Manzuji
13 Enya Isalele akalegele luko Yehowa gubola, hene Yehowa wabembele egi enya Filistiya a amonese lamba ivo 40.
2 Mu tangua diene, guakhalele nu yala mumoshi mu dimbo dia Sola, jina dienji Manowa muenya giphuta gia Dane. Mukaji’enji wakhalele gikunya,* gakhalelego nu ana. 3 Lusugu lumoshi, muanjelo wa Yehowa wamonegele gudi mukhetu muene, wamuwambelele egi: “Aye udi gikunya, ushigo nu ana. Uvi mbawumita, mbawuvuala mona wa yala. 4 Tema gaye, unuigo vinyo nga matombe ako akola, udigo nji nga gima gimoshi gia usala. 5 Mbawumita vumo, mbawuvuala mona wa yala, luzualu* lushigo naye gungina mu muto wenji handaga muene mbawukhala Nazileya wa Nzambi sendese mbahavualewa muene.* Muene mbawuhuluisa enya Isalele ha mago a enya Filistiya.”
6 Gungima mukhetu muene wayile muwambela mulumi’enji egi: “Muthu mumoshi wa Nzambi wa giamatshidia waji gudi ame, wakhadi mumonega gifua muanjelo wa Nzambi wa giamatshidia, wanguhanyi diago woma. Ngamuhudilego gula wakatuga gui, muene nji ganguwambelelego jina dienji. 7 Uvi wanguwambela egi: ‘Tala! Mbawumita, mbawuvuala mona wa yala. Unuigo vinyo nga matombe ako akola, udigo nji nga gima gimoshi gia usala, handaga mona muene mbawukhala Nazileya wa Nzambi sendese lusugu mbaluvualewa muene,* uu nu lusugu lua gufua guenji.’”
8 Manowa wabubidile Yehowa egi: “Ngabuba Yehowa; muthu wa Nzambi wa giamatshidia munu watumi, avutuge luko atulongese luholo lua gusansa mona mbawuvualewa.” 9 Nzambi wa giamatshidia wavuile ndaga jiamuwambelele Manowa, muanjelo wa Nzambi wa giamatshidia wajile luko gudi mukhetu muene hakhalele muene hashi mu temu; mulumi’enji Manowa gakhalelego hene. 10 Mukhetu wayile phushi gudi mulumi’enji wamuwambelele egi: “Tala! Yala munu wajile lusugu lunu waza luko.”
11 Manowa wazugile, wayile nu mukaji’enji gudi muthu muene. Wamuhudile egi: “Aye watele maga nu mukaji’ami?” Muthu muene wazuelele egi: “Ayi eme.” 12 Manowa wazuelele egi: “Mbimbi jiaye jitagenesewe! Luholo lutshi mbatusansa mona muene? Mudimo utshi mona muene mbawukalagala?” 13 Muanjelo wa Yehowa wawambelele Manowa egi: “Mukaji’aye gashigo naye gudia ima yagasue ngamuwambelele. 14 Gashigo naye gudia gima giagasue gialondewa nu vinyo, gashigo naye gunua vinyo nga matombe ako akola, gashigo naye nji gudia nga gima gimoshi gia usala. Atumagele ndaga jiagasue ngamuwambelele.”
15 Manowa wawambelele muanjelo wa Yehowa egi: “Tuabuba uyigo, tugutelegele mutumba wa khombo.” 16 Uvi muanjelo wa Yehowa wawambelele Manowa egi: “Ikhale ngasala haha, ngushigo mudia ima yenu; uvi gula watshigina guyihana gifua mulambu wa guwotshia gudi Yehowa, wajiya guyihana.” Manowa gakhalelego mujiya egi muthu muene wakhalele muanjelo wa Yehowa. 17 Gungima Manowa wawambelele muanjelo wa Yehowa egi: “Tuwambele jina diaye hagula mbatugutumbuise tangua mbimbi jiaye mbajitagenesewa.” 18 Uvi muanjelo wa Yehowa wamuwambelele egi: “Jina diami didi jina dia gushimana, mukunda natshi udi mutshigina gudijiya?”
19 Gungima Manowa wazudile mutumba wa khombo nu mulambu wa mbuto, wawuwotshiele holu dia seso gutuama dia Yehowa. Nzambi watshitshile ndaga imoshi ya gushimana tangua Manowa nu mukaji’enji akhalele mutala. 20 Tangua tshuya tuakhalele muzoga ha giwotshielo mukanduga, muanjelo wa Yehowa wakandugile ha tshuya tuene tuakhalele muzoga ha giwotshielo, Manowa nu mukaji’enji akhalele mutala. Mu tangua diene, abuile phala mu mavu. 21 Muanjelo wa Yehowa gamonegelego luko gudi Manowa nu mukaji’enji. Hene Manowa wakotelesele egi muthu muene wakhalele muanjelo wa Yehowa. 22 Manowa wawambelele mukaji’enji egi: “Yadiago tudi mufua getu, handaga tuamona Nzambi.” 23 Uvi mukaji’enji wamuwambelele egi: “Gula nga Yehowa watshigina gutushiya, nga gatshiginyilego mulambu wa guwotshia nu mulambu wa mbuto tuamuhanyi, gakhalelego naye gutumonesa ndaga eji jiagasue nga gutuwambela najio.”
24 Gungima mukhetu muene wavualele mona wa yala, wamuhanele jina egi Samsona; hakhalele mona muene mukula, Yehowa wakhalele gumukuatesa. 25 Nyuma ya Yehowa yajile gudi muene gu Mahane-Dane, hakatshi dia dimbo dia Sola nu dia Eshetaole.