Gumonesa Gudi Yone
22 Muanjelo wangudijigile muta wa meya a monyo wakhalele muhenya gifua kristale, wakhalele muzoga gu nguasa ya ufumu ya Nzambi nu ya Mun’a Gimeme, 2 wakhalele mubulumuga ha katshi na katshi dia bala-bala diakoma dia dimbo. Sambua nu sambua dia muta wene diakhalele nu mitshi ya monyo yakhalele muhaga mabundu mbala 12 mu givo gimoshi, yakhalele muhaga mabundu ngonda* jiagasue. Mayiji a mitshi yene akhalele mukunda nu gusaga ifutshi.
3 Gutewa mikumbu mbagukhadigo guene. Uvi nguasa ya Nzambi nu ya Mun’a Gimeme mbayikhala mu dimbo, ahiga enji mbaamukalegela mudimo wa gijila; 4 mbaamona phala yenji, jina dienji mbadikhala dia gusonega ha mbombo jiawo. 5 Phipha mbayikhadigo luko, ene mbaakhadigo nu funu ya tshuya tua muenda nga ya muanya wa kumbi, handaga Yehowa Nzambi mbawudi guazolela muanya. Ene mbaahinyina gifua mafumu ivo nu ivo.
6 Wanguwambelele egi: “Mbimbi eji jidi naye gushiwa mutshima nu jidi jia giamatshidia; ayi, Yehowa, Nzambi wana zuela mu njila ya baprofete, watumile muanjelo wenji ha gudijiga ahiga enji ndaga jidi hehi ha gukalegewa. 7 Tegelela! Ngudi muza muphushi. Gusuanguluga gudi nu muthu udi mutumagela mbimbi jia profesi jidi mu rulo eyi.”
8 Ame Yone ngavile nu ngamonele ndaga eji. Tangua ngavile nu ngajimonele, ngafugamele gu ikanzo ya muanjelo wakhalele gungudijiga ndaga eji ha gumukombelela. 9 Uvi wanguwambelele egi: “Ndo! Utshitshigo ngenyi! Ame nji ngudi muhiga gifua aye, muhiga wa aphangi’aye anyi adi baprofete nu wa athu adi mutumagela mbimbi jia rulo eyi. Kombelela Nzambi.”
10 Muanjelo wanguwambelele luko egi: “Usuegigo mbimbi jia profesi ya rulo eyi, handaga tangua diatombewe diasuena hehi. 11 Muthu wabola alandule gutshita ndaga jiabola, muenya usala alandule gutshita ndaga jia usala; uvi muthu wabonga alandule gutshita ndaga jiabonga, muthu wa gijila alandule gukhala wa gijila.
12 “‘Tala! Ngudi muza muphushi, ngudi nu lufuto ha guhana muthu nu muthu gifua mudi makalegelo enji. 13 Ame ngudi Alfa nu Omega,* muthu wa thomo nu wa suga. Gisendeselo nu gisugishilo. 14 Gusuanguluga gudi nu athu adi muweva malopho awo hagula ahanewe njila ya guya gu mitshi ya monyo nu hagula angine mu dimbo ha mifulo yenji. 15 Hanze jimbua* jidi hene, nu athu ana kalagala midimo ya phipha, nu enya uthambi,* nu athu ana shiya athu, nu athu ana kombelela isongo, nu athu agasue ana zumba mambo, nu athu agasue adi nu khadilo dia gumba mambo.’
16 “‘Ame Yesu, ngatumile muanjelo wami ha gumidijiga ndaga eji mukunda nu mahungu. Ngudi muji nu mujigulu wa Davidi, ngudi nji themua yana henya mu gimenegena.’”
17 Nyuma nu mukhetu udi muzudiwa mu ulo adi mulandula guzuela egi: “Iza!” Muthu wagasue wavua, azuele egi: “Iza!” Muthu wagasue udi nu luhungu* aze; muthu wagasue watshigina, azule meya a monyo a githuhu.
18 “Ngudi muwambela muthu wagasue udi mutegelela mbimbi jia profesi jidi mu rulo eyi egi: Gula muthu walunda ndaga imoshi mukatshi dia ndaga eji, Nzambi mbawumulezela malamba adi a gusonega mu rulo eyi; 19 gula muthu wakatula ndaga imoshi mukatshi dia mbimbi jia rulo eyi ya profesi, Nzambi mbawukatula khapho dienji dia ndaga jidi jia gusonega mu rulo eyi. Muene mbagashigo gumuhana njila ya gudia mabundu a mitshi ya monyo nu mbagamubembigo egi angine mu dimbo dia gijila.
20 “Muthu udi mumonesa ndaga jiji udi muzuela egi: ‘Ayi, ngudi muza muphushi.’”
“Amen! Fumu Yesu, iza.”
21 Khenda jiavula jia Fumu Yesu jikhale nu athu a gijila.