Mikhuala
29 Eji mbimbi jia gikotelo Yehowa wawambelele Moize ha gukota nu enya Isalele mu mavu a Moaba, katula gikotelo giakotele muene nawo gu Horebe.
2 Gungima Moize wabungishile enya Isalele agasue, waawambelele egi: “Enue hakhenu muamonele gu Ejipitu ndaga jiagasue Yehowa wakalegele Farao nu enya mudimo enji agasue nu gifutshi gienji giagasue, 3 malamba akola* muamonele nu meso enu, ijiyishilo yakoma nu ndaga jia gushimana. 4 Uvi uu nu mangino, Yehowa khenji gamihanelego mutshima ha gukotelesa nu meso ha gumona nu matshui ha guvua. 5 ‘Tangua ngamituamezele ivo 40 mu mavu a luselenga, milele yenu yafuilego, saphata jienu nji jiafuilego gu malu enu. 6 Muadilego mapha, muanuilego nji vinyo nga matombe ako akola hagula mujiye egi ame ngudi Yehowa Nzambi wenu.’ 7 Gu gisugishilo muahetele ha fundo edi. Fumu Sihona wa gu Heshebona nu fumu Oga wa gu Bashana ajile gututagana ha gutuluisa, uvi tuaabingile. 8 Gungima tuatambudile gifutshi giawo, tuagihanele gifua khapho gudi enya giphuta gia Ribene nu gia Gade nu gitshinyi gia giphuta gia Manase. 9 Hene, nemesenu mbimbi jia gikotelo egi, jitumagelenu hagula ndaga jiagasue mudi mukalagala jiyile muabonga.
10 “Mangino mukut’enu agasue muamagana gutuama dia Yehowa Nzambi wenu: mafumu a iphuta yenu, akulu enu, atuameji enu, mala agasue a gu Isalele, 11 an’enu, akaji’enu nu ngenji jidi mu phundo yenu, sendese gudi muthu wana gumitshiayela khunyi uu nu gudi muthu wana gumithayela meya. 12 Muaji haha ha gudiloga ha gutshigina gikotelo gia Yehowa Nzambi wenu, ginyi Yehowa Nzambi wenu udi mukota n’enu mangino, 13 hagula mangino amibuise athu enji, muene nji abue Nzambi wenu gifua luholo luamilayele muene nu luadilogele muene gudi akhakh’enu Abalahama, Izake nu Yakoba.
14 “Gikotelo egi ngudi mukota n’enu ha ngudi gumitoga ha gudiloga, gishigo phamba mukunda nu enue, 15 uvi gidi nji mukunda nu athu adi a gumagana nu esue haha mangino gutuama dia Yehowa Nzambi wetu nu anyi ashigo nu esue haha mangino. 16 (Handaga mudi mujiya muabonga luholo tuakhalele gu Ejipitu nu luholo tuabalegele mukatshi dia ifutshi yavula tangua tuakhalele muwenda. 17 Muakhalele mumona ima yawo yabola nu isongo* yawo ya usala yalondewe nu mitshi nu maseso nu utadi wa siliva nu wolo, inyi yakhalele mukatshi diawo.) 18 Temienu hagula gukhadigo nga yala mumoshi nga mukhetu nga fami nga giphuta gimoshi mukatshi dienu mangino gidi mubemba Yehowa Nzambi wetu ha guya mukombelela nzambi jia ifutshi yene, hagula mukatshi dienu gukhadigo nu muji wa mutshi udi muzola mabundu adi nu puazo nga mutshi walula.
19 “Uvi gula muthu wavua mbimbi jia gikotelo egi uvi wazuela nu lulendo luagasue mu mutshima wenji egi: ‘Ame mbangukhala nu guhuima ikhale ngalandula gutshita ndaga yagasue ngatshigina,’ ha gubolesa ndaga yagasue mu njila yenji, 20 Yehowa mbagashigo mutshigina gutotesela muthu muene. Uvi Yehowa mbawumuvuila khabu jiabala, mikumbu yagasue idi ya gusonega mu mukanda owu mbayimukuata diago. Yehowa mbawutotesa diago jina dienji ha mavu. 21 Yehowa mbawumukatula mu iphuta yagasue ya gu Isalele ha gumumonesa lamba gifua mudi mikumbu yagasue ya gikotelo idi yagusonega mu mukanda owu wa Mikhuala.
22 “Mu masugu adi muza, tangua indongo ya an’enu nu ngenji mbajikatuga mu gifutshi gia gualeha mbaamona malamba nu misongo Yehowa mbawubata mu mavu ene— 23 sufre nu mungua nu tshuya hagula akunyigo mbuto mu mavu agasue nu mbuto jizogigo mu mavu ene, nga muangu uzogigo nji mu mavu ene gifua Sodoma nu Gomola, Adema nu Seboyime, membo Yehowa washiyile mu khabu jienji jiakola— 24 ene nu ifutshi yagasue mbaazuela egi: ‘Mukunda natshi Yehowa wakalagala ndaga ya luholo elu mu gifutshi egi? Itshi yamuhanyi khabu jiakola ngegi?’ 25 Gungima mbaazuela egi: ‘Idi handaga anemeselego gikotelo giakotele nawo Yehowa Nzambi wa akhakh’awo tangua diaazolele muene gu Ejipitu. 26 Ayile mukombelela nzambi jiko, ajifugamele, nzambi jinyi akhalelego mujiya, jinyi muene gaahanelego njila ha gukombelela. 27 Yehowa wavuidile gifutshi giene khabu jiakola, wagitumidile mikumbu eyi yagasue idi yagusonega mu mukanda owu. 28 Yehowa waavuidile khabu jiakola, waakatudile mu mavu awo, waatumile mu gifutshi giko, guene adi uu nu mangino.’
29 “Ndaga jidi jia gusuega jidi mukunda nu Yehowa Nzambi wetu, uvi ndaga jiamonesewa haphelo jidi mukunda nu esue nu an’etu mayilago hagula tutumagele mbimbi jiagasue jia Mukhuala owu.