Yoshua
8 Gungima Yehowa wawambelele Yoshua egi: “Uvuigo woma, ubuigo tunga-tunga. Zula masuta agasue, ndenu muluise dimbo dia Ayi. Tala, ngahana fumu wa gu Ayi ha mago aye nu athu enji nu dimbo dienji nu mavu enji. 2 Udi naye gukalegela dimbo dia Ayi nu fumu wenji ndaga gifua luholo wakalegele dimbo dia Yeliko nu fumu wenji. Uvi mu dimbo dia Ayi muajiya guzula ima yawo nu shitu. Tuma athu aye abandemene gungima dia dimbo.”
3 Hene Yoshua nu masuta agasue ayile muluisa dimbo dia Ayi. Yoshua watombele masuta 30 000 a ngolo, waatumile mu phipha. 4 Waawambelele egi: “Tegelelenu, mudi naye gubandemena gungima dia dimbo. Mushigo naye guya gualeha diago nu dimbo, mukut’enu agasue mudi naye gukhala ya gudilonda. 5 Ame nu athu agasue ngudi nawo mbatusuena hehi nu dimbo, gula aza ha gutuluisa gifua atshitshile thomo, mbatualenga. 6 Tangua mbaazoga ha gutuhata, mbatuabata gualeha nu dimbo handaga mbaazuela egi: ‘Adi mulenga gifua luholo alengele thomo.’ Esue nji mbatulandula gualenga. 7 Enue mbamuzoga ha fundo muadisuegi, muyi mutambula dimbo. Yehowa Nzambi wenu mbawumihana dimbo diene. 8 Tangua mbamutambula dimbo, mudi naye gudikonda tshuya. Mudi naye gukalagala ndaga gifua muazuelele Yehowa. Jiene ndaga ngamiwambela ha gukalagala.”
9 Yoshua waatumile, ayile ha fundo akhalele naye gubandemena; adisuegele hakatshi na katshi dia Betele nu Ayi gu khanda ya mayilo a kumbi a dimbo dia Ayi, uvi Yoshua wasalele mubanda nu athu ako.
10 Gungima Yoshua wazugile nu gimenegena giagasue, wabungishile masuta. Muene nu akulu a gu Isalele ayile nawo gu Ayi. 11 Masuta agasue akhalele n’enji akandugile, ayile uu nu gutuama dia dimbo. Ahagele phundo yawo gu khanda ya nord ya dimbo diene, baba diakhalele hakatshi diawo nu Ayi. 12 Mu tangua diene wakhalele watumi gale masuta ha mutango wa 5 000 ha guya mubandemena hakatshi na katshi dia Betele nu Ayi, gu khanda ya mayilo a kumbi a dimbo. 13 Masuta ahagele phundo gu khanda ya nord ya dimbo diene, uvi masuta ako ayile mubandemena gu khanda ya mayilo a kumbi a dimbo. Mu phipha yene, Yoshua wayile hakatshi na katshi dia baba.
14 Tangua fumu wa gu Ayi waamonele, muene nu enya mu dimbo dienji azogele muphushi nu gimenegena giagasue ha guya muluisa enya Isalele ha fundo dimoshi diakhalele mumonega muabonga mu baba. Uvi gakhalelego mujiya egi masuta akhalele a gubandemena gungima dia dimbo. 15 Tangua mala a gu Ayi ajile ha gualuisa, Yoshua nu enya Isalele agasue akhalele n’enji alengele mu njila yakhalele muya gu khanda ya mavu a luselenga. 16 Atamegele athu agasue akhalele mu dimbo ha gualandula. Hakhalele ene mulandula Yoshua, ayile gualeha nu dimbo. 17 Guakhalelego nga nu yala wasalele gu Ayi nu gu Betele. Mukut’awo agasue ayile mulandula enya Isalele. Abembele dimbo dia uhululu, alanduile enya Isalele.
18 Yehowa wawambelele Yoshua egi: “Sununa mulumbu udi ha koko diaye gu khanda ya Ayi, handaga ngudi muhana dimbo diene ha mago aye.” Hene Yoshua wasunuine mulumbu wakhalele ha koko dienji gu khanda ya dimbo diene. 19 Tangua diasunuine muene koko guenji, masuta akhalele mubandemena akatugile mbala imoshi fundo akhalele, anginyile muphushi mu dimbo, aditambudile. Adikondele tshuya mbala imoshi.
