Gudi Enya Hebelu
2 Gishina giene, idi nu ndando egi tulandule muabonga diago ndaga tuavile, hagula tujimbilago njila nga hazonda. 2 Gula mbimbi jiazuelewe mu njila ya anjelo jiakhalele jia giamatshidia, nu gula muthu wagasue wakalegele gubola nu muthu gashigo mutumaga wahetele ndola mu luholo luatagana, 3 na luholo lutshi tuajiya gulenga ndola gula tushigo muzula guhuluishiwa guakoma nu ndando? Handaga Fumu wetu wadiangele guzuelela ndaga yatadila guhuluga guene, gungima athu anyi amuvile atutshiginyishile naye. 4 Nzambi nji watshiginyishile ndaga eyi mu njila ya ijiyishilo nu ndaga jia gushimana jia luholo nu luholo nu mu njila ya nyuma yenji yahanele muene athu gifua muakhalele gutshigina guenji.
5 Handaga Nzambi gahanelego anjelo njila ya guhinyina mavu adi muza, anyi tudi muzuelela. 6 Uvi muthu mumoshi wazuelele egi: “Muthu udi nanyi hagula aye umutangize, nga, mun’a muthu udi nanyi hagula aye udisagese mukunda nu muene? 7 Wamubuishile muthu wazonda gutuama dia anjelo, wamuhanele lutumbu nu ginemua, wamutombele ha guhinyina midimo ya mago aye. 8 Wahagele ima yagasue goshi’a ikanzo yenji hagula ayihinyine.” Hamuhanele Nzambi ima yagasue ha guhinyina, gabembelego nga gima gimoshi. Uvi henyaha khenji tumonago egi ima yagasue idi mu uhinyinyi wenji. 9 Henyaha tudi mumona egi Yesu munu wabuishiwe muthu wazonda gutuama dia anjelo, wahanewe lutumbu nu ginemua luholo amonele lamba dia gufua, hagula mu khenda jiavula jia Nzambi muene alole gufua mukunda nu athu agasue.
10 Ha guhana ana avula lutumbu, yakhalele yatagana egi Nzambi wafugile ima yagasue nu wana guyibamba abuise Mutuameji wa guhuluga guawo watagana mu njila ya malamba. 11 Handaga muthu udi mubuisa athu ako a gijila nu athu anyi adi mubuishiwa a gijila, mukut’awo agasue adi nu tata mumoshi. Hene, muene gashigo muvua musonyi ha guatamega egi aphangi. 12 Udi muzuela egi: “Mbangujiyisa jina diaye gudi aphangi’ami; mbangugutumbuisa nu lungimbo mukatshi dia hungu.” 13 Udi muzuela luko egi: “Mbangumushila mutshima.” Udi mulezela luko egi: “Tala! Ame nu ana azonda Yehowa wanguhanele.”
14 Handaga “ana azonda” ana khala nu mahatshi nu muila, muene nji wabuile muthu, wakhalele nu mahatshi nu muila, hagula mu njila ya gufua guenji ashiye muthu wana bata gufua. Muthu muene Diabulu. 15 Hagula akule* nji athu agasue abuishiwe ahiga mu monyo wawo wagasue mukunda nu woma wa gufua. 16 Handaga idi yadiago egi gashigo mukuatesa anjelo, uvi udi mukuatesa ajigulu* a Abalahama. 17 Hene, wabuile gifua “aphangi’enji” mu ndaga jiagasue, hagula abue nganga-nzambi wakoma udi muvila athu khenda nu udi wa gujinginyina gu mudimo wa Nzambi ha guhana mulambu wa gutotesa gubola* mukunda nu masumu a athu. 18 Wamonele malamba tangua amulolele. Hene, udi diago watagana ha gukuatesa athu adi mulolewa.