Mukanda wa Mbadi wa Mafumu

18 Mu givo gia thathu gia uhinyinyi wa Hoshea mun’a Ela fumu wa gu Isalele, Ezekiase mun’a Fumu Ahaza wa gu Yuda wabuile fumu. 2 Wakhalele nu ivo 25 habuile muene fumu, wahinyine ivo 29 gu Yelusalema. Jina dia gin’enji diakhalele Abi* mun’a Zakaliya. 3 Ezekiase wakhalele mukalagala ndaga jiabonga gu meso a Yehowa, gifua muatshitshile khakh’enji Davidi. 4 Muene wakatudile mafundo a gukombelela, wamuangele makunji a gijila, waboguele nji mutshi wa gijila.* Wamuangele nioga ya kuivre yalondele Moize, handaga uu nu mu tangua diene, enya Isalele akhalele muhana milambu gutuama dia nioga yene. Akhalele guyitamega egi gisongo gia nioga ya kuivre.* 5 Ezekiase wakhalele muhagela Yehowa Nzambi wa Isalele mutshima. Guakhalelego nga nu fumu mumoshi gifua muene mukatshi dia mafumu agasue a gu Yuda anyi ahinyine gutuama dienji nu gungima dienji. 6 Wakhalele wa gujinginyina gudi Yehowa. Gamutunyilego; walanduile gutumagela mikhuala Yehowa wahanele gudi Moize. 7 Yehowa wakhalele nu Ezekiase. Wakhalele mutshita ndaga jiagasue nu gutema. Walumbugidile fumu wa gu Asiliya, watunyile gukhala muenya mudimo wenji. 8 Wabingile nji enya Filistiya uu nu gu Gaza nu mu membo akhalele hehi, sendese gu jinzo jialeha uu nu mu membo akhalele nu ibayi yakola.*

9 Mu givo gia nguana gia uhinyinyi wa Fumu Ezekiase, yakotelesa egi mu givo gia 7 gia uhinyinyi wa Hoshea mun’a Ela fumu wa gu Isalele, Fumu Shalamanesele wa gu Asiliya wajile muluisa Samaliya, wayijietele. 10 Gungima dia ivo thathu, enya Asiliya atambudile Samaliya; yakhalele mu givo gia 6 gia uhinyinyi wa Ezekiase, yakotelesa egi givo gia 9 gia uhinyinyi wa Fumu Hoshea wa gu Isalele. 11 Gungima fumu wa gu Asiliya wabatele enya Isalele mu uhiga gu Asiliya. Waahagele gu Hala nu gu Habole hehi nu muta wa Gozana nu mu membo a gu Mede. 12 Ndaga eji jiaabuidile handaga ategelelego mbimbi ya Yehowa Nzambi wawo. Akhalele mushiya gikotelo gienji, atumagelego ndaga jiagasue jiaawambelele Moize muenya mudimo wa Yehowa. Ene ajitegelelego nu ajitumagelego.

13 Mu givo gia 14 gia uhinyinyi wa Fumu Ezekiase, fumu Senakeribe wa gu Asiliya wajile muluisa membo agasue a gu Yuda akhalele nu ibayi yakola, waatambudile. 14 Hakhalele fumu wa gu Asiliya gu Lakishe, Fumu Ezekiase wa gu Yuda wamutumidile mbimbi egi: “Ngakalagala gubola. Gula wakatuga mu mavu ami, mbanguguhana ima yagasue mbawungutoga.” Fumu wa gu Asiliya watogele Fumu Ezekiase wa gu Yuda utadi wa siliva batalanta* 300 nu wolo batalanta 30. 15 Ezekiase wahanele utadi wagasue wa siliva wakhalele mu inzo ya Yehowa nu unu wakhalele mu sugu akhalele mubambela ima ya ndando mu inzo ya fumu. 16 Mu tangua diene Fumu Ezekiase wa gu Yuda wakatudile ijidigo ya mifulo ya tempelo ya Yehowa nu makunji a ijidigo akungile muene wolo, wayihanele gudi fumu wa gu Asiliya.

17 Fumu wa gu Asiliya watumile Talatane* nu Rabasalisa* nu Rabeshake* nu masuta avula akatugile gu Lakishe, ha guya gudi Fumu Ezekiase gu Yelusalema. Akandugile gu Yelusalema, amaganele hehi nu njila ya meya* yakhalele mubata meya a gijiba gia gu thunda, idi hehi nu njila yakoma idi muya gu dihia dia muthu wana wevua milele. 18 Atamegele fumu ha guzoga hanze, uvi phamba athu awa thathu azogele ha guya guatagana: Eliyakime mun’a Hilikiya, munu wakhalele mutuameza inzo ya fumu, nu sekretere Shebna nu Yoa mun’a Asafe munu wakhalele musonega ndaga jiakhalele mubua mu gifutshi.

