Mukanda wa Mbadi wa Gudilanduluila
32 Gungima dia ndaga eji nu ndaga jiatshitshile Ezekiase ha gumonesa egi udi ya gujinginyina gudi Nzambi, Fumu Senakeribe wa gu Asiliya wajile, wanginyile mu mavu a Yuda gu ngolo. Wajietele membo akhalele nu ibayi yakola, wakhalele mutshigina gubula ibayi ha gutambula membo ene.
2 Hajiyile Ezekiase egi Senakeribe waji, udi nji mutshigina guluisa Yelusalema, 3 watele maga nu manene enji, nu masuta enji a ngolo. Gungima wazudile desizio dia gukanga ito ya meya yakhalele gonze ya dimbo, atshiginyile ha gumukuatesa. 4 Athu avula adibungishile, akangele ito yagasue ya meya mu gifutshi, azuelele egi: “Tuajiyilego gubemba egi mafumu a gu Asiliya aze asange meya avula.”
5 Watshitshile yagasue ha gulonda luko gibayi giakhalele gia gubuzumuga, watungile jinzo jialeha gu gibayi giene. Watungile nji gibayi giko hanze, walondele luko Gamulundu* ga mu Dimbo dia Davidi, walondele nji iluilo* yavula nu tshibu. 6 Gungima, watombele mafumu a masuta ha gutuameza athu, waabungishile ha fundo diakhalele gudibungisa athu agasue gu mufulo wa dimbo. Waahanele gikhesa, waawambelele egi: 7 “Khalenu nu gikhesa nu ngolo. Muvuigo woma, mubuigo tunga-tunga mukunda nu fumu ya gu Asiliya nu athu avula adi n’enji, handaga athu adi gu khanda yetu adi avula gubalega athu adi gu khanda yenji. 8 Muene udi nu ngolo jia athu, uvi esue tudi nu Yehowa Nzambi wetu ha gutukuatesa nu ha gutuluila.” Mbimbi jiazuelele Fumu Ezekiase wa gu Yuda jiahanele athu gikhesa.
9 Gungima, tangua Fumu Senakeribe wa gu Asiliya wakhalele gu Lakishe nu masuta enji agasue a ngolo,* watumile enya mudimo enji gu Yelusalema gudi Fumu Ezekiase wa gu Yuda, nu gudi enya Yuda agasue akhalele gu Yelusalema ha guawambela egi:
10 “Fumu Senakeribe wa gu Asiliya wazuela egi: ‘Dimbo dia Yelusalema diajietewa gale, nanyi mudi mushila mutshima hene muasala mu dimbo diene? 11 Ezekiase udi gumiwambela egi: “Yehowa Nzambi wetu mbawutuhuluisa ha mago a fumu wa gu Asiliya.” Uvi udi gumihuiga hagula mufue gu nzala nu luhungu. 12 Ezekiase yowu, ishigo muene wakatudile mafundo a gukombelela a Nzambi wenu nu iwotshielo yenji, gungima wawambelele enya Yuda nu enya gu Yelusalema egi: “Mudi naye gufugama phamba gutuama dia giwotshielo gimoshi, mudi naye nji guhana milambu idi mukanduisa mishi ha giwotshielo giene”? 13 Mushigo mujiya ndaga ame nu akhakh’ami tuakalegele athu agasue a mu ifutshi iko? Nzambi jia mu ifutshi yene jiakhalele nu ngolo jia guhuluisa ifutshi yene ha mago ami ba? 14 Mukatshi dia nzambi jia mu ifutshi inyi akhakh’ami ashiyile, nzambi mutshi wakhalele nu ngolo jia guhuluisa athu enji ha mago ami, hagula enue mutangize egi Nzambi wenu udi nu ngolo jia gumihuluisa ha mago ami? 15 Mubembigo egi Ezekiase amihuige, mumushilago mutshima. Gushigo nga nu nzambi ya mu gifutshi gimoshi nga ya ufumu umoshi munu wakhalele nu ngolo jia guhuluisa athu enji ha mago ami nu ha mago a akhakh’ami. Na luholo lutshi giwa Nzambi wenu wajiya gumihuluisa ha mago ami?’”
