Makalegelo a Apostolo
16 Phaula wahetele mu dimbo dia Delebe, gungima wayile mu dimbo dia Liseta. Mu dimbo diene, guakhalele nu mulandudi mumoshi jina dienji Timote, gin’enji wakhalele muenya Yuda, wakhalele mulandudi wa Yesu, uvi sh’enji wakhalele muenya Greke. 2 Aphangi a gu Liseta nu a gu Ikoniome akhalele muzuela ndaga jiabonga mukunda nu muene. 3 Phaula wasuangulugile egi aye nu Timote. Hene wamuzudile wamumba gu mukanda handaga enya Yuda agasue a gu khanda jinyi akhalele mujiya egi sh’enji wakhalele muenya Greke. 4 Tangua akhalele mubalega mu membo, akhalele muwambela aphangi mikhuala yazudile apostolo nu akulu gu Yelusalema hagula ayitumagele. 5 Gishina giene gutshigina gua aphangi mu mahungu guakhalele mukola. Lusugu nu lusugu athu avula akhalele mubua alandudi.
6 Abalegele Filigia nu Galatiya handaga nyuma ya Nzambi yaatunyishile ha gulongesa mbimbi ya Nzambi mu provense ya Azi. 7 Tangua ahetele gu Misia, atshiginyile gungina mu dimbo dia Bitinia uvi nyuma ya Yesu yaatunyishile. 8 Hene abalegele hehi nu dimbo dia Misia, abulumugile gu Toloase. 9 Mu phipha Phaula wamonele vizio. Yala mumoshi wa gu Maseduane wakhalele wa gumagana gutuama dienji, wakhalele gumububila egi: “Zawuga uze gu Maseduane utukuatese.” 10 Hamonele Phaula vizio yene, tuadilondele ha guya gu Maseduane handaga tuakotelesele egi Nzambi watutamega guene hagula tualongese lukuma luabonga.
11 Hene tuanginyine mu masuwa gu Toloase, tuayile mbala imoshi gu Samotalasa. Lusugu lualanduile tuahetele gu Neapholise. 12 Gungima tuakatugile gu Neapholise, tuayile gu Filiphi, dimbo dia enya Roma.* Dimbo dia Filiphi didi dimbo diakoma dia gu khanda ya Maseduane. Tuatshitshile ndambo ya masugu guene. 13 Mu Lusugu lua Guhuluguga tuazogele mu dimbo,* tuayile gu khulo ya muta. Tuatangijile egi guene gudi fundo dia gukombelela. Tuakhalele hashi, tuatele maga nu akhetu adibungishile guene. 14 Mukatshi dia akhetu ene, guakhalele nu mukhetu mumoshi jina dienji Lidia, muenya gu dimbo dia Tiyatile. Wakhalele musumbisa milele ya benguluga, wakhalele nji mukombelela Nzambi. Mukhetu muene wakhalele gututegela. Yehowa wakangudile mutshima wenji hagula ategelele muabonga ndaga jiakhalele muzuela Phaula. 15 Tangua muene nu athu a monzo yenji abatijiwe, watububidile egi: “Gula muamona egi ngudi nu gutshigina gudi Yehowa, izenu mukhale gumbo diami.” Tuayile gumbo dienji handaga wakhalele gutushinjiga ha guya.
16 Lusugu lumoshi tuakhalele muya ha fundo dia gukombelela, tuataganele nu muenya mudimo mumoshi wa mukhetu wakhalele nu demo diakhalele gumukuatesa ha guphonga.* Mudimo wenji wa guphonga wakhalele mukuatesa mafumu enji ha guheta makuta avula. 17 Mon’a mukhetu muene wakhalele gutulandula, wakhalele mukaluga egi: “Athu awa adi ahiga a Nzambi wa Gudinyinyiga. Adi gumiwambela ndaga muajiya gutshita ha guhuluga.” 18 Mon’a mukhetu muene wakhalele mukaluguga ngenyi masugu avula. Ndaga yene yahuidishile Phaula, hene wabalumugile wawambelele demo diene egi: “Ngudi guguwambela mu jina dia Yesu Klisto ha guzoga mukatshi dia mon’a mukhetu yowu.” Demo diene diazogele mu tangua diene.
