Mukanda wa Mbadi Gudi Enya gu Kolinto
1 Ame Phaula, mupostolo wa Klisto Yesu mu gutshigina gua Nzambi. Ngudi nu phangi’etu Timote, ngudi musonega mukanda owu gudi hungu dia Nzambi didi gu Kolinto, nu gudi athu agasue a gijila adi mu provense yagasue ya Akaya.
2 Tata Nzambi wetu nu Fumu Yesu Klisto amivile khenda jiavula, amihane nji guhuima.
3 Tumbuisenu Nzambi, Sh’a Fumi’etu Yesu Klisto, Tata wazala pha nu khenda, Nzambi wa ukuateshi wagasue, 4 wana gutukuatesa* mu malamba* etu agasue hagula esue nji tuajiya gukuatesa athu adi mutagana nu malamba* a luholo luagasue, mu ukuateshi tuahetele gudi muene. 5 Luholo tuana mona malamba avula mukunda nu Klisto, tuana heta nji ukuateshi wavula mu njila ya Klisto. 6 Gula tudi mutagana nu malamba,* tudi mutagana nawo hagula enue muhete ukuateshi nu muhuluishiwe. Gula tudi mukuatesewa nji idi hagula egi enue nji muhete ukuateshi. Ngenyi mbamuheta ngolo jia gukolesela mu malamba anyi esue nji tuana tagana nawo. 7 Tudi nu felela diakola mukunda nu enue, handaga tudi mujiya egi luholo mudi mumona malamba gifua esue, mbatuheta n’enu nji ukuateshi hamoshi.
8 Aphangi, tudi mutshigina egi mujiye malamba tuataganele nawo mu provense ya Azi. Tuataganele nu usageshi wakola, tuatangijilego gula tuajiya guwubinga mu ngolo jietu hakhetu. Hene tuavile woma mukunda nu mionyo yetu. 9 Yadiago, tuamonele egi mbatufua getu. Ndaga eyi yatukuatesele ha gujiya egi tushigo naye gudishila mutshima. Uvi tudi naye gusha mutshima gudi Nzambi wana fuzumuna athu a gufua. 10 Muene watuhuluishile gu lamba diakola dia gufua. Mbawutuhuluisa nji luko. Felela dietu gudi muene didi egi mbawulandula gutuhuluisa. 11 Enue nji muajiya gukombelela Nzambi mukunda nu esue ha gutukuatesa, handaga gula athu avula adi mukalagala gisambu mukunda nu esue, Nzambi mbawutegelela isambu yawo nu mbawutukuatesa. Ngenyi athu avula mbaamuhana mersi mukunda nu esue.
12 Ndaga jiana gututuma ha gudihala jienyeji: Mitshima yetu idi mumonesa egi tuawendele mukatshi dia athu a ha mavu nu mukatshi dienu gifua athu a gijila, nu mu giamatshidia gidi mukatuga gudi Nzambi. Tuadiwendeselego mu ndunge jia ha mavu awa, uvi tuadiwendesele mu khenda jiavula jia Nzambi. 13 Handaga tudi gumisonegela phamba ndaga jidi jialeba ha gutanga* nu ha gukotelesa. Ngudi gudifelela egi mbamukotelesa ndaga jiene muabonga diago.* 14 Athu ako mukatshi dienu akotelesa gale egi mudi nu ndaga jidi gumituma ha gudihala mukunda nu esue. Mu lusugu lua Fumi’etu Yesu, esue nji mbatudihala mukunda nu enue.
15 Luholo ngakhalele nu gutshigina mu ndaga eji, ngatangijile egi nguze thomo gumbo dienu hagula muajiya guheta luko luendu lua gusuanguluga.* 16 Ngatangijile egi tangua ngudi muya gu Maseduane, ngubalegele gumbo dienu ha gumitala. Gula ngakatuga gu Maseduane ha guvutuga, ngubalegele luko gumbo dienu, gungima muajiya guya gungutuala mu njila ha guya gu Yudea. 17 Tangua ngatangijile gutshita ngenyi, ngalabele guzuela ba? Nga ndo, ngana tshigina gutshita ima nu matangi a athu hagula nguzuedi egi “Ayi, ngatshigina” gungima nguzuedi luko egi “Ndo, ngatunyi”? 18 Shenu mutshima gudi Nzambi egi ndaga tudi gumiwambela jidi jia giamatshidia, handaga tuanago guzuela thomo egi “ayi” gungima tuzuedi luko egi “ndo.” 19 Yesu Klisto Mun’a Nzambi yago ame nu Silvanuse* nu Timote tualongesele mukatshi dienu, gabuilego “ayi” gungima wabua “ndo.” Uvi mukunda nu muene, “ayi” yabuile “ayi.” 20 Ndaga jiagasue jialayile Nzambi, ikhale jidi jiavula luholo lutshi, jiana “gutagenesewa”* mu njila ya Yesu. Luko mu njila yenji, tuana guwambela Nzambi egi “Amen” hagula tumutumbuise. 21 Uvi muthu wana gututshiginyisa egi esue nu enue tudi athu a Klisto udi Nzambi. Muene nji watumbile maji mu nyuma. 22 Watuhagele nji njimbu yenji, watuhuile nyuma yenji mu mitshima yetu gifua gikudilo gia ndaga mbajiza.*
23 Henyaha ngudi gudiloga gu meso a Nzambi egi gula khenji nguza gale ndo gu Kolinto, idi handaga ngushigo mutshigina egi muvue gikenene. 24 Esue tushigo muhinyina gutshigina guenu. Uvi tudi mafut’enu a mudimo mukunda nu gusuanguluga guenu, handaga gutshigina guenu guene guana gumikuatesa ha gukhala agumagana.