19 Rabeshake waawambelele egi: “Ngabuba, wambelenu Ezekiase egi: ‘Fumu wakoma, fumu wa gu Asiliya wazuela egi: “Nanyi udi mushila mutshima? 20 Udi muzuela egi: ‘Ngudi nu ndunge nu ngolo jia gulua ita.’ Uvi jidi mbimbi jia githuhu. Nanyi udi mushila mutshima hene udi gungulumbugila? 21 Tala! Aye udi mushila Ejipitu mutshima, uvi Ejipitu idi gifua dithethe* dialeba. Gula muthu wadizegemena, diana gumutua, diana gumungina ha gikata gia koko. Farao, fumu wa gu Ejipitu udi nji ngenyi mukunda nu athu agasue adi gumushila mutshima. 22 Gula muazuela egi: ‘Tudi mushila Yehowa Nzambi wetu mutshima,’ Ezekiase, ishigo aye wakatudile mafundo enji a gukombelela nu iwotshielo yenji ba? Wawambelele enya Yuda nu enya gu Yelusalema egi: ‘Mudi naye gufugama gutuama dia giwotshielo egi gidi gu Yelusalema’.”’ 23 Henyaha ngabuba, divuenu nu fumu wami wa gu Asiliya: Mbanguguhana tubalu 2 000 ha gutala gula wajiya guheta athu ha guwendesa tubalu tuene. 24 Luholo lutshi muthu gifua eye udi mushila Ejipitu mutshima ha guheta phusu-phusu nu awendeshi a tubalu, wajiya gubinga nga guvernere mumoshi munu gashigo nu ndando yavula mukatshi dia enya mudimo a fumu wami? 25 Udi mutangiza egi ishigo Yehowa wanguhanyi njila ha guza muluisa fundo edi nu ha gudishiya ba? Yehowa hakhenji wanguwambela egi: ‘Nda uluise gifutshi egi, ugishiye.’”

26 Hene Eliyakime mun’a Hilikiya nu Shebna nu Yoa awambelele Rabeshake egi: “Tuabuba, zuela nu esue enya mudimo aye mu Alama,* tudi mujiya zuelelo diene; utuwambelago mu zuelelo dia enya Yuda handaga athu adi holu dia gibayi adi gutuvua.” 27 Uvi Rabeshake waawambelele egi: “Fumu wami gangutumilego ha guzuela mbimbi eji phamba gudi enue nu fumu wenu! Mbimbi jiene jidi nji mukunda nu athu adi a gukhala holu dia gibayi anyi mbaadia tuji tuawo nu mbaanua masu awo hamoshi nu enue!”

28 Gungima Rabeshake wamaganele, wazuelele mu dijui diakola mu zuelelo dia enya Yuda egi: “Tegelelenu mbimbi jia fumu wakoma, fumu wa gu Asiliya. 29 Fumu wazuela egi: ‘Ezekiase gamihuigigo handaga gashigo nu ngolo jia gumihuluisa ha mago ami. 30 Ezekiase gamitumigo ha gushila Yehowa mutshima hadi muene muzuela egi: “Yehowa mbawutuhuluisa diago! Fumu wa gu Asiliya mbagashigo mutambula dimbo edi.” 31 Mutegelelago Ezekiase. Fumu wa gu Asiliya wazuela egi: “Divuenu nu ame, mudihane ha mago ami, ngenyi muthu wagasue mukatshi dienu mbawudia mabundu a mutshi wenji wa vinyo nu mutshi wenji wa figi, mbawunua nji meya a mu wina dienji dia meya. 32 Gungima mbanguza, mbangumibata mu gifutshi gidi gifua gienu, gifutshi gidi nu mbuto nu vinyo ihe-ihe, gifutshi gidi nu mapha nu ilanga ya vinyo, gifutshi gidi nu mitshi ya olive nu wigi. Mbamukhala nu monyo, mbamushigo mufua. Muvuigo ndaga jidi muzuela Ezekiase handaga udi gumihuiga egi: ‘Yehowa mbawutuhuluisa.’ 33 Gudi nga nu nzambi mumoshi wa ifutshi wahuluishile gale gifutshi gienji ha mago a fumu wa enya Asiliya ba? 34 Nzambi jia Hamate nu Alephada jidi gui? Nzambi jia Sefalevayima nu Hena nu Iva jidi gui? Jiahuluishile Samaliya ha mago ami ba? 35 Nzambi mutshi mukatshi dia nzambi jia ifutshi eyi wahuluishile gifutshi gienji ha mago ami, hagula Yehowa mbaahuluise Yelusalema ha mago ami?”’”

36 Uvi athu ahenele tedie, amuvutudilego nga gima handaga fumu waawambelele egi: “Mushigo naye gumuhana mvutu.” 37 Eliyakime mun’a Hilikiya, munu wakhalele mutuameza inzo ya fumu nu sekretere Shebna nu Yoa mun’a Asafe, munu wakhalele musonega ndaga jiakhalele mubua mu gifutshi, atawudile milele yawo, ayile muwambela Ezekiase ndaga jiazuelele Rabeshake.