19 Tangua mafumu a mona wa mukhetu muene amonele egi ashigo luko nu luholo lua guheta makuta, akuatele Phaula nu Silase, ayile nu guanana uu nu ha zando gudi mafumu. 20 Tangua ayile nawo gutuama dia manzuji, azuelele egi: “Athu awa adi enya Yuda, adi muzola matululu avula mu dimbo dietu. 21 Adi mulongesa ndaga jiana tunyisa mukhuala wetu ha gukalagala, handaga esue tudi enya Roma.” 22 Athu a avidile khabu, gungima manzuji awambelele athu ha guakatula milele ya holu nu ha guakhuphula fimbo. 23 Gungima dia guakhuphula fimbo jiavula, a ambile mu bologo. Awambelele mubambi wa bologo ha guabamba muabonga diago. 24 Havile muene ngenyi, waambile mu bologo dia ha katshi na katshi. Gungima waanginyishile malu mu milulu.
25 Uvi mukatshi dia phipha, Phaula nu Silase akhalele mukombelela nu guyimba ngimbo ha gutumbuisa Nzambi. Enya bologo ako akhalele guategelela. 26 Mu tangua diene, mavu adigitshile mangololo, fondasio jia inzo ya bologo jiadinyigishile. Mu tangua diene, mifulo yagasue yadikangulugile, malenge a athu agasue akatugile. 27 Tangua mubambi wa bologo wazugile gu tulo, wamonele mifulo ya bologo ya uhululu. Watangijile egi enya bologo alengi gale, hene wahomuene phogo yenji ya khusa, watshiginyile gudishiya. 28 Uvi Phaula wamuwambelele mu dijui diakola egi: “Udishiyigo, handaga mukut’etu agasue tudi haha!” 29 Hene mubambi wa bologo watogele muenda, wanginyile muphushi fundo diakhalele ene. Wakhalele mudigita, wabuile mu malu a Phaula nu Silase. 30 Waazolele hanze nu waahudile egi: “Mala, itshi ngudi naye gutshita hagula nguhuluishiwe?” 31 Amuwambelele egi: “Sha gutshigina gudi Fumu Yesu, ngenyi aye nu athu a monzo yaye mbamuhuluishiwa.” 32 Gungima amulongesele mbimbi ya Yehowa hamoshi nu athu agasue a monzo yenji. 33 Mubambi wa bologo waazudile mu phipha yene, wawevele phuta jiawo. Muene nu athu agasue a monzo yenji abatijiwe mu tangua diene. 34 Gungima wayile nawo gumbo dienji, waahanele ima ya gudia. Muene nu athu agasue a monzo yenji asuangulugile muavula handaga wabuile mukombeledi wa Nzambi.
35 Mu gimenegena, manzuji atumile mafumu a maphulushi ha guwambela mubambi wa bologo egi: “Zola athu anyi mu bologo.” 36 Mubambi wa bologo wawambelele Phaula egi: “Manzuji atumi athu ha gunguwambela egi ngumizole mu bologo. Na zogenu, ndenu genu mu guhuima.” 37 Uvi Phaula wawambelele egi: “Esue tudi enya Roma, uvi ene atukhuphuile fimbo ha meso a athu, atumbile mu bologo nu gutusophesa ndo. Henyaha na adi mutshigina gutuzola mu bologo mu gisuegi? Ndo sha! Ene hakhawo aze atuzole.” 38 Mafumu a maphulushi ayile muwambela manzuji ndaga yene. Tangua manzuji avuile egi mala ene akhalele enya Roma, woma waakuatele. 39 Hene ajile, a abubidile ha guatotesela. Gungima a azolele mu bologo, a awambelele ha gukatuga mu dimbo diawo. 40 Uvi hazogele Phaula nu Silase mu bologo, ayile gumbo dia Lidia. Tangua amonele aphangi, a akolesele, gungima ayile gawo.