20 Tangua enya gu Ayi abalumugile, amonele mishi muzoga mu dimbo mukanduga gosa; mila yaalebele, akhalelego luko nu luholo lua gulenga nga fundo dimoshi. Gungima enya Isalele akhalele mulenga gu khanda ya mavu a luselenga abalumugile, asendesele guahata. 21 Tangua Yoshua nu masuta agasue a gu Isalele amonele egi athu akhalele mubandemena dimbo aditambula, nu hamonele ene mishi mukatuga mu dimbo mukanduga gosa, abalumugile, asendesele guluisa enya gu Ayi. 22 Masuta ako a Isalele azogele mu dimbo ha guya guatagana. Ngenyi enya gu Ayi akuategenele hakatshi na katshi, masuta a Isalele akhalele khanda nu khanda. A ashiyile mukut’awo agasue, nga muthu gasalelego nu monyo. 23 Uvi akuatele fumu wa gu Ayi, ayile n’enji nu monyo gudi Yoshua.
24 Tangua enya Isalele amanesele gushiya athu agasue a gu Ayi mu temu, mu mavu a luselenga fundo akhalele gualandula, masuta agasue a gu Isalele avutugile gu dimbo dia Ayi, ashiyile athu agasue asalele mu dimbo diene nu phogo ya khusa. 25 Mala nu akhetu agasue ashiyiwe mu lusugu luene akhalele 12 000, mukut’awo agasue akhalele enya gu Ayi. 26 Yoshua gatuluilego koko guasunuine muene mulumbu, uu nu tangua ashiyile athu agasue a gu Ayi. 27 Uvi enya Isalele azudile shitu nu ima atambudile mu dimbo diene, gifua luholo Yehowa wawambelele Yoshua.
28 Gungima Yoshua wakondele dimbo dia Ayi tshuya, wadibuishile nji makhulu. Diana khala ngenyi uu nu mangino. 29 Washiyile fumu wa gu Ayi, wamujitshigile gu mutshi,* wamubembele guene uu nu mu ngueze. Hakhalele mutshigina gushiwuga tangua, Yoshua wawambelele athu ha gukatula kimbi gia fumu muene gu mutshi. Gungima abishidile kimbi giene ha mufulo wa dimbo, ahagele musonga wakoma wa maseso holu dia kimbi giene, wuwu guene uu nu mangino.
30 Gungima Yoshua watungile giwotshielo mukunda nu Yehowa Nzambi wa Isalele gu Mulundu wa Ebale, 31 gifua luholo Moize muenya mudimo wa Yehowa wawambelele enya Isalele nu gifua luholo idi ya gusonega mu mukanda wa Mikhuala wa Moize egi: “Londenu giwotshielo gia maseso anyi ashigo a gusonga nu ikadigilo ya utadi.” Ahanele Yehowa milambu ya guwotshia nu milambu ya guhuima ha giwotshielo giene.
32 Gungima Yoshua wasonegele Mukhuala holu dia maseso guene, Mukhuala unu Moize wasonegele gutuama dia enya Isalele. 33 Enya Isalele agasue nu akulu awo nu atuameji nu manzuji awo, akhalele ya gumagana sambua nu sambua dia giwotshielo gutuama dia nganga-nzambi, enya Levi anyi akhalele mubata Mushete wa Gikotelo wa Yehowa. Ngenji jiakhalele mukatshi diawo nu enya Isalele akhalele hene. Athu akhalele a gumagana ndambo gutuama dia Mulundu wa Gelizima, ndambo iko gutuama dia Mulundu wa Ebale (gifua luholo Moize muenya mudimo wa Yehowa wazuelele), ha gushimbiga enya Isalele. 34 Gungima dia ndaga eyi, watangele mbimbi jiagasue jia Mukhuala mu dijui diakola, ishimbigo nu mikumbu, gifua luholo idi ya gusonega mu mukanda wa Mikhuala. 35 Mikhuala yagasue yahanele Moize, Yoshua wayitangele mu dijui diakola gutuama dia enya Isalele agasue; nu ngenji jiakhalele* mukatshi diawo, nu akhetu nu ana akhalele nji hene.