Mukanda wa Thomo wa Gudilanduluila
29 Fumu Davidi wawambelele enya Isalele agasue egi: “Mun’ami Salomo, munu Nzambi watombi ha gutshita mudimo wenji, udi muvuala, gashigo nji mujiya ndaga jiavula.* Uvi mudimo udi wakoma, handaga tempelo* eyi ishigo mukunda nu muthu uvi idi mukunda nu Yehowa Nzambi. 2 Ngakalagala ngolo jiavula ha gulondega ima mukunda nu inzo ya Nzambi wami. Ngakungiga wolo mukunda nu ima yana londewa nu wolo, nu utadi wa siliva mukunda nu ima yana londewa nu utadi wa siliva, nu kuivre mukunda nu ima yana londewa nu kuivre, nu utadi mukunda nu ima yana londewa nu utadi, nu mabaya mukunda nu ima yana londewa nu mabaya, nu maseso a onikise nu maseso ana kuatenesewa nu mortie* nu tumaseso tuamikubu tuagusembegela nu maseso a ndando a maluholo agasue nu maseso a alabasita avula diago. 3 Guzumba guami mukunda nu inzo ya Nzambi wami guangutumi nji ha guzula wolo nu utadi wa siliva mukatshi dia umonyi wami ha guwuhana mukunda nu inzo ya Nzambi wami, ngalezela nji ima yene holu dia ima yagasue ngakungigile mukunda nu inzo ya gijila. 4 Ima ngahana yenyeyi: batalanta* 3 000 a wolo wa gu Ofile, nu batalanta 7 000 a utadi wa siliva wabonga ha gutshuiga ibayi ya sugu jia gudisha,* 5 nu wolo mukunda nu ima yana londewa nu wolo, nu utadi wa siliva mukunda nu ima yana londewa nu utadi wa siliva nu mukunda nu midimo yagasue mbembo jidi naye gukalagala. Henyaha nanyi mukatshi dienu watshigina guza nu kado ha guhana Yehowa mangino?”
6 Hene, mafumu a fami jia enya Isalele nu mafumu a iphuta ya Isalele nu mafumu a athu 1 000 nu mafumu a athu 100 nu mafumu akhalele mutadila midimo ya fumu, atshiginyile nu mutshima umoshi. 7 Ahanele ima eyi mukunda nu inzo ya Nzambi wa giamatshidia: batalanta a wolo 5 000, badariki* 10 000, batalanta a utadi wa siliva 10 000, batalanta a kuivre 18 000 nu batalanta a utadi 100 000. 8 Muthu wagasue wakhalele nu maseso a ndando waahanele hagula a abambe gu sugu akhalele mubambela umonyi mu inzo ya Yehowa. Yehiele mujigulu wa Geleshona muene wakhalele mubamba ima yene. 9 Athu akhalele nu gusuanguluga ha guhana milambu mu gutshigina guawo, handaga ahanele Yehowa milambu mu gutshigina guawo nu mutshima umoshi; fumu Davidi wakhalele nji nu gusuanguluga guavula.
10 Gungima, Davidi watumbuishile Yehowa gutuama dia hungu diagasue. Wazuelele egi: “Oo Yehowa Nzambi wa Isalele, tata wetu, tumbuishiwa ivo nu ivo. 11 Oo Yehowa, udi Nzambi wakoma, udi Nzambi wa ngolo jiagasue. Ima yagasue yabonga idi yaye, udi Nzambi wa lutumbu nu wa ginemua handaga ima yagasue idi mu dilu nu ha mavu idi yaye. Oo Yehowa, ufumu nji udi waye. Aye udi Fumu holu dia ima yagasue. 12 Umonyi nu lutumbu yana katuga gudi aye, aye wana hinyina ima yagasue. Ngolo jiana khala ha koko diaye, koko diaye diajiya nji gukomesa muthu wagasue nu guhana ngolo gudi athu agasue. 13 Henyaha Oo Nzambi wetu, tudi guguhana mersi, tudi nji mutumbuisa jina diaye diabonga.
