Mukanda wa Mbadi wa Gudilanduluila

29 Ezekiase wabuile fumu hakhalele muene nu ivo 25, wahinyine ivo 29 gu Yelusalema. Jina dia gin’enji diakhalele Abiya mun’a Zakaliya. 2 Ezekiase wakhalele mukalagala ndaga jiabonga gu meso a Yehowa gifua muatshitshile khakh’enji Davidi. 3 Mu givo gia thomo gia uhinyinyi wenji, mu mbeji ya thomo, wakanguile mifulo ya inzo ya Yehowa, wayilondele. 4 Gungima watamegele nganga-nzambi nu enya Levi, waabungishile ha fundo diakhalele gu khanda ya mazogelo a kumbi. 5 Waawambelele egi: “Enue enya Levi, ngutegelelenu. Diphelegetesenu, phelegetesenu nji inzo ya Yehowa Nzambi wa akhakh’enu, katulenu ima ya usala ha fundo dia gijila. 6 Handaga ashi’etu akhalelego a gujinginyina gudi Yehowa Nzambi wetu, akalegele ndaga jiabola gu meso enji. Amutunyile, atele tabernakle ya Yehowa dikunda, amutele nji dikunda. 7 Akangele nji mifulo ya inzo ya Nzambi,* ajimine mienda. Abembele guwetshia uhafu nu guhana milambu ya guwotshia gudi Nzambi wa Isalele ha fundo dia gijila. 8 Hene Yehowa wavuidile enya Yuda nu enya gu Yelusalema khabu, waabatele malamba hagula athu adi guamona nu adi muvua ndaga yene, avue woma, adihule nu ambe gisugu* mukunda nu ene, gifua luholo mudi guyimona nu meso enu. 9 Gishina giene akhakh’etu ashiyiwe gu phogo ya khusa, an’etu a mala nu a akhetu nu akaji’etu abatewe mu uhiga. 10 Henyaha, ngudi mutshigina gukota gikotelo nu Yehowa Nzambi wa Isalele, hagula abembe gutuvuila khabu jiakola. 11 An’ami, didi dishigo tangua dia guhuluguga gu mudimo wenu, handaga Yehowa wamitombele ha gumagana gutuama dienji, ha gumutshitshila mudimo nu ha gukanduisa mishi ya milambu yenji.”

12 Hene enya Levi awa asendesele gutshita mudimo: Mukatshi dia ajigulu a Kehate, Mahate mun’a Amasayi nu Yowele mun’a Azariya; mukatshi dia ajigulu a Melali, Kishi mun’a Abedi nu Azariya mun’a Yehalele; mukatshi dia ajigulu a Geleshona, Yoa mun’a Zima nu Edene mun’a Yoa; 13 mukatshi dia ana a Elisafana, Shimeli nu Yewele; mukatshi dia ana a Asafe, Zakaliya nu Matania; 14 mukatshi dia ana a Hemane, Yehiele nu Shimeyi; mukatshi dia ana a Yedutuna, Shemaya nu Uziele. 15 Gungima adibungishile nu aphangi’awo a mala, adibuishile a gijila. Ajile gifua muawambelele fumu mu gudivua nu mbimbi ya Yehowa, ha guphelegetesa inzo ya Yehowa. 16 Gungima nganga-nzambi jianginyile mu inzo ya Yehowa ha guyiphelegetesa, azolele ima yagasue ya usala yakhalele mu tempelo ya Yehowa, ayimbile mu gibanzala gia inzo ya Yehowa. Gungima enya Levi azudile ima yene, ayile naye mu Baba dia Kidelona. 17 Asendesele mudimo wa guphelegetesa tempelo mu lusugu lua thomo lua mbeji ya thomo. Mu lusugu lua 8 lua mbeji yene, ahetele ha fundo dia gunginyila mu tempelo ya Yehowa. Aphelegetesele inzo ya Yehowa masugu 8, amanesele mudimo wene mu lusugu lua 16 lua mbeji ya thomo.

18 Gungima ayile gudi Fumu Ezekiase, amuwambelele egi: “Tuaphelegetesa gale inzo yagasue ya Yehowa, nu giwotshielo gia milambu ya guwotshia, nu ikadigilo yenji yagasue, nu mesa ana hagela mapha* nu ikadigilo yenji yagasue. 19 Tualondji ikadigilo yagasue inyi Fumu Ahaza wakatudile mu tempelo hakhalele muene fumu tangua dialumbugile muene Nzambi, tuayibuishi nji ya gijila, idi gutuama dia giwotshielo gia Yehowa.”

