Mukanda wa Mbadi wa Gudilanduluila
30 Ezekiase watumile mbimbi gudi enya Isalele agasue nu enya Yuda nu gudi enya giphuta gia Efrayime nu gia Manase. Waasonegele nji mikanda ha guza gu tempelo* ya Yehowa gu Yelusalema ha gukalagala Wano wa Pake mukunda nu Yehowa Nzambi wa Isalele. 2 Uvi fumu nu manene enji nu athu agasue* a gu Yelusalema azudile desizio dia gukalagala wano wa Pake mu mbeji ya mbadi. 3 Akhalelego nu luholo lua gukalagala wano wene mu tangua akhalele naye guwutshita, handaga nganga-nzambi jiavula jiakhalele khenji jidiphelegetesago,* athu nji akhalele khenji adibungisago gu Yelusalema. 4 Fumu nu athu agasue asuangulugile nu desizio diene. 5 Hene azudile desizio dia guya muwambela athu agasue a gu Isalele, sendese gu Belesheba uu nu gu Dane egi athu adi naye guza gu Yelusalema ha gukalagala Pake mukunda nu Yehowa Nzambi wa Isalele, handaga akalegelego wano wene hamoshi gifua luholo mukhuala wakhalele mutoga.
6 Gungima athu* ayile nu mikanda yaahanele fumu nu manene enji gu Isalele yagasue nu gu Yuda gifua muawambelele fumu. Azuelele egi: “Enya Isalele, vutugenu gudi Yehowa Nzambi wa Abalahama, wa Izake nu wa Isalele hagula muene avutuge gudi athu asalele nu monyo anyi ahulugile ha mago a mafumu a gu Asiliya. 7 Mukhadigo gifua akhakh’enu nu aphangi’enu anyi akhalelego ya gujinginyina gudi Yehowa Nzambi wa akhakh’awo, gishina giene Nzambi waabatele malamba hagula athu agasue adi guatala nu adi muvua ndaga yene, avue woma gifua luholo mudi guyimona. 8 Henyaha mukhadigo mito yakola gifua akhakh’enu. Dibulumuisenu gudi Yehowa, izenu ha fundo dienji dia gijila, diabuishile muene dia gijila mayilago; kalegelenu nji Yehowa Nzambi wenu hagula abembe gumivila khabu. 9 Handaga gula muavutuga gudi Yehowa, athu ayile nu aphangi’enu nu an’enu mu uhiga mbaavuila khenda, mbaabemba ha guvutuga mu gifutshi egi handaga Yehowa Nzambi wenu wana vila athu khenda jiavula; gula muavutuga gudi muene, mbagashigo gumita dikunda.”
10 Athu* ene ayile nu mikanda mu membo agasue a mu mavu a giphuta gia Efrayime nu gia Manase, ayile uu nu mu mavu a Zabulona. Uvi athu akhalele guasegulula nu gualela. 11 Uvi athu ako a mu giphuta gia Asele nu gia Manase nu gia Zabulona adibulumuishile, ajile gu Yelusalema. 12 Koko gua Nzambi wa giamatshidia guakuatesele nji enya Yuda hagula akhale hamoshi* ha gutumagela mukhuala wa fumu nu manene gifua muazuelele Yehowa.
13 Athu avula adibungishile gu Yelusalema ha gukalagala Wano wa Mapha Ashigo nu Levire mu mbeji ya mbadi; athu akhalele diago avula. 14 Azugile, akatudile iwotshielo yakhalele gu Yelusalema, akatudile nji iwotshielo yagasue ya uhafu, ayibishidile mu Baba dia Kidelona. 15 Gungima ashiyile shitu mu lusugu lua 14 lua mbeji ya mbadi mukunda nu mulambu wa Pake. Nganga-nzambi nu enya Levi avuile musonyi, hene adiphelegetesele. Gungima abatele milambu ya guwotshia gu inzo ya Yehowa. 16 Akhalele mu mafundo awo gifua muana zuela Mukhuala wa Moize, muthu wa Nzambi wa giamatshidia. Gungima nganga-nzambi jiakhalele muzula mahatshi gudi enya Levi, jiakhalele guamianga holu dia giwotshielo. 17 Athu avula mukatshi dia athu ene akhalelego ya gudiphelegetesa, enya Levi akhalele nu ginemo gia gushiya shitu mukunda nu guhana milambu ya Pake ya athu akhalelego aphelegeta ha guabuisa a gijila mukunda nu Yehowa. 18 Athu avula adiphelegeteselego uvi adile Pake, anemeselego ndaga idi ya gusonega mu mukhuala. Athu avula mukatshi diawo akhalele enya mu giphuta gia Efrayime nu gia Manase nu gia Isakale nu gia Zabulona. Uvi Ezekiase wakombelele Nzambi mukunda nu athu ene, wazuelele egi: “Yehowa, Nzambi wa gisemo, ngabuba, totesela 19 muthu wagasue wazudi desizio mu mutshima wenji* ha gukamba Yehowa Nzambi wa giamatshidia, Nzambi wa akhakh’enji, ikhale muthu muene gadiphelegeteselego gifua luholo luana toga mikhuala ya gudiphelegetesa.” 20 Yehowa wavuile gisambu gia Ezekiase, watotesele* athu gubola guawo.
21 Hene, enya Isalele anyi akhalele gu Yelusalema akalegele Wano wa Mapha Ashigo nu Levire masugu 7 nu gusuanguluga guavula. Enya Levi nu nganga-nzambi akhalele mutumbuisa Yehowa lusugu nu lusugu, akhalele mushiga ima yawo ya gushigila miziki mu dijui diakola mukunda nu Yehowa. 22 Ezekiase wahanele gikhesa gudi enya Levi agasue akhalele mukalegela Yehowa nu gutema. Athu agasue nu enya Levi adile mu masugu 7 a wano, ahanele milambu ya guhuima, ahanele nji Yehowa Nzambi wa akhakh’awo mersi.
23 Gungima athu azudile desizio dia gukalagala luko wano masugu 7, hene akalegele luko wano masugu 7 nu gusuanguluga. 24 Fumu Ezekiase wa gu Yuda wahanele ngombe jia milume 1 000 nu imeme 7 000 mukunda nu athu agasue, manene nji ahanele ngombe jia milume 1 000 nu imeme 10 000 mukunda nu athu agasue; nganga-nzambi jiavula jiadiphelegetesele. 25 Athu agasue a gu Yuda, nu nganga-nzambi, nu enya Levi nu athu agasue akatugile gu Isalele, nu ngenji jiakatugile mu gifutshi gia Isalele, nu enya gu Yuda akhalele nu gusuanguluga. 26 Athu akhalele diago nu gusuanguluga guavula gu Yelusalema, handaga sendese mu uhinyinyi wa Salomo mun’a Davidi, fumu wa gu Isalele, ndaga ya luholo elu khenji yakalegewego gu Yelusalema. 27 Gu suga, enya Levi anyi akhalele nganga-nzambi, azugile, akombelele Nzambi ha gushimbiga athu; Nzambi waategelele, gisambu giawo giayile uu nu mu dilu, ha fundo dia gijila diana khala muene.