Gudi Enya gu Galatiya
5 Klisto watukatuile mu uhiga wa luholo elu. Hene dijigamesenu, mutshiginago gudinginyisa luko mu uhiga.
2 Ame Phaula ngudi gumiwambela egi gula muambiwa gu mukanda, Klisto mbagashigo mukhala luko nu ndando mukunda nu enue. 3 Ngudi muwambela luko muthu wagasue udi mumbiwa gu mukanda egi, udi naye gutumagela Mikhuala yagasue. 4 Gula enue hakhenu mudi mutshigina gudibuisa athu abonga gu meso a Nzambi handaga mudi mutumagela mikhuala, mudi agudikhaphumuna nu Klisto. Muene gashigo gumivila luko khenda jiavula. 5 Uvi esue tudi munengena ha gubua athu abonga gu meso a Nzambi phamba mu njila ya nyuma yenji nu mukunda nu gutshigina guetu. 6 Handaga mukunda nu athu adi mu gudivua guabonga nu Klisto Yesu, gumbiwa gu mukanda nu gutuna gumbiwa gu mukanda gushigo nu ndando. Uvi gima gidi nu ndando gidi egi akhale nu gutshigina nu amonese gutshigina guene mu guzumba guawo.
7 Thomo muakhalele muzula phushi muabonga. Henyaha nanyi wamikanga njila hagula mulandulago gutumagela giamatshidia? 8 Ndaga jidi gumilongesa athu awa jishigo mukatuga gudi Nzambi wamitamegele. 9 Levire yazonda yana jimbisa pate yagasue. 10 Ngudi gudifelela egi enue mudi mu gudivua guabonga nu Fumu mbamukhala nu matangi gifua ami. Uvi muthu wagasue udi gumisagesa, nga udi nanyi, mbawuhanewa ndola yakola. 11 Uvi aphangi, gula ngudi mulongesa ndaga yatadila gumbiwa gu mukanda uu nu luenyelu, mukunda natshi adi mulandula gungusagesa giwa? Gula ngudi mulandula gulongesa ndaga yatadila gumbiwa gu mukanda, ngenyi idi mumonesa egi mutshi wa lamba* wa Klisto ushigo mutuma luko athu ha gubua mu gubola. 12 Ngudi mutshigina egi athu adi mukamba gumiwunganesa adibatule itshinyi yawo ya mila ya guvalela.
13 Aphangi, muatamegewe hagula mukhadigo mu uhiga. Hakiene, mukalegelago luendu luene ha gutagenesa nzala jia muila. Uvi dikuatesenu nu guzumba guagasue gifua ahiga. 14 Handaga Mikhuala yagasue idi mutagenesewa* mu mbimbi eyi imoshi idi muzuela egi: “Zumba muthu na muku’enu gifua luholo wana zumba muila waye.” 15 Uvi gula mudi gudiluisa nu gudisagesa, temienu gula ndo muajiya gudishiya.
16 Uvi ngudi muzuela egi landulenu guwenda mu utuameji wa nyuma ya Nzambi. Ngenyi mbamushigo mutshita nga ndaga imoshi yabola. 17 Handaga nzala jia muila jiana tuma muila ha gutuna gudivua nu nyuma. Nyuma nji yanago gudivua nu muila. Ndaga eji mbadi jiana gudiluisa, hene muanago gutshita ndaga muana tshigina gukalagala. 18 Gula mudi mubemba nji egi nyuma ya Nzambi imituameze, idi mumonesa egi mushigo mu uhinyinyi wa mikhuala.
19 Nzala jia muila jiana monega haphelo. Nzala jiene jidi uthambi,* ndaga jia usala, ndaga jia musonyi,* 20 gukombelela isongo, wanga, umbalagaji, gumana, ginjiongo, khabu jiakola, khadilo dia gutuna gudivua, ukhaphumunyi, guzola tumahunji, 21 guvua nzala ya ima yangane, gukuatewa matombe, mawano anyi athu ana kalagala ndaga jia musonyi, nu ndaga jiko jiadifuana nu eji. Ngudi gumitemesa mukunda nu ndaga eji gifua luholo ngamitemesa gale egi, athu ana kalagala ndaga jia luholo elu mbaashigo mungina mu Ufumu wa Nzambi.
22 Uvi mabundu a nyuma ya Nzambi adi guzumba, gusuanguluga, guhuima, guhuiminyina, gisemo, mutshima wabonga, gutshigina, 23 gutuluga, gudikanda. Gushigo nga mukhuala umoshi udi mutunyisa ndaga eji. 24 Athu adi alandudi a Klisto Yesu akhokhele gale nzala jiawo jiakola jia muila ha mutshi.
25 Gula tudi mujinga mu gudivua nu utuameji wa nyuma ya Nzambi, tulandulenu nji guwenda mu luholo luabonga mu utuameji wa nyuma yene. 26 Tukhadigo enya lulendo, tukhadigo nu khadilo dia gudifuanesa nu athu ako, tudivuilago nji fuwa.