Mukanda wa Matayo
14 Mu tangua diene, Helode, guvelenele wa gu Galilea, wavile lumene lua Yesu. 2 Wawambelele enya mudimo enji egi: “Muthu yowu udi Yone Mubatiji wafuzumuga gu gufua, gishina giene muene udi nu ngolo jia gukalagala ndaga eji jia gushimana.” 3 Helode* wakuatele Yone, wamujitshigile malenge nu wamumbile mu bologo mukunda nu Helodia, mukaji’a phangi’enji Filipho. 4 Handaga Yone wamuwambelele egi: “Mukhuala ushigo guguhana njila ya guzula mukhetu yowu.” 5 Helode wakhalele mutshigina gumushiya, uvi wakhalele muvua woma wa athu handaga ene akhalele muzuela egi Yone wakhalele profete. 6 Uvi mu lusugu lua wano wa guvalewa gua Helode, mun’a Helodia wa mukhetu wakinyine gu meso a athu atamegewe. Gukina guenji guasuanguluishile Helode muavula. 7 Hene Helode wadilogele egi mbawumuhana gima giagasue giatoga muene. 8 Gungima, gin’enji wamuwambelele ha guzuela egi: “Nguhane muto wa Yone Mubatiji ha longa edi.” 9 Ndaga yene yahanele fumu gikenene; uvi luholo wakhalele wadilogi gale gu meso a athu akhalele mudia* n’enji, wazuelele egi amuhane nawo. 10 Hene watumine muthu mu bologo ha gubatula Yone muto. 11 Ajile nu muto wa Yone ha longa, awuhanele gudi mon’a mukhetu. Mon’a mukhetu muene wayile nawo gudi gin’enji. 12 Alandudi a Yone ajile, azanguile kimbi gienji, ayile gugifunda. Gungima, ayile muwambela Yesu ndaga yene. 13 Havile Yesu ndaga yene, wakatugile ha fundo dinyi, wanginyine mu wato ha guya mukhala ha fundo diko hakhenji. Uvi tangua athu a mu membo avile egi Yesu wakatugile ha fundo dinyi, amulanduile ha malu.
14 Tangua diazogele Yesu mu wato, wamonele athu avula, waavidile khenda, wasagele athu akhalele mukata. 15 Uvi tangua ahetele mu ngueze, alandudi enji ajile gudi muene, amuwambelele egi: “Tudi gualeha nu dimbo, tangua nji diayi gale; bemba athu aye gawo hagula aye mu membo asumbe ima ya gudia.” 16 Uvi, Yesu waawambelele egi: “Ajiyilego guya ngenyi; enue hakhenu ahanenu ima ya gudia.” 17 Ene amuwambelele egi: “Tudi phamba nu mapha atano, nu jishui mbadi.” 18 Yesu wazuelele egi: “Ngubatelenu nawo.” 19 Yesu wawambelele athu ha gukhala hashi. Wazanguile mapha atano nu jishui mbadi, watalele mu dilu, wahanele Nzambi mersi. Gungima waabatuile, waahanele gudi alandudi enji, alandudi a ahanele gudi athu. 20 Mukut’awo agasue adile, akutshile. Gungima anonele itshinyi yasalele, yakhalele inda 12 yaguzala. 21 Athu adile akhalele hehi nu 5 000, uvi akhetu nu ana atangewego. 22 Nu dishimbu ndo, Yesu wawambelele alandudi enji ha gungina mu wato ha guya ha sambua diko dia muta. Hakhalele ene muya, Yesu wawambelele athu ha guvutuga gumbo diawo.
23 Tangua athu ayile, muene wakandugile hakhenji gu mulundu ha guya mukombelela. Uu nu mu phipha wakhalele guene hakhenji. 24 Wato wakhalele wayi gale gualeha* nu khulo ya kianga. Wakhalele mulua nu matshipha-tshipha a kianga handaga funji yakola yakhalele guavutula gungima. 25 Uvi hehi nu gimenegena mu makolombolo,* Yesu wajile gudi ene nu guwenda holu dia meya. 26 Tangua alandudi amumonele muwenda holu dia meya, avile woma, azuelele gamba: “Egi gimona-mona!” Akalugile handaga akhalele muvua woma. 27 Uvi mu tangua diene Yesu waawambelele egi: “Khalenu nu gikhesa! Muvigo woma; yowu ame.” 28 Phetelo wamuvutudile egi: “Fumu, gula idi aye, nguwambele nguwende holu dia meya nguze gudi aye.” 29 Yesu wamuwambelele egi: “Iza!” Hene Phetelo wazogele mu wato, wawendele holu dia meya ha guya gudi Yesu. 30 Uvi tangua diamonele muene funji yakola, wavile woma. Wasendesele gushiwuga mu meya, wakalugile egi: “Fumu, nguhuluise!” 31 Mu tangua diene, Yesu wasunuine koko dienji, wamukuatele nu wamuwambelele egi: “Aye muenya gutshigina guazonda, mukunda natshi udi muvua woma?” 32 Tangua anginyine mu wato, funji yahenele tedie. 33 Alandudi anyi akhalele mu wato, afugamele gu phala yenji. Azuelele egi: “Giamatshidia aye udi Mun’a Nzambi.” 34 Amanesele guzawuga kianga, ahetele gu Genesaleta.
35 Tangua athu a ha fundo dinyi amujiyile, atumine mbimbi mu membo agasue a gu khanda jinyi. Ngenyi athu ajile nu athu agasue akhalele mukata. 36 Amububidile egi a abembe akuate phamba songi ya mulele wenji wa holu. Hene athu agasue awukuatele avuile muabonga.