Mukanda wa Thomo wa Gudilanduluila
5 Wawa ana a Ribene, somi ya Isalele. Wakhalele mona wa somi, uvi luholo luabolesele* muene gitanda gia sh’enji, khapho dienji dia mona wa somi diahanewe ana a Yozefe mun’a Isalele. Hene, mu senga* ya fami yawo gakhalelego mutangewa gifua mona wa somi. 2 Yuda wabalegele aphangi’enji ako; muthu wakhalele naye gutuameza wazogele gudi muene, uvi khapho dia mona wa somi diahanewe gudi Yozefe. 3 Ana a Ribene somi ya Isalele akhalele: Hanoka, Phalu, Heselona nu Kalemi. 4 Ajigulu a Yowele enyawa: Yowele wavualele Shemaya, Shemaya wavualele Goga, Goga wavualele Shimeyi, 5 Shimeyi wavualele Mika, Mika wavualele Reyaya, Reyaya wavualele Bale, 6 Bale wavualele Beyela munu Fumu Tilagate-pilenesele wa gu Asiliya wabatele mu uhiga. Beyela wakhalele fumu mu giphuta gia Ribene. 7 Wawa aphangi’a Beyela gifua muakhalele senga ya fami jiawo: Fumu Yeyele nu Zakaliya, 8 nu Bela mun’a Azaze, Azaze mun’a Shema, Shema mun’a Yowele. Enya fami ya Bela akhalele mujinga sendese gu Aloele uu nu gu Nebo nu gu Bale-Meona. 9 Ayile mukhala gu khanda ya mazogelo a kumbi uu nu gu gisendeselo gia mavu a luselenga, hehi nu Muta wa Efrata handaga shitu jiawo jiadivudishile muavula mu mavu a Gileade. 10 Mu masugu a fumu Saula, enya giphuta gia Ribene ayile muluisa enya Hagale, a abingile. Hene ayile mukhala mu tenta jiawo mu mavu agasue a gu khanda ya mazogelo a kumbi a Gileade.
11 Ajigulu a Gade akhalele mujinga hehi nawo mu mavu a Bashana uu nu gu Saleka. 12 Yowele wakhalele fumu gu Bashana, Shafame wakhalele muthu wa mbadi, Yanayi nu Shafata akhalele nji atuameji. 13 Mala awa 7 akhalele nji aphangi’awo a mu fami jia mu giphuta giawo: Mikaele nu Meshulame nu Sheba nu Yolayi nu Yakane nu Zia nu Ebere. 14 Athu ene akhalele ana a Abihayile mun’a Huli, Huli mun’a Yaloa, Yaloa mun’a Gileade, Gileade mun’a Mikaele, Mikaele mun’a Yeshishayi, Yeshishayi mun’a Yahedo, Yahedo mun’a Buze. 15 Ahi mun’a Abediele mujigulu wa Guni wakhalele fumu wa fami jia mu giphuta giawo 16 Akhalele mukhala gu Gileade, nu gu Bashana nu mu membo akhalele hehi, nu mu matemu agasue a Shalona uu nu gu suga ya matemu ene. 17 Asonegele majina awo agasue gifua muakhalele senga yawo hakhalele Fumu Yotama muhinyina gu Yuda nu hakhalele Fumu Yeloboama* muhinyina gu Isalele.
18 Enya giphuta gia Ribene nu gia Gade nu gitshinyi gia giphuta gia Manase akhalele nu masuta a ngolo 44 760. Masuta ene akhalele mubata tshibu nu phogo jia khusa nu mata a manana; alongesewe nji muabonga ha gulua ita. 19 Aluile ita nu enya Hagale nu ajigulu a Yetule nu a Nafishi nu a Nodaba. 20 Tangua akhalele mulua ita, Nzambi waakuatesele ha gubinga enya Hagale nu athu agasue akhalele nawo. Atogele Nzambi ha guakuatesa, muene wavuile gisambu giawo handaga akhalele gumushila mutshima. 21 Atambudile shitu jiawo (shamo 50 000, imeme 250 000 nu phunda 2 000), akuatele nji athu 100 000. 22 Ashiyile athu avula handaga Nzambi wa giamatshidia muene wakhalele gualuila. Gungima ajingile mu mafundo awo uu nu tangua ayile mu uhiga.
23 Ajigulu a gitshinyi gia giphuta gia Manase ajingile mu mavu akhalele musendesa gu Bashana uu nu gu Bale-Helemona nu gu Senile nu gu Mulundu wa Helemona. Akhalele avula. 24 Mafumu a fami jia mu giphuta giawo enyawa: Efele, Yisheyi, Eliyele, Azeliyele, Yelemiya, Hodavia nu Yahadiele; akhalele masuta a ngolo, mala a lutumbu; akhalele nji mafumu a fami jia mu giphuta giawo. 25 Asalelego agujinginyina gudi Nzambi wa akhakh’awo, akombelele nzambi jiko jia athu a mu gifutshi, athu anyi Nzambi wakayele gutuama diawo. 26 Hene Nzambi wa Isalele watumile Fumu Phula wa gu Asiliya (yakotelesa egi Fumu Tilagate-pilenesele wa gu Asiliya), wakuatele enya giphuta gia Ribene nu gia Gade nu gitshinyi gia giphuta gia Manase, wayile nawo mu uhiga gu Hala nu gu Habole nu gu Hara nu gu muta wa Gozana. Guene ana khala uu nu mangino.