Makalegelo a Apostolo
1 Teofile, mu mukanda wami wa thomo, ngasonegele lumene lua ndaga jiagasue jiakalegele Yesu nu jialongesele muene sendese gu gisendeselo 2 uu nu lusugu luakanduishiwe muene mu dilu, hamanesele muene guhana malongo mu njila ya nyuma ya Nzambi gudi apostolo atombele muene. 3 Gungima dia gumona lamba, wadimonesele gudi ene mbala jiavula ha guamonesa egi wakhalele nu monyo. Amumonele masugu 40, wakhalele muzuelela Ufumu wa Nzambi. 4 Hadibungishile nawo, waawambelele egi: “Mukatugago gu Yelusalema, uvi landulenu gunengena ndaga yamilayele Tata, yinyi ngamiwambelele; 5 handaga Yone wabatijile athu nu meya, uvi guasala masugu azonda enue mbamubatijiwa nu nyuma ya Nzambi.”
6 Tangua adibungishile, amuhudile egi: “Fumu, udi muvutula ufumu wa Isalele tangua edi ba?” 7 Muene waalezele egi: “Ushigo mulonga wenu ha gujiya tangua nu sungi yahagele Tata mu uhinyinyi* wenji. 8 Uvi mbamuheta ngolo tangua nyuma ya Nzambi mbayimijila, enue mbamukhala matemue ami gu Yelusalema nu gu Yudea yagasue nu gu Samaliya, uu nu mu mafundo a gualeha* a ha mavu.” 9 Hamanesele muene guzuela ndaga eji nu hakhalele ene mutala, wakanduishiwe mu dilu; gungima tuta dimoshi diamutshuigile hagula ene amumonyigo. 10 Hakhalele muene mukanduga mu dilu, ene akhalele gumutala. Nu dishimbu ndo, athu mbadi akhalele agusudiga milele ilaphe amaganele hehi nu ene, 11 azuelele egi: “Enue mala a gu Galilea, mukunda natshi muamagana haha ha gutala mu dilu? Yesu yowu wakatudiwe mukatshi dienu ha guya mu dilu mbawuvutuga luholo lumoshi gifua muamumonyi mukanduga mu dilu.”
12 Gungima akatugile gu mulundu wana tamegewa egi Mulundu wa Mitshi ya Olive, avutugile gu Yelusalema. Mulundu wene udi hehi nu Yelusalema ha mutango wa kilometre imoshi.* 13 Hahetele ene, anginyile gu sugu ya gosa, ayile mukhala guene. Akhalele Phetelo nu Yone nu Yakoba nu Andele nu Filipho nu Toma nu Baletelemi nu Matayo nu Yakoba mun’a Alafayo nu Simona muenya gikhesa nu Yudasa mun’a Yakoba. 14 Luholo akhalele felela dimoshi, mukut’awo agasue akolesele mu gisambu, akhalele nji nu akhetu ako nu Madiya gin’a Yesu nu aphangi’enji a mala.
15 Mu masugu ene, Phetelo wazugile mukatshi dia aphangi (athu agasue akhalele 120), wazuelele egi: 16 “Mala, aphangi, yakhalele nu ndando egi ndaga jiazuelele mukanda wa Nzambi, jinyi jiasonegele Davidi mu njila ya nyuma ya Nzambi mukunda nu Yudasa yonu wabuile mutuameji wa athu ayile mukuata Yesu jitagane. 17 Handaga Yudasa watangewe mukatshi dietu, watombewe nji ha gutshita mudimo owu. 18 (Muthu yowu wasumbile dihia nu mbongo jia gubola, wabuile muto hashi, malu gosa; watawugile hakatshi,* mala enji agasue amuanganele. 19 Athu agasue a gu Yelusalema ajiyile ndaga eyi, hene ana tamega dihia diene mu zuelelo diawo egi Hakeledama, yakotelesa egi: “Dihia dia Mahatshi.”) 20 Ndaga eyi idi ya gusonega mu mukanda wa Ngimbo egi: ‘Inzo yenji ibembewe ya githuhu, muthu muko gakhadigo muene’ nu ‘Muthu muko akalagale mudimo wenji.’ 21 Idi nu ndando ha guhinganesa muthu mumoshi mukatshi dia athu akhalele gutulandula tangua diagasue, hakhalele Fumu Yesu mukalagala midimo yenji* mukatshi dietu, 22 sendese habatijiwe muene gudi Yone uu nu lusugu luakandugile muene mu dilu. Muthu muene udi naye gulongesa gufuzumuga gua Yesu hamoshi nu esue.”
23 Ahanele majina a athu mbadi, Yozefe wana tamegewa egi Balesaba, jina dienji diko Yustuse; nu Matiasi. 24 Gungima akalegele gisambu egi: “O Yehowa, aye wana jiya mitshima ya athu agasue, tuwambele, mukatshi dia athu awa mbadi nanyi watombi 25 ha guzula fundo edi dia mudimo wa gulongesa nu dia gukhala mupostolo, dinyi diabembele Yudasa ha guya mu njila yenji hakhenji.” 26 Hene atele mubela, mubela watombele Matiasi, amulundjile* gudi apostolo ako 11.