Mukanda wa Mbadi wa Mafumu
14 Mu givo gia mbadi gia uhinyinyi wa fumu Yoase mun’a Yoahaza wa gu Isalele, Amazia mun’a Fumu Yoase wa gu Yuda wabuile fumu. 2 Amazia wakhalele nu ivo 25 habuile muene fumu, wahinyine ivo 29 gu Yelusalema. Jina dia gin’enji diakhalele Yoadana, wakhalele muenya gu Yelusalema. 3 Wakhalele mukalagala ndaga jiabonga gu meso a Yehowa, uvi gatshitshilego ndaga gifua khakh’enji Davidi. Watshitshile ndaga jiagasue gifua muatshitshile sh’enji Yoase. 4 Uvi mafundo a gukombelela akatudiwego. Athu alanduile gawo guhana milambu nu gukanduisa mishi ya milambu yene mu mafundo a gukombelela. 5 Tangua Amazia wakolesele ufumu wenji, washiyile enya mudimo enji anyi ashiyile sh’enji. 6 Uvi gashiyilego ana a athu ashiyile sh’enji ha gunemesa mukhuala wa Yehowa udi wa gusonega mu mukanda wa Mikhuala ya Moize egi: “Atata ashigo naye gushiyiwa mukunda nu an’awo, ana nji ashigo naye gushiyiwa mukunda nu ash’awo; muthu nu muthu udi naye gushiyiwa mukunda nu gubola guenji.” 7 Amazia washiyile enya Edome 10 000 mu Baba dia Mungua, watambudile nji dimbo dia Sela gu ita. Dimbo diene diana tamegewa egi Yoketele uu nu mangino.
8 Gungima Amazia watumile athu ha guya muwambela Yoase mun’a Yoahaza, mujigulu wa Yehu, fumu wa gu Isalele egi: “Iza tulue ita.”* 9 Fumu Yoase wa gu Isalele watumidile Fumu Amazia wa gu Yuda mbimbi egi: “Mutshi wa miya wa gu Libane watumidile mutshi wa sedre wa gu Libane mbimbi egi: ‘Hana mun’aye wa mukhetu mu ulo gudi mun’ami wa yala.’ Uvi shitu ya mu foto ya gu Libane yabalegele, yadiatele mutshi wa miya. 10 Idi yadiago egi wabua nu lulendo handaga wabingi enya Edome. Suanguluga luholo waabingi, uvi khala gumbo diaye.* Mukunda natshi udi gudikambela lamba nu gubua guaye nu udi munginyisa nji enya Yuda mu mulonga wene?” 11 Uvi Amazia watunyile gumutegelela.
Hene Fumu Yoase wa gu Isalele wayile mulua ita nu Fumu Amazia wa gu Yuda gu Bete-Shemeshe, mu mavu a enya Yuda. 12 Masuta a gu Isalele abingile enya Yuda; hene masuta a enya Yuda alengele muthu nu muthu wayile gumbo* dienji. 13 Fumu Yoase wa gu Isalele wakuatele Fumu Amazia wa gu Yuda mun’a Yoase, mujigulu wa Ahaziya gu Bete-Shemeshe. Gungima ayile gu Yelusalema. Yoase wabudile gibayi gia Yelusalema sendese gu Mufulo wa Efrayime uu nu gu Mufulo wa Khomo, hulu diene diakhalele dia bakude 400.* 14 Wazudile wolo wagasue nu utadi wa siliva nu ima yagasue yakhalele mu inzo ya Yehowa nu inyi yakhalele mu sugu akhalele mubamba ima ya ndando mu inzo ya fumu nu athu akuatele muene gu ita, wavutugile gu Samaliya.
15 Ndaga jiko jiakalegele Yoase nu ima yatshitshile muene nu ngolo jienji nu ita yaluile muene nu Fumu Amazia wa gu Yuda, idi ya gusonega mu mukanda wa mene jia mafumu a gu Isalele. 16 Gungima Yoase wafuile gifua muafuile akhakh’enji, amufundjile gu Samaliya nu mafumu a gu Isalele. Mun’enji Yeloboama* wabuile fumu ha fundo dienji.
17 Gungima dia gufua gua Yoase mun’a Yoahaza fumu wa gu Isalele, Amazia mun’a Yoase fumu wa gu Yuda, wasalele luko nu monyo ivo 15. 18 Ndaga jiko jiakalegele Amazia jidi jiagusonega mu mukanda wa mene jia mafumu a gu Yuda. 19 Gungima amuyidile giphungi gu Yelusalema, walengele gu Lakishe. Uvi atumile athu ha gumulandula gu Lakishe, amushiyile guene. 20 Amubatele holu dia tubalu, avutugile n’enji gu Yelusalema. Amufundjile nu akhakh’enji mu Dimbo dia Davidi. 21 Gungima athu agasue a gu Yuda abuishile Azariya* fumu ha fundo dia sh’enji Amazia. Mutangua diene, Azariya wakhalele nu ivo 16. 22 Azariya watungile luko dimbo dia Elate, wadivutudile gudi enya Yuda hafuile fumu Amazia gifua muafuile akhakh’enji.
23 Mu givo gia 15 gia uhinyinyi wa fumu Amazia mun’a Yoase wa gu Yuda, Yeloboama mun’a Fumu Yoase wa gu Isalele wabuile fumu. Wahinyine gu Samaliya ivo 41. 24 Walanduile gukalagala ndaga jiabola gu meso a Yehowa. Gabembelego gukalagala gubola guagasue gunu Yeloboama mun’a Nebate watumile enya Isalele ha gutshita. 25 Wavutudile luko mididilo ya Isalele sendese gu Lebo-Hamate* uu nu gu Kianga gia Araba,* gifua luholo Yehowa Nzambi wa Isalele wazuelele mu njila ya muenya mudimo wenji Yona mun’a Amitayi, profete wa gu Gate-Hefele. 26 Handaga Yehowa wamonele lamba diakola dia enya Isalele. Guakhalelego nga nu muthu wajiya gukuatesa Isalele, nga ene athu aguleba nu ashigo nu ndando. 27 Uvi Yehowa walayele egi mbagashigo mutotesa jina dia Isalele ha mavu, hene wahuluishile enya Isalele mu njila ya Yeloboama mun’a Yoase.
28 Ndaga jiko jiakalegele Yeloboama nu ima yagasue yatshitshile muene nu ngolo jienji nu ita yaluile muene nu luholo luavutudile muene dimbo dia Damase nu dia Hamate gudi enya Yuda gu Isalele, idi ya gusonega mu mukanda wa mene jia mafumu a gu Isalele. 29 Gungima Yeloboama wafuile, amufundjile nu akhakh’enji, yakotelesa egi mafumu a gu Isalele. Mun’enji Zakaliya wabuile fumu ha fundo dienji.