20 Fumu Ezekiase wazugile nu gimenegena giagasue, wabungishile mafumu a mu dimbo, akandugile gu inzo ya Yehowa. 21 Abatele ngombe jia milume 7 nu imeme ya milume 7, nu mitumba ya imeme ya milume 7 nu khombo jia milume 7 ha guhana mulambu mukunda nu gubola. Ahanele mulambu wene mukunda nu athu a mu inzo ya fumu, mukunda nu fundo dia gijila, nu mukunda nu enya Yuda. Ezekiase wawambelele nganga-nzambi, ajigulu a Alona ha guhana mulambu wene ha giwotshielo gia Yehowa. 22 Gungima ashiyile ngombe, nganga-nzambi jiazudile mahatshi enji jiaaniangele ha giwotshielo; gungima ashiyile imeme ya milume, amiangele mahatshi enji ha giwotshielo. Ashiyile nji mitumba ya imeme ya milume, amiangele mahatshi enji ha giwotshielo. 23 Gungima abatele khombo jia milume jia mulambu mukunda nu gubola gutuama dia fumu nu gutuama dia athu, ahagele mago holu dia khombo jiene. 24 Nganga-nzambi jiashiyile shitu jiene, ajihanele mulambu mukunda nu gubola, ambile mahatshi a shitu jiene holu dia giwotshielo hagula Nzambi atotesele enya Isalele agasue gubola guawo, handaga fumu wazuelele egi mulambu wa guwotshia nu mulambu mukunda nu gubola udi naye guhanewa mukunda nu enya Isalele agasue.

25 Mu tangua diene, Ezekiase wahagele enya Levi gu inzo ya Yehowa, akhalele nu sembale, nu ima ya gushigila miziki yana khala nu shinga, nu itare* gifua muazuelele Davidi nu Gade muthu wa fumu wakhalele mumona vizio nu profete Natana. Handaga Yehowa wahanele mukhuala wene mu njila ya baprofete enji. 26 Enya Levi akhalele ya gumagana nu ima ya gushigila miziki ya Davidi, uvi nganga-nzambi jiakhalele nu jiphungi.

27 Gungima Ezekiase wawambelele nganga-nzambi ha guhana mulambu wa guwotshia holu dia giwotshielo. Tangua asendesele guhana mulambu wa guwotshia, enya Levi asendesele guyimbila Yehowa lungimbo nu gushiga phungi. Phungi jiakhalele mulandula luholo luakhalele mushigiwa ima ya gushigila miziki ya Davidi fumu wa gu Isalele. 28 Athu agasue afugamele tangua enya Levi akhalele muyimba ngimbo nu gushiga phungi, alanduile gukalagala ndaga eji jiagasue uu nu tangua amanesele guhana mulambu wa guwotshia. 29 Tangua amanesele guhana mulambu, fumu nu athu agasue akhalele n’enji afugamele, ashiwugile phala mu mavu. 30 Fumu Ezekiase nu manene awambelele enya Levi ha gutumbuisa Yehowa nu ngimbo jia Davidi nu jia Asafe muthu wakhalele mumona vizio. Hene atumbuishile Nzambi nu gusuanguluga guavula, gungima afugamele ashiwugile phala mu mavu.

31 Gungima Ezekiase wazuelele egi: “Henyaha luholo muatombewa* ha gutshita mudimo mukunda nu Yehowa, izenu nu milambu ya guhana mersi nu milambu iko gu inzo ya Yehowa.” Hene athu agasue asendesele gubata milambu ya guhana mersi nu milambu iko. Athu agasue anyi mutshima wawo waatumile ha guhana, abatele milambu ya guwotshia. 32 Shitu athu abatele mukunda nu milambu ya guwotshia jiakhalele ngombe 70, imeme ya milume 100, mitumba ya imeme ya milume 200 (Ahanele shitu jiene jiagasue gifua mulambu wa guwotshia gudi Yehowa); 33 mukunda nu milambu ya gijila ngombe jiakhalele 600, nu imeme 3 000. 34 Uvi nganga-nzambi jiakhalelego jiavula ha gutanda ilema ya shitu jiagasue jia milambu ya guwotshia, hene aphangi’awo enya Levi a akuatesele uu nu tangua amanesele mudimo wene, a akuatesele nji uu nu tangua nganga-nzambi jiadibuishile ya gijila, handaga enya Levi adisagesele muavula* mu ndaga yatadila gudibuisa ya gijila gubalega nganga-nzambi. 35 Milambu ya guwotshia yakhalele yavula nu maji a shitu jia milambu ya guhuima, nu milambu ya matombe mukunda nu milambu ya guwotshia. Luene luholo asendesele luko gutshita* mudimo mu inzo ya Yehowa. 36 Hene Ezekiase nu athu agasue asuangulugile mukunda nu ndaga Nzambi wa giamatshidia wakalegele mukunda nu athu, handaga ndaga eji jiagasue jiakalegewe mu phushi.