima dia gufua guenji?