Mukanda wa Mbadi wa Mafumu
6 Ana a baprofete awambelele Elisha egi: “Tala! Fundo tudi mujinga nu aye didi diago diazonda. 2 Tuabuba, tuhane njila tuye gu Yordane. Muthu nu muthu abatule lushimi lumoshi, hagula tulonde fundo dia gukhala.” Muene waawambelele egi: “Ndenu.” 3 Muthu mumoshi mukatshi diawo wamuhudile egi: “Gula watshigina, wajiya guya nu esue enya mudimo aye ba?” Elisha wamuvutudile egi: “Gima ndo, tudi muya.” 4 Hene Elisha wayile nawo. Ahetele gu Yordane, asendesele gukoka mitshi. 5 Tangua muthu mumoshi wakhalele mukoka mutshi, giphangu giasowogele, giabuile mu muta. Wakalugile egi: “Fumu henyaha ngutshita gikuatshi! Giphangu giagusomba ngasombi!” 6 Muthu wa Nzambi wa giamatshidia wazuelele egi: “Giphangu giene giabuila gui?” Muthu muene wamudijigile fundo giabuile. Gungima Elisha wakokele gitshinyi gia mutshi, wagimbile ha fundo diene, giphangu giazalugile. 7 Wamuwambelele egi: “Gizule.” Muthu muene wasunuine koko guenji, wazudile giphangu giene.
8 Lusugu lumoshi, fumu wa gu Siliya wayile muluisa enya Isalele. Watele maga nu enya mudimo enji, waawambelele mafundo akhalele naye guhaga phundo. 9 Gungima muthu wa Nzambi wa giamatshidia watumidile fumu wa gu Isalele mbimbi egi: “Utema gaye. Ubalegelago ha fundo dinyi handaga enya Siliya adi muya guene.” 10 Fumu wa gu Isalele watumile mbimbi gudi athu enji akhalele mu mafundo anyi muthu wa Nzambi wa giamatshidia wamutemesele egi gayigo. Walanduile gumutemesa, hene mbala jiavula fumu wa gu Isalele gakhalelego muya mu mafundo ene.
11 Ndaga yene yahanele fumu wa gu Siliya khabu jiakola. Watamegele enya mudimo enji, waawambelele egi: “Nguwambelenu! Nanyi mukatshi dietu udi gu khanda ya fumu wa gu Isalele?” 12 Muenya mudimo wenji mumoshi wazuelele egi: “Fumu, gushigo nga nu muthu mukatshi dietu udi gu khanda ya fumu wa gu Isalele! Muthu wana gumuwambela ndaga wana zuela gu sugu yaye, idi Elisha profete wa gu Isalele.” 13 Fumu wa gu Siliya wazuelele egi: “Ndenu mukambe fundo didi muene hagula ngajiya gutuma athu ha guya gumukuata.” Gungima ajile muwambela fumu egi: “Elisha udi gu Dotane.” 14 Watumile mbala imoshi tubalu nu phusu-phusu jia ita guene nu masuta avula. Ahetele guene mu phipha, ajietele dimbo.
15 Muenya mudimo wa muthu wa Nzambi wa giamatshidia wazugile nu gimenegena gia mutshiatshia, wazogele hanze. Wamonele masuta nu tubalu nu phusu-phusu jia ita jia gujieta dimbo. Wawambelele Elisha mbala imoshi egi: “Mamaa, fumu tuafua getu! Tutshita gikuatshi?” 16 Uvi Elisha wamuwambelele egi: “Uvuigo woma! Handaga athu adi gu khanda yetu adi avula gubalega athu adi gu khanda yawo.” 17 Gungima Elisha watshitshile gisambu, wazuelele egi: “Oo Yehowa, ngabuba, kangula meso enji hagula amone.” Yehowa wakangudile mbala imoshi meso a muenya mudimo wa Elisha, wamonele tubalu nu phusu-phusu jia ita jia tshuya jia guzala gu khanda ya milundu; jiakhalele jia gujieta Elisha.
