Mukanda wa Thomo wa Gudilanduluila
17 Tangua Davidi wayile mukhala mu inzo* yenji, wawambelele profete Natana egi: “Ame ngudi mu inzo ya sedre uvi mushete wa gikotelo wa Yehowa udi mu tenta ya milele.” 2 Natana wawambelele Davidi egi: “Tshita ndaga yagasue watshigina handaga Nzambi wa giamatshidia udi nu aye.”
3 Uvi mu phipha yene Nzambi wawambelele Natana egi: 4 “Nda uwambele muenya mudimo wami Davidi egi: ‘Yehowa wazuela egi: “Ishigo aye mbawutunga inzo inyi ngudi naye gukhala. 5 Handaga sendese tangua ngazolele enya Isalele gu Ejipitu uu nu mangino ngana khala ndo monzo, nganaya nu gukhala mu matenta nu mu ba tabernakle.* 6 Matangua agasue ngakhalele muwenda nu Isalele yagasue, khenji ngawambelelego nga muthu mumoshi mukatshi dia manzuji a Isalele anyi ngatombele ha gubamba athu ami egi: ‘Mukunda natshi muangutungilego inzo ya sedre?’”’
7 “Wambela muenya mudimo wami Davidi egi: ‘Yehowa Nzambi wa masuta wazuela egi: “Ngaguzudile mu temu fundo wakhalele mubamba imeme ha gugubuisa fumu wa athu ami enya Isalele. 8 Mbangukhala nu aye guagasue mbawuya, mbangukatula mbalagaji jiaye jiagasue gutuama diaye, mbangubuisa jina diaye gifua jina dia athu akoma a ha mavu. 9 Mbanguhana athu ami enya Isalele fundo dia gukhala, mbaakhala guene, gushigo nga muthu mbawaasagesa. Athu abola mbaashigo luko guamonesa lamba gifua luholo akhalele mutshita ha thomo, 10 mu masugu ngahagele manzuji ha gutuameza athu ami enya Isalele. Mbanguhana mbalagaji jiaye jiagasue ha mago aye. Ngudi guguwambela luko egi: ‘Ame Yehowa* mbangutshita egi enya fami yaye alandule guhinyina.’
11 “‘“Tangua mbawuheta gu gisugishilo gia monyo waye, nu mbawufua gifua muafile akhakh’aye, mbanguhana ufumu gudi vungu* diaye, gudi mun’aye mumoshi, mbangukolesa diago ufumu wenji. 12 Muene mbawutunga inzo mukunda nu ame, mbangukolesa diago nguasa yenji ya ufumu mayilago. 13 Mbangubua sh’enji, muene mbawubua mun’ami. Mbangushigo mubemba gumumonesela guzumba gua giamatshidia gifua luholo ngabembele gumonesa guzumba gua giamatshidia gudi muthu wahinyine gutuama diaye. 14 Mbangumutomba ha gukhala fumu mu inzo yami, muene mbawuhinyina mu ufumu wami mayilago, nguasa yenji ya ufumu mbayikhala nji mayilago.”’”
15 Natana wawambelele Davidi mbimbi eji jiagasue nu vizio eyi yagasue.
16 Hene Fumu Davidi wayile mukhala hashi gutuama dia Yehowa, wazuelele egi: “Oo Yehowa Nzambi, ame ngudi nanyi? Fami yami idi itshi ha guheta gubonga guavula ngegi? 17 Oo Nzambi, wangutshitshila gale ndaga jiavula, uvi wazuela luko egi fami yami mbayilandula gujinga masugu avula, Oo Yehowa Nzambi, wanguzula diago gifua muthu wakoma.* 18 Ndaga itshi ngajiya guguwambela luko mukunda nu lutumbu wanguhanyi, handaga aye wana jiya muenya mudimo waye muabonga. 19 Oo Yehowa wakalagala ndaga eji jiagasue jiakoma mukunda nu ame muenya mudimo waye, wangudijiga gukoma guaye gifua mudi gutshigina guaye. 20 Oo Yehowa, gushigo nu muthu gifua aye, gushigo nu Nzambi muko phamba aye; ndaga jiagasue tuavuile nu matshui etu jidi guyitshiginyisa. 21 Gudi nu gifutshi giko ha mavu gifua athu aye enya Isalele ba? Aye Nzambi wa giamatshidia wahuluishile athu aye, watshitshile ndaga jiakoma nu jia gushimana mukunda nu gutumbuisa jina diaye, wakayele ifutshi gutuama dia athu aye anyi wahuluishile gu Ejipitu. 22 Wabuishile enya Isalele athu aye ivo nu ivo; Oo Yehowa, aye wabuile Nzambi wawo. 23 Henyaha Oo Yehowa, ndaga walayele muenya mudimo waye nu enya fami enji ilandule gukhala ngenyi mayilago, ngabuba tagenesa ndaga walayele. 24 Jina diaye dikhale mayilago,* ditumbuishiwe ivo nu ivo, hagula athu azuele egi: ‘Yehowa Nzambi wa masuta, Nzambi wa Isalele, udi Nzambi mukunda nu Isalele,’ fami ya muenya mudimo waye Davidi ijigamesewe gutuama diaye. 25 Handaga aye Nzambi wami wawambelele muenya mudimo waye matangi’aye egi, enya fami* yenji mbakhala muhingana gifua mafumu. Gishina giene ame muenya mudimo waye ngudi mutshita gisambu gigi nu gutshigina guagasue. 26 Oo Yehowa, udi Nzambi wa giamatshidia, walayele ndaga eji jiabonga mukunda nu muenya mudimo waye. 27 Ngabuba kuatesa fami ya muenya mudimo waye, alandule gukhala gutuama diaye ivo nu ivo; handaga washimbigile fami ya muenya mudimo waye, Oo Yehowa, mbaaheta ishimbigo mayilago.”