Mukanda wa Yone
17 Hazuelele Yesu ndaga eji, watalele meso gosa mu dilu, wazuelele egi: “Tata, tangua diatagana. Tumbuisa mun’aye hagula mun’aye nji agutumbuise, 2 gifua luholo wamuhanele ufumu holu dia athu agasue, hagula muene ahane monyo wa ivo nu ivo gudi athu agasue anyi wamuhanele. 3 Ha guheta monyo wa ivo nu ivo, adi naye gugujiya aye, Nzambi mumoshi wa giamatshidia, nu Yesu Klisto munu watumine aye. 4 Ngagutumbuisa ha mavu, ngamanesela mudimo wanguhanele ha gukalagala. 5 Tata, henyaha ngutumbuise gu khanda yaye nu lutumbu ngakhalele nalo hehi nu aye gutuama egi mavu afugiwe.
6 “Ngajiyishile jina diaye gudi athu wanguhanele ha mavu. Ene akhalele athu aye, uvi wanguhanele nawo; atumagele mbimbi yaye. 7 Henyaha adi mujiya egi, ima yagasue wanguhanele, yakatugile gudi aye. 8 Handaga ngaahanyi mbimbi jinyi wanguhanele, ene ajitshigina, nu akotelesa diago egi ngajile gifua mumoneshi waye, atshigina diago egi aye wangutumine. 9 Ngudi gugutoga mukunda nu ene; ngushigo gugutoga mukunda nu athu a ha mavu, uvi mukunda nu athu anyi wanguhanele handaga ene adi athu aye; 10 Ima yagasue ngudi nayo idi yaye; ima yagasue aye udi nayo, idi yami. Ngatumbuishiwe nji mukatshi diawo.
11 “Ame ngushigo luko ha mavu awa, uvi ene adi ha mavu awa. Ngudi muza gudi aye. Tata wa gijila, abambe mukunda nu jina diaye dinyi wanguhanele, hagula akhale muthu mumoshi* gifua luholo aye nu ame tudi muthu mumoshi.* 12 Tangua ngakhalele nawo, ngakhalele guaabamba mukunda nu jina diaye dinyi wanguhanele. Ngaabambele, nga mumoshi mukatshi diawo gafuilego phamba mona wakhalele naye gufua, hagula ndaga jiazuelele mukanda wa Nzambi jitagenesewe. 13 Uvi henyaha ame ngudi muza gudi aye. Ngudi muzuela ndaga eji ha mavu, hagula ene akhale nu gusuanguluga guami guavula. 14 Ngaahanele mbimbi yaye; uvi athu a ha mavu awa adi nawo umbalagaji, handaga ene ashigo athu a ha mavu awa, gifua luholo ame ngushigo muthu wa ha mavu awa.
15 “Ngushigo gugutoga ha guakatula ha mavu awa; uvi ngudi gugutoga egi wabambe mukunda nu muthu wabola. 16 Ene ashigo athu a ha mavu awa, gifua luholo ame ngushigo muthu wa ha mavu awa. 17 Abuise a gijila* mu njila ya giamatshidia; mbimbi yaye idi giamatshidia. 18 Luholo aye wangutumine ha mavu, ame nji ngaatumine ha mavu. 19 Ngudi gudibuisa wagijila mukunda nu ene, hagula ene nji akhale a gijila mu njila ya giamatshidia.
20 “Ngushigo gugutoga phamba mukunda nu ene; uvi ngudi gugutoga nji mukunda nu athu agasue mbaasha gutshigina gudi eme tangua mbavua malongo awo, 21 hagula egi mukut’awo agasue akhale muthu mumoshi, gifua luholo eye Tata nu eme tuana gudivua muabonga, hagula ene nji akhale gudivua muabonga nu esue. Ngenyi athu agasue a ha mavu atshigine egi eye wangutumine. 22 Ngaahanele lutumbu lunu wanguhanele, hagula ene akhale muthu mumoshi gifua luholo eye nu eme tudi muthu mumoshi. 23 Ame nu ene tuana gudivua muabonga; aye nu ame tuana gudivua nji muabonga, hagula ene akhale nu gudivua guatagana mukatshi diawo. Ngenyi athu a ha mavu ajiye egi eye wangutumine nu wana guazumba gifua luholo wana gunguzumba. 24 Tata, ngudi mutshigina egi athu anyi wanguhanele akhale nu ame fundo ngudi, hagula amone lutumbu luami lunu wanguhanele, handaga aye wanguzumbile gutuama egi mavu afugiwe. 25 Tata wabonga, giamatshidia, athu a ha mavu awa anago gugujiya, uvi ame ngagujiya. Athu awa adi mujiya luko egi eye wangutumine. 26 Ngaajiyishile jina diaye, mbangudijiyisa luko, hagula guzumba guwanguzumbile gukhale mukatshi diawo, hagula ame nu ene tukhale nu gudivua guabonga.”