18 Tangua enya Siliya ajile gudi Elisha, watshitshile gisambu gudi Yehowa egi: “Ngabuba, buisa athu awa ifofo.” Hene, waabuishile ifofo* gifua luholo Elisha wamutogele. 19 Elisha waawambelele egi: “Muajimbila njila. Dimbo mudi mukamba dishigo didi ndo. Ngulandulenu ngumibate gudi muthu mudi mukamba.” Uvi waabatele gu Samaliya.
20 Tangua ahetele gu Samaliya, Elisha wazuelele egi: “Oo Yehowa, kangula meso awo hagula amone.” Yehowa wakangudile meso awo, amonele egi akhalele hakatshi na katshi dia Samaliya. 21 Tangua fumu wa gu Isalele waamonele, wawambelele Elisha egi: “Nguashiya ba? Tata ngudi naye guashiya?” 22 Uvi Elisha wazuelele egi: “Ushigo naye guashiya. Wana shiya athu wana kuata gu ita nu phogo yaye ya khusa nu uta waye wa manana ba? Ahane mapha adie nu meya anue; gungima avutuge gudi fumi’awo.” 23 Fumu watshitshile wano wakoma mukunda nu ene. Adile, anuile, gungima waabembele ha guvutuga gudi fumi’awo. Gishina giene, mahunji a nzangi a enya Siliya akhalelego muza luko nga hazonda mu gifutshi gia Isalele.
24 Gungima Bene-Hadada, fumu wa gu Siliya, wabungishile masuta* enji agasue, ayile mujieta dimbo dia Samaliya. 25 Nzala yakola yanginyile gu Samaliya. Enya Siliya ajietele dimbo uu nu tangua muto wa phunda wasendesele gudigiwa mu bashekele* 80 a utadi wa siliva, mago mbadi a guzala nu tuji tua yembe* akhalele mudigiwa mu bashekele 5 a utadi wa siliva. 26 Tangua fumu wa gu Isalele wakhalele mubalega holu dia gibayi, mukhetu mumoshi wazuelele mu dijui diakola egi: “Oo fumu tukuatese!” 27 Fumu wamuvutuile egi: “Gula Yehowa gagukuateselego, gui ngajiya guheta ima ha gugukuatesa? Ha fundo dia gusuwila mbuto? Ha fundo dia gukamela vinyo nga maji ba?” 28 Fumu wamuhudile egi: “Itshi idi gugusagesa?” Muene wamuvutudile egi: “Mukhetu yowu wanguwambela egi: ‘Za nu mun’aye wa yala tumudie mangino, hamene mbatudie mun’ami.’ 29 Hene tuatelega mun’ami, tuamudia. Lusugu lualandula ngamuwambela egi: ‘Za nu mun’aye hagula tumudie.’ Uvi muene wasuegi mun’enji.”
30 Tangua fumu wavuile mbimbi jia mukhetu muene, watawile milele yenji. Hakhalele muene mubalega holu dia gibayi, athu amumonele yagusudiga sagi moshi’a milele yenji. 31 Gungima fumu wazuelele egi: “Nzambi anguhane ndola yakola gula mangino ngakokelego muto wa Elisha mun’a Shafata!”
32 Elisha wakhalele hashi mu inzo yenji nu akulu. Fumu watumine muthu mumoshi ha gudiangela gutuama dienji. Uvi gutuama egi muthu muene ahete, Elisha wawambelele akulu egi: “Mudi mumona luholo mun’a muthu yowu wana shiya athu watuma muthu ha gungubatula muto? Tegelelenu, gula muthu muene waheta, kangenu mufulo, ukuatenu mangololo hagula ganginyigo. Fumi’enji yowu mulandula* gungima dienji!” 33 Hakhalele muene muzuela nawo, yala muene wajile. Gungima fumu wazuelele egi: “Malamba awa akatuga gudi Yehowa. Mukunda natshi ngudi naye gunengena egi Yehowa atukuatese?”