Mukanda wa Mbadi wa Mafumu
16 Mu givo gia 17 gia uhinyinyi Pheka mun’a Lemaliya, Ahaza mun’a Fumu Yotama wa gu Yuda wabuile fumu. 2 Wakhalele nu ivo 20 tangua diabuile muene fumu, wahinyine ivo 16 gu Yelusalema. Ahaza gakalegelego ndaga jiabonga gu meso a Yehowa Nzambi wenji, galanduilego gifezegeselo gia khakh’enji Davidi. 3 Walanduile makalegelo abola a mafumu a gu Isalele, wawetshiele nji mun’enji wa yala ha tshuya.* Walanduile makalegelo abola a enya ifutshi inyi Yehowa wakayele gutuama dia enya Isalele. 4 Wakhalele muhana milambu nu gukanduisa mishi ya milambu yene mu mafundo a gukombelela nu mu tumilundu nu ha mishin’a mitshi yagasue yakoma yakhalele nu mayiji avula.
5 Mu tangua diene, Fumu Lesina wa gu Siliya nu Fumu Pheka mun’a Lemaliya wa gu Isalele, ayile muluisa Ahaza gu Yelusalema. Ajietele dimbo uvi aditambudilego. 6 Mu tangua diene dimoshi, Fumu Lesina wa gu Siliya wavutudile dimbo dia Elate gudi enya Edome, gungima wakayele enya Yuda* akhalele mujinga mu dimbo diene. Enya Edome anginyile mu dimbo diene, adizudile, ana khala muene uu nu mangino. 7 Hene Ahaza watumile athu ha guwambela Fumu Tigalate-Pilesele wa gu Asiliya egi: “Ngudi muenya mudimo waye, ngudi mun’aye.* Iza unguhuluise ha mago a fumu wa gu Siliya nu fumu wa gu Isalele. Adi gunguluisa.” 8 Gungima Ahaza wazudile utadi wa siliva nu wolo wakhalele mu inzo ya Yehowa nu unu wakhalele gu sugu akhalele mubambela ima ya ndando mu inzo ya fumu, wawutumile* gudi fumu wa gu Asiliya hagula amukuatese. 9 Fumu wa gu Asiliya watshiginyile ndaga yamutogele Ahaza, wayile muluisa dimbo dia Damase, waditambudile. Wabatele athu a mu dimbo diene mu uhiga gu Kile, washiyile nji Lesina.
10 Gungima Fumu Ahaza wayile mutagana nu Fumu Tigalate-Pilesele wa gu Asiliya gu Damase. Hamonele Fumu Ahaza giwotshielo giakhalele gu Damase, watumidile nganga-nzambi Uriya gifuanesa gia giwotshielo nu luholo gialondewe. 11 Nganga-nzambi Uriya watungile giwotshielo giene gifua ginyi giakhalele mu gifuanesa giamutumidile Fumu Ahaza hakhalele muene gu Damase. Wamanesele gutunga giwotshielo giene gutuama egi Fumu Ahaza avutuge. 12 Havutugile fumu, wamonele giwotshielo, wayile gu giwotshielo giene, wahanele milambu holu diagio. 13 Wakhalele mukanduisa mishi ya milambu yenji ya guwotshia nu milambu yenji ya mbuto holu dia giwotshielo giene; wakhalele nji mubundula milambu ya matombe nu gunianga mahatshi a milambu yenji ya guhuima holu. 14 Wakatudile giwotshielo gia kuivre giakhalele gutuama dia Yehowa gutuama dia tempelo, giwotshielo giene giakhalele hakatshi na katshi dia giwotshielo gialondele muene nu inzo ya Yehowa, wagihagele gu khanda ya nord ya giwotshielo gienji. 15 Fumu Ahaza wawambelele nganga-nzambi Uriya egi: “Khala muhana mulambu wa guwotshia wa mu gimenegena holu dia giwotshielo giakoma hagula uzole mishi nu mulambu wa mbuto wa mu ngueze, nu mulambu wa fumu wa guwotshia, nu mulambu wenji wa mbuto, nu milambu ya guwotshia nu milambu ya mbuto nu milambu ya matombe ya athu agasue. Udi naye nji gunianga mahatshi agasue a milambu ya guwotshia nu mahatshi agasue a milambu iko holu dia giwotshielo giene. Ame hakhami ngudi mujiya ndaga mbangutshita nu giwotshielo gia kuivre.” 16 Nganga-nzambi Uriya wakalegele ndaga jiagasue jiamuwambelele Fumu Ahaza.
17 Fumu Ahaza wakokele nji pano jiakhalele gu khanda nu khanda ya phusu-phusu itshinyi-itshinyi, wakatudile nji malonga akhalele holu. Wakatudile kianga giakhalele holu dia ngombe jia milume jia kuivre, wagihagele hashi holu dia maseso. 18 Wakatudile nji fundo diakhalele dia gutshuiga gu tempelo, dinyi diatungiwe mukunda nu Lusugu lua Guhuluguga, nu mufulo wa hanze unu fumu wakhalele munginyila mu inzo ya Yehowa. Watshitshile ngenyi handaga wakhalele muvuila fumu wa gu Asiliya woma.
19 Ndaga jiko jiakalegele Ahaza nu ima yatshitshile muene, idi ya gusonega mu mukanda wa mene jia mafumu a gu Yuda. 20 Gungima Ahaza wafuile gifua muafuile akhakh’enji, amufundjile nawo mu Dimbo dia Davidi. Mun’enji Ezekiase* wabuile fumu ha fundo dienji.