Mukanda wa Mbadi wa Gudilanduluila
1 Salomo mun’a Davidi wakhalele mubua nu ngolo jiavula mu ufumu wenji. Yehowa Nzambi wenji wakhalele nji n’enji, wamubuishile diago muthu wakoma.
2 Salomo watamegele enya Isalele agasue: mafumu a athu 1 000, nu mafumu a athu 100, nu manzuji, nu mafumu agasue a gu Isalele, yakotelesa egi mafumu a fami jia ash’awo. 3 Gungima Salomo nu athu agasue ayile ha fundo dia gukombelela* gu Gibeona, handaga guene guakhalele tenta ya gudibungishila ya Nzambi wa giamatshidia, inyi Moize muenya mudimo wa Yehowa walondele mu mavu a luselenga. 4 Uvi Davidi wakhalele wakatula gale Mushete wa Nzambi wa giamatshidia gu Kiriyate-Yalima, wakandugile nawo ha fundo dialondele muene mukunda nu Mushete wene. Wajigile tenta gu Yelusalema mukunda nu Mushete wene. 5 Giwotshielo gia kuivre gialondele Besalele mun’a Uri mujigulu wa Hule giahagewe gutuama dia tabernakle ya Yehowa; Salomo nu athu agasue* akhalele mukombelela gutuama dia giwotshielo giene.* 6 Salomo wasendesele guhana milambu guene gutuama dia Yehowa. Washiyile shitu 1 000, wahanele milambu ya guwotshia ha giwotshielo gia kuivre giakhalele gu tenta ya gudibungishila.
7 Mu phipha yene, Nzambi wamonegele gudi Salomo, wamuwambelele egi: “Ngulombe gima giagasue watshigina, ngudi guguhana nagio.” 8 Salomo wavutudile Nzambi egi: “Wamonesele sh’ami Davidi guzumba guavula gua giamatshidia, wangubuisa fumu ha fundo dienji. 9 Henyaha, Oo Yehowa Nzambi, luholo wangubuisa fumu wa athu awa avula adi gifua fuluguta dia mavu, tagenesa ndaga walayele sh’ami Davidi. 10 Nguhane gutema nu ndunge hagula ngutuameze athu awa,* handaga athu aye adi avula, nanyi wajiya guasophesa?”
11 Gungima Nzambi wawambelele Salomo egi: “Yene ndaga wangutoga nu mutshima waye wagasue. Wangutogelego umonyi nga ima iko nga lutumbu, wangutogelego nji egi mbalagaji jiaye jifue nga hagula ukhale nu monyo masugu avula. Uvi wangutoga gutema nu ndunge ha gusophesa athu ami anyi ngaguhagi fumu ha gutuameza. 12 Mbanguguhana gutema nu ndunge; uvi mbanguguhana nji umonyi nu ima iko nu lutumbu gubalega mafumu agasue anyi ahinyine gutuama diaye nu anyi mbaahinyina gungima diaye.”
13 Hene, Salomo wakatugile ha fundo dia gukombelela gu Gibeona gutuama dia tenta ya gudibungishila, wayile gu Yelusalema; wasendesele guhinyina Isalele. 14 Salomo walanduile guvudisa phusu-phusu nu tubalu.* Wakhalele nu phusu-phusu 1 400, nu tubalu* 12 000. Wahagele phusu-phusu jiene mu membo atungile muene mukunda nu phusu-phusu nu gu Yelusalema hehi nu fundo diakhalele muene. 15 Gu Yelusalema, fumu wavudishile utadi wa siliva nu wolo gifua maseso; mitshi ya sedre yabuile nji yavula gifua mitshi ya sikomole gu Shefela. 16 Tubalu tua fumu Salomo tuakhalele mukatuga gu Ejipitu. Enya mungenda a fumu akhalele musumba tubalu tuene tuavula* mu ndando yahagewe. 17 Ha gusumba phusu-phusu imoshi gu Ejipitu, akhalele muhana bashekele* 600 a utadi wa siliva, uvi mukunda nu gabalu gamoshi akhalele muhana bashekele 150 a utadi wa siliva. Gungima akhalele guyidigila mafumu agasue a enya Hete nu mafumu a gu Siliya.