Mukanda wa Thomo wa Gudilanduluila

4 Ana a Yuda enyawa: Phelese, Heselona, Kalemi, Hule nu Shobale. 2 Reyaya mun’a Shobale wavualele Yahata; Yahata wavualele Ahumayi nu Lahada. Eji jiene fami jia enya gu Sola. 3 Ana a sh’a Etame enyawa: Yizelele, Yishema nu Yidebashi (phangi’awo wa mukhetu jina dienji Haselelephoni). 4 Penuele wavualele Gedole, Ezele wavualele Husha. Akhalele ana a Hule. Hule wakhalele somi wa Efrata, wakhalele nji sh’a Beteleheme. 5 Ashehule sh’a Tekoa wakhalele nu akhetu mbadi: Hela nu Nala. 6 Muene nu mukaji’enji Nala avualele Ahuzama, Hefele, Temeni nu Ahashetali. Ene akhalele ana a Nala. 7 Ana a Hela akhalele: Selete, Yisehale nu Etane. 8 Kose wakhalele sh’a Anuba nu Zobeba, wakhalele nji khakha wa fami jia Ahalehele mun’a Haluma.

9 Athu akhalele munemesa Yabese* muavula gubalega aphangi’enji ako; gin’enji wamuhanele jina egi Yabese, wazuelele egi: “Ngamuvualele mu lamba.” 10 Yabese wakombelele Nzambi wa Isalele egi: “Ngabuba, ngushimbige, komesa mavu ami. Ngukuatese, ngubambe hagula lamba dingusagesago.” Nzambi wataganesele ndaga jiatogele muene.

11 Keluba phangi’a Shuha wavualele Mehile munu wakhalele sh’a Eshetone. 12 Eshetone wavualele Bete-Lafa nu Phasea nu Tehina sh’a Ile-Nahashe. Athu awa akhalele enya gu Reka. 13 Ana a Kenaze akhalele: Otenyele nu Selaya. Mun’a* Otenyele wakhalele Hatate. 14 Meonotayi wavualele Ofela. Selaya wavualele Yoabe sh’a enya gu Ge-Harashime.* Akhalele mutamega baba diene ngenyi handaga athu akhalele guene akhalele mbembo.

15 Ana a Kalebe mun’a Yefune akhalele: Ilu, Ela nu Naama; mun’a* Ela wakhalele Kenaze. 16 Ana a Yehalele akhalele: Zife, Zifa, Tiliya nu Asalele. 17 Ana a Ezela akhalele: Yetele, Melede, Efele nu Yalone; mukaji’a* Melede mumoshi wavualele Miriame nu Shamayi nu Yisheba sh’a Eshetemoa. 18 (Mukaji’enji wa muenya Yuda wavualele Yelede sh’a Gedole nu Hebele sh’a Soko nu Yekutiele sh’a Zanoa). Awa akhalele ana* a Bitiya mun’a Farao wa mukhetu munu Melede wazudile mu ulo.

19 Ana a Hodiya avualele muene nu phangi’a Nahama wa mukhetu akhalele: athu atungile Keyila ya enya Galema nu athu atungile Eshetemoa ya enya Maka. 20 Ana a Shimona akhalele: Amenona nu Lina nu Bene-Hanana nu Tilona. Ana a Yisheyi akhalele: Zohete nu Bene-Zohete.

21 Ana a Shela mun’a Yuda akhalele: Ele sh’a Leka nu Lada sh’a Malesha nu ajigulu enji a mu fami ya Ashebea anyi akhalele mutunga milele yabonga, 22 nu Yokime nu enya gu Kozeba nu Yoashe nu Salafe, anyi azudile akhetu a gu Moaba mu ulo, nu Yashubi-Leheme. Mikanda eyi ya majina idi mikanda ya mualeha.* 23 Athu ene akhalele abumbi a nzungu, akhalele mujinga gu Netayima nu gu Gedela. Akhalele mukhala guene, akhalele mukalegela fumu mudimo.

24 Ana a Simeone akhalele: Nemuele, Yamine, Yalibe, Zela nu Shaula. 25 Shaula wavualele Shaluma, Shaluma wavualele Mibisama, Mibisama wavualele Mishima. 26 Mun’a* Mishima wakhalele Hamuele, Hamuele wavualele Zakule, Zakule wavualele Shimeyi. 27 Shimeyi wakhalele nu ana a mala 16 nu ana a akhetu 6; uvi aphangi’enji a mala avualelego ana avula. Gushigo nga nu fami yawo imoshi yavualele athu avula gifua fami jia mu giphuta gia Yuda. 28 Akhalele mujinga gu Belesheba nu gu Molada nu gu Hasale-Shuala, 29 nu gu Bila nu gu Eseme nu gu Tolade, 30 nu gu Betuele nu gu Holema nu gu Sikelage, 31 nu gu Bete-Malekabote nu gu Hasale-Susime nu gu Bete-Bili nu gu Shalayima. Awa akhalele membo awo uu nu tangua Davidi wasendesele guhinyina.

32 Akhalele mujinga gu Etame nu gu Ayine nu gu Limona nu gu Tokene nu gu Ashana; membo ene akhalele thano, 33 nu membo akhalele hehi nu membo awa agasue uu nu gu Bale. Eyi mikanda yasonegewe majina a fami jiawo nu mafundo akhalele ene mujinga. 34 Awa majina a ajigulu ako a Simeona: Meshobaba, Yameleke, Yosha mun’a Amazia, 35 nu Yowele nu Yehu mun’a Yoshibiya, mujigulu wa Selaya nu Asiele, 36 nu Eliyohenayi nu Yakoba nu Yeshahaya nu Asaya nu Adiele nu Yesemiele nu Benaya, 37 nu Ziza mun’a Shipheyi, Shipheyi mun’a Alone, Alone mun’a Yedaya, Yedaya mun’a Shimeli, Shimeli mun’a Shemaya. 38 Athu awa tuatanga akhalele mafumu a fami jiawo; enya fami jia akhakh’awo akhalele gudivudisa muavula. 39 Ayile gu mufulo wa Gedole, gu khanda ya mazogelo a kumbi gu baba, ha gukamba matemu a gudisa shitu jiawo. 40 Ahetele matemu abonga akhalele nu muangu wavula. Mavu ene akhalele akoma, akhalele tedie, akhalelego nga nu gima giaguasagesa. Athu a thomo ajingile guene akhalele enya Kame. 41 Majina a athu awa tuatanga ajile mu mavu ene mu masugu anyi fumu Ezekiase wa gu Yuda wakhalele muhinyina. Amuangele tenta jia enya Kame nu ashiyile enya Meunima anyi akhalele mujinga guene; a ashiyile, guasalelego nga nu mumoshi uu nu mangino. Asendesele gukhala mu mavu ene handaga guene guakhalele matemu a gudisa shitu jiawo.

42 Athu 500 a mu giphuta gia Simeone ayile gu Mulundu wa Seyile; ana a Yisheyi akhalele guatuameza, majina awo enyawa: Phelatiya, Nealiya, Lefaya nu Uziele. 43 Ashiyile enya Amaleke ako anyi alengele. Ene atungile guene, ana khala guene uu nu mangino.