Estere
8 Mu lusugu luene Fumu Aseluse wahanele inzo ya Amane yago wakhalele mbalagaji wa enya Yuda gudi Estere mukaji’a fumu; gungima Mordekayi wayile gutuama dia Fumu, handaga Estere wawambelele fumu egi Mordekayi wakhalele muenya fami yenji. 2 Gungima fumu wakatudile luphete* luenji lua gumbila kashe luatambudile muene Amane, waluhanele gudi Mordekayi. Estere wahanele Mordekayi ima yagasue ya Amane.
3 Estere watele luko maga nu fumu. Gungima wafugamele gutuama dienji, wadidile, wamububidile hagula ndaga yabola yalondele Amane muenya Agaga mukunda nu enya Yuda ikalegewago. 4 Fumu wasunuine muhango wa wolo gudi Estere, hene Estere wazugile, gungima wamaganele gutuama dia fumu. 5 Wazuelele egi: “Fumu, gula wasuanguluga nu ame, gula nji watshigina, uhane njila hagula mikanda isonegewe ha gukatula ndaga yabola yasonegele Amane mun’a Amedata mujigulu wa Agaga, ha gushiya enya Yuda mu provense jiagasue jia fumu. 6 Ngajiya diago gubemba egi malamba abuile athu ami ba? Luholo lutshi ngajiya gutala gushiyiwa gua enya fami yami?”
7 Hene Fumu Aseluse wawambelele mukaji’enji Estere nu Mordekayi muenya Yuda egi: “Tala! Ngahanele Estere ima yagasue ya Amane, ngashiyile nji Amane gu mutshi, handaga wayile giphungi ha gushiya* enya Yuda. 8 Henyaha muajiya gusonega mukanda mu jina dia fumu, sonegenu ndaga yagasue muamona egi yajiya gukuatesa enya Yuda. Imbenu nji kashe nu luphete lua fumu, handaga gula mukhuala wasonegewa mu jina dia fumu nu wambiwa kashe nu luphete luenji wajiyilego gukatudiwa.”
9 Mu tangua diene atamegele basekretere a fumu mu lusugu lua 23 mu mbeji ya thathu, yakotelesa egi mbeji ya Sivana.* Asonegele ndaga jiagasue jiazuelele Mordekayi mukunda nu enya Yuda nu atuameji a fumu, nu baguvernere, nu manene a mu baprovense. Asonegele ndaga jiene mu baprovense 127 sendese gu Inde uu nu gu Etiopi. Asonegele mu provense jiagasue, athu nu athu mu isona yawo* nu mu zuelelo diawo, asonegele nji enya Yuda mu isona yawo* nu mu zuelelo diawo.
10 Waawambelele ha gusonega mikanda mu jina dia Fumu Aseluse, gungima wambile kashe nu luphete lua fumu, wayitumile nu athu akhalele mubata mikanda ha tubalu. Anginyile holu dia tubalu tuakhalele muzula phushi jiabala, tunu akhalele mukalegela mu mudimo wa fumu. 11 Mu mikanda yene fumu wahanele njila gudi enya Yuda a mu membo agasue agudisha ha gudibungisa hagula alue ha guhuluisa mionyo yawo, ashiye nu amanesele nga masuta a athu a luholo lutshi nga a provense itshi anyi mbaaluisa nu akhetu nu ana, atambule nji ima yawo. 12 Akhalele naye gutshita ndaga jiene mu lusugu lumoshi mu provense jiagasue jia Fumu Aseluse, mu lusugu lua 13 lua mbeji ya 12, yakotelesa egi mbeji ya Adale.* 13 Ndaga jiakhalele mu mukanda* wene jiakhalele naye gubua mukhuala mu provense jiagasue. Akhalele naye gujiwambela athu agasue hagula enya Yuda akhale hehi mu lusugu luene ha guluisa mbalagaji jiawo. 14 Athu akhalele mubata mikanda ayile holu dia tubalu akhalele mukalegela mu mudimo wa fumu, ayile muphushi gifua luholo fumu waawambelele. Mukhuala wene wazolewe nji gu inzo ya fumu gu Suse.*
15 Mordekayi wakatugile gutuama dia fumu hakhalele muene ya gusudiga milele ya ufumu ya mukubu wa ble nu ilaphe, nu gipho* gia ufumu giakoma gia wolo nu mulele wabonga wabenguluga. Enya gu Suse ambile milolo ya gusuanguluga. 16 Handaga enya Yuda ahulugile, akhalele diago nu gusuanguluga guavula nu lutumbu. 17 Enya Yuda anyi akhalele mu provense jiagasue nu mu membo agasue nu mu mafundo agasue, ahetele mukanda wakhalele nu ndaga jiazuelele fumu nu mukhuala wambile muene. Akhalele diago musuanguluga nu akalegele mawano. Athu avula a mu ifutshi iko asendesele guzuela egi ene nji adi enya Yuda, handaga akhalele muvuila enya Yuda woma.