Mukanda wa Thomo Gudi Enya gu Kolinto
13 Gula ngazuela mu mazuelelo a athu nu a anjelo, uvi ngushigo nu guzumba, ngudi gami gifua ngunga* idi mushigiwa nga gifua gizanza gidi musha matululu. 2 Gula ngudi nu luendu lua gulongesa mbimbi ya Nzambi, gula ngudi mukotelesa ndaga jiagasue jia isuegi ya gijila, gula ngudi nu ujiyi wa maluholo agasue, gula ngudi nu gutshigina guagasue gua guwambela milundu ha gukatuga nu ha guya fundo diko, uvi gula ngushigo nu guzumba, ngudi gima gia phamba. 3 Gula ngahana ima yami yagasue ha gukuatesa* athu ako, gula nji ngahana muila wami ha gudisunzula, uvi gula ngushigo nu guzumba, ima eyi yagasue ishigo gungukuatesa nga hazonda.
4 Guzumba guakhala nu guhuiminyina nu mutshima wabonga. Guzumba guakhalago nu ginjiongo, guanago gudihala, guakhalago guazala pha nu lulendo. 5 Guzumba guanago gutshita ndaga jia musonyi,* guanago gukamba phamba gubonga guenji, guanago gulaba guvua khabu, guanago gubambela athu ako umbalagaji mu mutshima.* 6 Guzumba guanago gusuanguluga nu ndaga jiabola; uvi guana suanguluga nu giamatshidia. 7 Guzumba guana tshuiga ndaga jiagasue, guana tshigina ndaga jiagasue, guana gudifelela mu ndaga jiagasue, nu guana kolesela mu ndaga jiagasue.
8 Guzumba guanago guhua. Uvi guzuela profesi mbagusuga. Guzuela mu mazuelelo a gudisha* mbaguhua; ujiyi mbawuhua nji. 9 Handaga ndaga tudi mujiya jidi phamba gitshinyi. Ndaga tudi mulongesa nji jidi phamba gitshinyi. 10 Uvi tangua ndaga jiatagana mbajiza, ndaga jia gitshinyi mbajihua. 11 Tangua ngakhalele mona wazonda, ngakhalele muzuela gifua mona wazonda, ngakhalele mutangiza nji gifua mona wazonda. Uvi henyaha ngabua muthu wa gukula, ngabemba makalegelo a ana azonda. 12 Henyaha tushigo mumona muabonga handaga idi gifua tudi mutala gu nganza* yalondewe nu utadi. Uvi mu tangua dinyi mbatumona ima yagasue muabonga, handaga mbayikhala gifua tudi mumona muthu phala nu phala. Henyaha ngudi mujiya phamba ndaga jiazonda. Uvi mu tangua dinyi mbangujiya ndaga jiagasue gifua luholo athu angujiya muabonga. 13 Henyaha ima eyi thathu yene yasala: gutshigina, felela nu guzumba. Uvi gima giabalega gukoma mukatshi dia ima eyi yagasue gidi guzumba.