16 Enya mudimo wa Senakeribe azuelele ndaga jiko jiavula jiabola mukunda nu Yehowa Nzambi wa giamatshidia, nu mukunda nu Ezekiase muenya mudimo wenji. 17 Senakeribe wasonegele nji mikanda ha gushinga Yehowa Nzambi wa Isalele nu ha guzuela ndaga jiabola mukunda nu muene, wazuelele egi: “Nzambi jia ifutshi iko jiahuluishilego athu awo ha mago ami, Nzambi wa Ezekiase nji mbagashigo muhuluisa athu enji ha mago ami.” 18 Enya mudimo a Senakeribe alanduile guzuela mu dijui diakola mu zuelelo dia enya Yuda gudi athu a gu Yelusalema anyi akhalele holu dia gibayi ha guahana woma nu guabuisa tunga-tunga, hagula atambule dimbo. 19 Akhalele muzuela ndaga jiabola mukunda nu Nzambi wa gu Yelusalema, gifua luholo akhalele muzuela ndaga jiabola mukunda nu nzambi jia ifutshi iko, nzambi jinyi athu alondele nu mago. 20 Uvi Fumu Ezekiase nu profete Yeshaya muna Amoza, akhalele mukombelela mukunda nu ndaga yene. Atamegele Nzambi mu dilu ha guakuatesa.
21 Gungima, Yehowa watumile muanjelo, washiyile masuta agasue a ngolo, nu atuameji, nu bakomanda mu phundo ya fumu wa gu Asiliya. Hene, fumu wa gu Asiliya wavutugile mu gifutshi gienji nu musonyi. Gungima, wanginyile mu inzo* ya nzambi wenji, an’enji ako a mala amushiyile guene nu phogo ya khusa. 22 Luene luholo Yehowa wahuluishile Ezekiase nu enya gu Yelusalema ha mago a Fumu Senakeribe wa gu Asiliya, nu ha mago a mbalagaji jiko jiagasue; waahanele guhuima gu khanda jiagasue. 23 Athu avula abatele bakado gu Yelusalema mukunda nu Yehowa, nu ima ya ndando mukunda nu Fumu Ezekiase wa gu Yuda. Gungima dia ndaga yene, ifutshi yagasue yasendesele gunemesa Ezekiase muavula.
24 Mu masugu ene, Ezekiase wasendesele gukata, wakhalele mutshigina gufua. Hene wakombelele Yehowa, muene wamuhanele mvutu, wamuhanele nji gijiyishilo.* 25 Uvi Ezekiase gahanelego Nzambi mersi mukunda nu ndaga yabonga yamukalegele muene, handaga wabuile nu lulendo mu mutshima wenji. Hene Nzambi wamuvuidile khabu, wavuidile nji enya Yuda nu enya gu Yelusalema khabu. 26 Uvi Ezekiase wadibulumuishile, wabembele lulendo luenji. Enya gu Yelusalema nji adibulumuishile, hene Yehowa gaahanelego ndola hakhalele Ezekiase muhinyina.
27 Ezekiase wabuile nu umonyi wavula nu lutumbu luavula; watungile jinzo jia gubambela utadi wenji wa siliva, nu wolo nu maseso a ndando nu maji a balesame nu milumbu, nu mukunda nu ima yagasue ya ndando. 28 Watungile nji mafundo a gubambela mbuto, nu matombe ahe-ahe, nu maji nu madinda mukunda nu shitu jia maluholo agasue, nu madinda mukunda nu imeme nu khombo. 29 Watungile nji membo avula, wakhalele nu ngombe jiavula nu imeme nu khombo, handaga Nzambi wamuhanele ima yavula diago. 30 Ezekiase yowu muene washitshile gito gia meya giakhalele gu thunda ya Gihona, gungima wakondomuene meya ha guabulumuna gu khanda ya mayilo a kumbi ya Dimbo dia Davidi. Ezekiase wakhalele mubinga mu ndaga jiagasue jiakhalele mukalagala muene. 31 Uvi tangua mafumu a gu Babilona atumile enya mudimo awo ha guya gumuhula mukunda nu ndaga ya gushimana* yakalegewe mu gifutshi, Nzambi wa giamatshidia wabembele egi Ezekiase hakhenji azule desizio dia ndaga jidi naye gutshita muene, handaga wakhalele mutshigina gumulola ha gujiya ndaga jiagasue jiakhalele mu mutshima wenji.
32 Ndaga jiko jiakalegele Ezekiase, nu luholo luamonesele muene guzumba gua giamatshidia, jidi jia gusonega mu vizio ya profete Yeshaya muna Amoza mu Mukanda wa Mafumu a gu Yuda nu a gu Isalele. 33 Gungima Ezekiase wafuile gifua muafile akhakh’enji, amufundjile gu gamulundu mu malumba a ana a Davidi. Hafuile muene, enya Yuda agasue nu enya gu Yelusalema amutumbuishile. Mun’enji Manase wabuile fumu ha fundo dienji.