Mukanda wa Mbadi wa Gudilanduluila
33 Manase wakhalele nu ivo 12 habuile muene fumu, wahinyine ivo 55 gu Yelusalema.
2 Wakalegele ndaga jiabola gu meso a Yehowa, walanduile makalegelo a usala a ifutshi inyi Yehowa wakayele gutuama dia enya Isalele. 3 Watungile luko mafundo a gukombelela anyi amuangele sh’enji Ezekiase, walondele nji iwotshielo mukunda nu isongo ya Bale nu mitshi ya gijila.* Wafugamele themua nu ima iko ya mu dilu, wayikombelele. 4 Watungile iwotshielo mu inzo ya Yehowa, fundo Yehowa wazuelele egi: “Jina diami mbadikhala gu Yelusalema mayilago.” 5 Watungile nji iwotshielo mukunda nu themua nu ima iko ya mu dilu mu ibanzala mbadi ya inzo ya Yehowa. 6 Wawetshiele an’enji a mala ha tshuya* mu baba dia mun’a Hinoma, wakalegele ndaga jia wanga, waphongele, wahagele nji nganga ngombo nu athu ana zuela ndaga mbajibua gu matuama. Wakalegele ndaga jiavula jiabola gu meso a Yehowa ha gumuhana khabu.
7 Wazudile gisongo gialondele muene, wagihagele mu inzo ya Nzambi wa giamatshidia, inyi Nzambi wawambelele Davidi nu mun’enji Salomo egi: “Mbanguhaga jina diami mayilago mu inzo eyi, nu gu Yelusalema dimbo ngatombi mukatshi dia iphuta yagasue ya Isalele. 8 Mbangushigo luko mukatula enya Isalele mu mavu anyi ngahanele akhakh’awo, gula ene atumagela muabonga ndaga jiagasue ngaawambelele, nu mikhuala yagasue nu ba desizio ngaahanele mu njila ya Moize.” 9 Manase walanduile guwunganesa enya Yuda nu enya gu Yelusalema, waatumile ha gukalagala gubola guavula gubalega gua enya ifutshi inyi Yehowa washiyile gutuama dia enya Isalele.
10 Yehowa wakhalele mutemesa Manase nu athu enji, uvi ene atunyile gawo gutegelela. 11 Hene Yehowa waatumidile mafumu a masuta a fumu wa gu Asiliya ha gualuisa, akuatele Manase nu ndobo,* amujitshigile nu milulu mbadi ya kuivre, ayile n’enji gu Babilona. 12 Hakhalele muene mu lamba, wabubidile Yehowa Nzambi wenji ha gumuvuila khenda, wadibulumuishile muavula gutuama dia Nzambi wa akhakh’enji. 13 Walanduile gukombelela Nzambi, muene wavuile gububa guenji, wavuile nji ndaga yamutogele muene. Hene wamuvutuile gu Yelusalema ha guvutugila ufumu wenji. Ngenyi Manase wakotelesele egi Yehowa udi Nzambi wa giamatshidia.
14 Gungima watungile gibayi gialeha diago hanze a dimbo, mukunda nu Dimbo dia Davidi gu khanda ya mayilo a kumbi a Gihona mu baba;* gibayi giene giayile uu nu gu Mufulo wa Jishui, giakondomogele uu nu gu Ofele. Wahagele nji mafumu a masuta mu membo agasue akhalele nu ibayi yakola gu Yuda. 15 Gungima wakatudile Nzambi jia ngenji nu gisongo giakhalele mu inzo ya Yehowa, nu iwotshielo yagasue yatungile muene gu mulundu wa inzo ya Yehowa nu gu Yelusalema. Wayibishidile gonze ya dimbo. 16 Walondele nji giwotshielo gia Yehowa, wasendesele guhana milambu ya guhuima nu milambu ya guhana mersi ha giwotshielo giene. Wawambelele enya Yuda ha gukombelela Yehowa Nzambi wa Isalele. 17 Uvi athu alanduile gawo guhana milambu mu mafundo a gukombelela,* ngatshima akhalele muhana milambu yene phamba gudi Yehowa Nzambi wawo.
18 Ndaga jiko jiakalegele Manase nu gisambu giatshitshile muene gudi Nzambi wenji, nu mbimbi jia muwambelele athu akhalele mumona vizio mu jina dia Yehowa Nzambi wa Isalele, jidi jia gusonega mu mene jia mafumu a gu Isalele. 19 Gisambu gienji nu luholo Nzambi wavuile gububa guenji, nu mabugu atungile muene mafundo a gukombelela, nu mitshi ya gijila* yahagele muene, nu isongo yalondele muene gutuama egi adibulumuise, idi ya gusonega mukatshi dia ndaga jiasonegele athu enji anyi akhalele mumona vizio. 20 Gungima, Manase wafuile gifua muafuile akhakh’enji; amufundjile hehi nu inzo yenji. Mun’enji Amona wabuile fumu ha fundo dienji.
21 Amona wakhalele nu ivo 22 habuile muene fumu, wahinyine ivo mbadi gu Yelusalema. 22 Wakhalele nji mutshita ndaga jiabola gu meso a Yehowa gifua sh’enji Manase. Amona wahanele milambu gudi isongo yagasue yalondele sh’enji Manase, walanduile guyikombelela. 23 Amona gadibulumuishilego gutuama dia Yehowa, gifua muadibulumuishile sh’enji Manase, uvi watshitshile luko gubola guavula. 24 Gungima enya mudimo enji amuyidile giphungi, amushiyile mu inzo yenji. 25 Uvi athu a mu gifutshi ashiyile athu agasue anyi ayidile Fumu Amona giphungi, abuishile mun’enji Yoziase fumu ha fundo dienji.