Mulongeshi
1 Mbimbi jia mulongeshi,* mun’a Davidi, fumu wa gu Yelusalema.
2 Mulongeshi udi muzuela egi: “Ima yagasue idi ya githuhu!
Ya githuhu diago! Ya githuhu sha!”
3 Gubonga gutshi muthu wana heta gu mudimo wenji wakola
unu wana tshita muene ha mavu?
4 Gindongo gimoshi giana balega, gindongo giko giana guza,
Uvi mavu adi musala mayilago.
5 Kumbi diana zoga, gungima diana shiwuga;
Diana vutuga luko mu phushi ha fundo diana zogela.
6 Muhehe wanaya gu sud, ukondomoga uu nu gu nord;
Wana landula gujieta khanda jiagasue; gungima wana vutugila luko gujieta.
7 Meya a mita* yagasue ana bulumuga mu kianga, uvi kianga giana zala ndo.
Ana vutuga luko ha fundo akatuga, ha gubulumuga luko.
8 Ima yagasue yana segela;
gushigo nga nu muthu wajiya guyizuelela;
meso ana huila ndo gumona;
matshui nji ana huila ndo guvua.
9 Ima yakhalele gale guene, mbayikhala luko,
ndaga jiakalegewe gale, mbajikalegewa luko;
gushigo nu gima gihe-gihe ha mavu.
10 Gudi nu gima ginyi muthu wajiya guzuela egi, “tala gima egi, gidi gihe-gihe”?
Ndo, giana khala gale guene sendese mualeha;
giakhalele genji guene gutuama egi tuvualewe.
11 Gushigo nga nu muthu udi muwunguluga athu a mu tangua dikulu;
gushigo nji nga nu muthu mbawuwunguluga athu mbaaza gungima;
nu ene nji, athu mbaaza gungima diawo mbaashigo guawunguluga.
12 Ame mulongeshi, ngakhalele fumu wa Isalele gu Yelusalema. 13 Ngazudile desizio dia gulonguga nu gutema guagasue ndaga jiagasue jiakalegewe gale ha mavu. Ngakambele gukotelesa midimo yagasue yakola inyi Nzambi wahanele ana a athu ha gutshita.
14 Ngamonele midimo yagasue yakhalele mukalegewa ha mavu,
tala! Ima yagasue idi ima ya githuhu, idi gifua gukaya funji.
15 Gima gidi gia guhengelela giajiyilego gumagenesewa,
Gima ginyi gishigo guene giajiyilego gutangewa.
16 Ngazuelele mu mutshima wami egi: “Ngaheta diago ndunge jiavula gubalega athu agasue akhalele gutuama diami gu Yelusalema, mutshima wami waheta diago ndunge jiavula nu ujiyi.” 17 Ngadihanele nu mutshima wagasue ha gujiya ndunge, nu malui,* nu ha gujiya guheya. Ngakotelesele egi yakhalele nji gifua gukaya funji.
18 Handaga ndunge jiavula jiana bata malamba avula,
hene, muthu udi muvudisa ndunge jienji udi muvudisa malamba.