Mukanda wa Thomo wa Gudilanduluila
15 Davidi walanduile gutunga jinzo jienji mu Dimbo dia Davidi, walondele fundo mukunda nu mushete wa Nzambi wa giamatshidia, wajigile nji tenta mukunda nu mushete wene. 2 Mu tangua diene Davidi wazuelele egi: “Phamba enya Levi adi naye gubata mushete wa Nzambi wa giamatshidia uvi muthu muko ndo, handaga ene Yehowa watombele ha gubata mushete wa Yehowa nu gumukalegela mudimo tangua diagasue.” 3 Gungima, Davidi wabungishile enya Isalele agasue gu Yelusalema ha gubata mushete wa Yehowa ha fundo dialondele muene mukunda nu mushete wene.
4 Davidi wabungishile ajigulu a Alona nu enya Levi. 5 Mukatshi dia ajigulu a Kehate wazudile fumu Uliele nu athu 120 a mu fami yawo; 6 Mukatshi dia ajigulu a Melali, wazudile fumu Asaya nu athu 220 a mu fami yawo. 7 Mukatshi dia ajigulu a Gershome, wazudile fumu Yowele nu athu 130 a mu fami yawo. 8 Mukatshi dia ajigulu a Elisafana, wazudile fumu Shemaya nu athu 200 a mu fami yawo. 9 Mukatshi dia ajigulu a Hebrone, wazudile fumu Eliyele nu athu 80 a mu fami yawo. 10 Mukatshi dia ajigulu a Uziele, wazudile fumu Aminadaba nu athu 112 a mu fami yawo. 11 Davidi watamegele nji nganga-nzambi Zadoke nu Abiatare nu enya Levi awa: Uliele, Asaya, Yowele, Shemaya, Eliyele nu Aminadaba. 12 Waawambelele egi: “Mudi mafumu a fami jia giphuta gia Levi. Enue nu aphangi’enu a mala* diphelegetesenu, gungima batenu mushete wa Yehowa Nzambi wa Isalele ha fundo ngalondele mukunda nu mushete wene. 13 Mbala ya thomo, muabatelego mushete handaga tuakambelego luholo luabonga lua guwubata, hene Yehowa Nzambi wetu watuvidile khabu jiakola.” 14 Nganga-nzambi nu enya Levi adiphelegetesele ha gubata mushete wa Yehowa Nzambi wa Isalele.
15 Gungima enya Levi abatele mushete wa Nzambi wa giamatshidia ha phanga jiawo, nu mihitu* gifua luholo Yehowa wawambelele Moize ha guawambela. 16 Gungima Davidi wawambelele mafumu a enya Levi ha gutomba ngimba mukatshi dia aphangi’awo a mala ha guyimba ngimbo nu gusuanguluga guagasue, nu gushiga miziki nu ima ya gushigila miziki yana khala nu shinga nu itare* nu sembale.
17 Enya Levi atombele Hemane mun’a Yowele nu Asafe mun’a Belekiya mu giphuta giawo. Atombele nji Etane mun’a Kushaya mu fami ya Melali. 18 Akhalele nji nu aphangi’awo awa a mu hunji dia mbadi: Zakaliya, Bene, Yaziele, Shemilamota, Yehiele, Uni, Eliyabe, Benaya, Maseya, Matitia, Elifelehu nu Mikeneya. Akhalele nji nu abambi a mifulo awa: Obede-Edome nu Yeyele. 19 Ngimba Hemane nu Asafe nu Etane akhalele mushiga sembale jia kuivre. 20 Zakaliya nu Aziele, nu Shemilamota nu Yehiele, nu Uni nu Eliyabe, nu Maseya nu Benaya, akhalele mushiga ima ya gushigila miziki yana khala nu shinga mu Alemote.* 21 Matitia nu Elifelehu, nu Mikeneya nu Obede-Edome, nu Yeyele nu Azaziya, akhalele mushiga itare mu Sheminite* ha gutuameza ngimbo. 22 Kenaniya fumu wa enya Levi muene wakhalele mutuameza mudimo wa gubata mushete, handaga wakhalele mujiya gutshita mudimo wene muabonga. 23 Belekiya nu Elkana akhalele mubamba mushete. 24 Nganga-nzambi Shebaniya nu Yosafata nu Netanele nu Amasayi nu Zakaliya nu Benaya nu Eliezele akhalele mushiga phungi mu dijui diakola gutuama dia mushete wa Nzambi wa giamatshidia. Obede-Edome nu Yehiya akhalele nji mubamba mushete.
25 Gungima Davidi nu akulu a gu Isalele nu mafumu a athu 1 000 ayile muzangula mushete wa gikotelo wa Yehowa gumbo dia Obede-Edome, ayile nawo nu gusuanguluga guagasue. 26 Nzambi wa giamatshidia wakhalele mukuatesa enya Levi akhalele mubata mushete wa gikotelo wa Yehowa, hene azudile mitumba ya ngombe jia milume 7 nu mitumba ya imeme ya milume 7, ayihanele milambu gudi Nzambi. 27 Davidi wasudigile gazawu gashigo nu mago galondewe muabonga, enya Levi agasue anyi akhalele mubata mushete asudigile nji ngenyi, hamoshi nu ngimba nu Kenaniya fumu wa ngimba nu wa athu akhalele mubata mushete. Davidi wasudigile nji efode ya linene. 28 Enya Isalele agasue akhalele mubata mushete wa gikotelo wa Yehowa, akhalele mumba milolo ya gusuanguluga, akhalele nji mushiga mbinga nu phungi nu sembale, akhalele mushiga miziki mangololo nu ima ya gushigila miziki yana khala nu shinga nu itare.
29 Uvi tangua mushete wa gikotelo wa Yehowa wahetele mu Dimbo dia Davidi, Mikale mun’a Saula watalele ha fenetre, wamonele Fumu Davidi musomboga nu gukina, hene wasendesele gusegulula Davidi mu mutshima.