14 “Ame ngudi nanyi? Athu ami adi akuatshi hagula tuajiya guguhana misomo ya luholo elu nu mutshima umoshi? Handaga ima yagasue yana katuga gudi aye; ima tuaguhanyi, aye watuhanyi nayo. 15 Gutuama diaye tudi gifua ngenji, tudi nji gifua athu adi mubalega gifua muakhalele akhakh’etu agasue. Handaga masugu etu ha mavu adi gifua givule-vule, tushigo nu felela. 16 Oo Yehowa Nzambi wetu, umonyi owu wagasue tualondega ha gugutungila inzo mukunda nu jina diaye dia gijila wakatuga gudi aye, umonyi wene wagasue udi waye. 17 Oo Nzambi wami, ngudi mujiya muabonga egi wana tala muabonga mitshima ya athu, wana suanguluga nu athu adi agujinginyina* gudi aye. Ngaguhana ima eyi yagasue nu mutshima umoshi,* ngudi nu gusuanguluga ha gumona athu aye adi haha guguhana misomo mu gutshigina guawo. 18 Oo Yehowa Nzambi wa akhakh’etu Abalahama, Izake nu Isalele, kuatesa athu awa hagula alandule gukhala nu matangi awa a gudihana nu a gukalegele nu mutshima umoshi. 19 Kuatesa mun’ami Salomo hagula atumagele* mikhuala yaye nu malongo aye nu mutshima wenji wagasue, atshite nji ndaga eji jiagasue, atunge tempelo* nu ima eyi ngakungiga.”
20 Gungima Davidi wawambelele hungu diagasue egi: “Tumbuisenu Yehowa Nzambi wenu.” Hene, hungu diagasue diatumbuishile Yehowa Nzambi wa akhakh’awo. Athu ashiwugile, afugamele gutuama dia Yehowa nu gutuama dia fumu. 21 Mu lusugu luene nu lusugu lualanduile, ahanele milambu gudi Yehowa. Ahanele nji milambu ya guwotshia gudi Yehowa: mitumba ya ngombe jia milume 1 000, imeme ya milume 1 000, mitumba ya imeme ya milume 1 000 nu milambu ya matombe. Ahanele milambu yavula diago mukunda nu enya Isalele agasue. 22 Mu lusugu luene, akhalele mudia nu gunua gutuama dia Yehowa nu gusuanguluga guavula. Ahagele nji Salomo mun’a Davidi fumu mu mbala ya mbadi, amumbile maji gutuama dia Yehowa hagula akhale mutuameji; abuishile nji Zadoke nganga-nzambi. 23 Gungima Salomo wakhalele ha nguasa ya ufumu ya Yehowa ha fundo dia sh’enji Davidi. Ndaga jiakhalele muyila muabonga mu ufumu wenji, enya Isalele agasue akhalele nji gumutumagela. 24 Mafumu agasue nu masuta a ngolo nu ana agasue a Fumu Davidi atshiginyile utuameji wa fumu Salomo. 25 Yehowa wabuishile Salomo muthu wakoma diago gu meso a enya Isalele agasue, wamuhanele nji ginemua giavula mu ufumu wenji gubalega mafumu agasue a gu Isalele ahinyine gutuama dienji.
26 Luene luholo Davidi mun’a Yese wahinyine Isalele yagasue. 27 Wahinyine Isalele ivo 40. Gu Hebrone wahinyine ivo 7, uvi gu Yelusalema ivo 33. 28 Davidi wabuile diago muthu wa gukola, wajingile ivo yavula nu gusuanguluga, wakhalele nu umonyi nu lutumbu; gungima wafuile. Mun’enji Salomo wabuile fumu ha fundo dienji. 29 Lumene lua Fumu Davidi, sendese gu gisendeselo uu nu gu suga, ludi lua gusonega mu mikanda yasonegele Samuele, muthu wakhalele mudianga gumona ndaga mbajibua nu profete Natana nu Gade muthu wakhalele mumona vizio. 30 Mu mikanda yene adi nji muzuelela ufumu wenji wagasue nu ngolo jienji nu ndaga jiakalegewe mu tangua diene mukunda nu muene nu Isalele nu ma ufumu agasue akhalele hehi.