Yoshua
17 Gungima dia guta mubela, ahanele giphuta gia Manase, somi ya Yozefe khapho dia mavu. Makile somi ya Manase sh’a Gileade munu wakhalele suta, wahetele Gileade nu Bashana. 2 Ahanele nji ajigulu ako a Manase anyi asalele khapho dia mavu gungima dia guta mubela gifua muakhalele fami jiawo: ana a Abiezele, ana a Heleke, ana a Aseliyele, ana a Shekeme, ana a Hefele nu ana a Shemida. Wawa akhalele mala a mu giphuta gia Manase mun’a Yozefe gifua muakhalele fami jiawo. 3 Uvi Selofehade mun’a Hefele, mujigulu wa Gileade mun’a Makile, mun’a Manase, gakhalelego nu ana a mala, wakhalele phamba nu ana a akhetu. Majina a an’enji a akhetu akhalele: Mala, Nowa, Hogela, Milka nu Tilesa. 4 Ayile gutuama dia nganga-nzambi Eleazale nu Yoshua mun’a Nune nu mafumu, azuelele egi: “Yehowa wawambelele Moize ha gutuhana khapho mukatshi dia aphangi’etu a mala.” Hene a ahanele khapho dia mavu mukatshi dia aphangi’a sh’awo, gifua muazuelele Yehowa.
5 Alundjile enya giphuta gia Manase itshinyi kumi ya mavu holu dia mavu a Gileade nu a Bashana, anyi adi ha sambua diko dia* Yordane, 6 handaga ana a Manase a akhetu ahetele khapho hamoshi nu an’enji a mala; ajigulu a Manase ako anyi asalele azudile mavu a Gileade.
7 Mudidilo wa Manase wasendesele gu Asele uu nu gu Mikemetate idi ha sambua dia Shekeme, wayile uu nu gu khanda ya sud* ya mavu a enya Taphuwa. 8 Mavu a Taphuwa abuile a enya giphuta gia Manase, uvi dimbo dia Taphuwa dinyi diakhalele mu mudidilo wa giphuta gia Manase diakhalele dia ajigulu a Efrayime. 9 Mudidilo wene wabulumugile gu khanda ya sud ya baba* dia Kana. Membo ako a enya giphuta gia Efrayime akhalele mu mavu a enya giphuta gia Manase. Mudidilo wa enya giphuta gia Manase wakhalele gu khanda ya nord ya baba, wasugile gu kianga. 10 Mavu a gu khanda ya sud akhalele a giphuta gia Efrayime, a gu khanda ya nord akhalele a giphuta gia Manase, kianga giakhalele mudidilo wa enya giphuta gia Manase. Gu khanda ya nord ayile* uu nu mu mavu a enya giphuta gia Asele, gu khanda ya mazogelo a kumbi ayile uu nu mu mavu a giphuta gia Isakale.
11 Mu mavu a giphuta gia Isakale nu gia Asele, ahanele enya giphuta gia Manase membo awa: Bete-Shana nu membo akhalele hehi, Ibeleame nu membo akhalele hehi, Dole nu membo akhalele hehi, Ene-Dole nu membo akhalele hehi, Tanaka nu membo akhalele hehi, Megido nu membo akhalele hehi nu athu a mu membo ene nu milundu thathu.
12 Uvi ajigulu a Manase akhalelego nu ngolo ha gutambula membo ene; enya Kanana alanduile gujinga mu mavu ene. 13 Tangua enya Isalele abuile nu ngolo jiavula, asendesele gutshitshisa enya Kanana midimo gu ngolo, uvi a akayelego mukut’awo agasue.
14 Ajigulu a Yozefe ahudile Yoshua egi: “Mukunda natshi watuhanyi* phamba gitshinyi gimoshi gia mavu gifua khapho gungima dia guta mubela? Tudi athu avula handaga Yehowa wana gutushimbiga uu nu mangino.” 15 Yoshua waavutudile egi: “Gula mudi athu avula, kandugenu mu gishitu, musole fundo muajiya gukhala mu mavu a enya Phelese nu a enya Refayime, handaga khanda ya milundu ya Efrayime idi yazonda mukunda nu enue.” 16 Uvi ajigulu a Yozefe amuvutudile egi: “Khanda ya milundu idi diago yazonda mukunda nu esue. Enya Kanana agasue ana jinga mu mavu anyi adi mu baba nu athu adi gu Bete-Shana nu mu membo a hehi nu anyi adi mu baba dia Yizelele, adi nu phusu-phusu jia ita jidi nu phogo jia utadi* gu pine.” 17 Hene Yoshua wawambelele ajigulu a Yozefe enya giphuta gia Efrayime nu Manase egi: “Mudi athu avula, mudi nji nu ngolo jiavula. Mbamushigo muheta phamba gitshinyi gimoshi gia mavu, 18 khanda ya milundu mbayibua nji yenu. Idi gishitu uvi mbamugisola, mudidilo wa mavu enu mbawusuga guene. Mbamukaya diago enya Kanana ikhale adi nu ngolo nu adi nu phusu-phusu jia ita jidi nu phogo jia utadi gu pine.”*