Mikhuala
32 “Oo dilu tegelela, ngudi mutshigina guzuela,
Mavu ategelele mbimbi jidi muzoga mu kano diami.
2 Malongo ami mbaanoga gifua mvula;
Mbimbi jiami mbajibua gifua mame,
Gifua gamvula gadi mumianga holu dia muangu,
Gifua mvula yavula holu dia mayiji.
3 Mbangujiyisa jina dia Yehowa.
Zuelelenu lutumbu lua Nzambi wetu!
4 Seso, midimo yenji idi yatagana,
Handaga ndaga jiagasue jiana kalagala muene jidi jiabonga.
Nzambi wagujinginyina wana kalagala ndaga nu giamatshidia giagasue;
Muene wana tshita ndaga jiabonga nu jiatagana.
5 Ene akalegele ndaga jiabola.
Ene ashigo an’enji, gubola gudi guawo hakhawo.
Adi gindongo gia athu abola nu gia enya mambo!
6 Oo enue athu aheya, athu ashigo nu ndunge,
Luholo mudi naye gukalegela Yehowa ndaga luenyelu ba?
Ishigo muene udi Sh’enu wamifugile,
Muthu wamilondele nu wamibuishile gifutshi ba?
7 Wungulugenu masugu abalega;
Tangizenu ndaga jiabuidile athu a mu indongo yabalega.
Hulenu ash’enu amiwambele;
Akulu enu amitele lumene.
8 Tangua Nzambi wa Gudinyinyiga wahanele ifutshi khapho diawo,
Tangua diakhaphumuine muene ana a Adama,*
Wahagele mudidilo wa athu
Ha gutadila guvula gua ana a Isalele.
9 Handaga athu a Yehowa adi shinda dienji;
Yakoba udi khapho dienji.
10 Wamusangele mu mavu a luselenga,
Mavu a luselenga a githuhu, adi nu matululu ana hana woma.
Muene wamujietele ha gumubamba, wamubambele muabonga,
Wamubambele gifua gana ga diso dienji.
11 Gifua njila ya khuyi idi munyigisa kianzu gienji,
Idi muzuga holu dia mawunda enji,
Yasununa mahambu enji, yazula mawunda,
Yaabata holu dia mahambu enji,
12 Yehowa muene hakhenji wakhalele gumutuameza;*
Nzambi jia enya ifutshi iko jiakhalelego n’enji.
13 Wamubalegesele mu milundu ya ha mavu,
Hagula wajiya gudia mbuto jia mu mahia.
Wamuhanele wigi wa mu seso ha gudia
Nu maji azogele mu seso diakola,
14 Manteka a ngombe nu mele a imeme,
Hamoshi nu imeme yabonga,*
Nu milume ya imeme ya gu Bashana, nu khombo jia milume,
Nu mbuto jia ble jiabonga;
Nu meya* a mabundu a vinyo muakhalele munua gifua matombe.
15 Tangua Yeshuluna* wabuile maji-maji, walumbugile fumi’enji.
Aye wabua maji-maji, wakoma, wajimba.
Muene watunyile Nzambi wamufugile,
Waseguluile Seso diana gumuhuluisa.
16 Amuhanele khabu mukunda nu nzambi jia ngenji;
Ene amuhanele khabu mukunda nu ima ya usala.
17 Akhalele muhana milambu gudi bademo, uvi Nzambi ndo,
Gudi nzambi jinyi ajiyilego,
Nzambi jihe-jihe akatuga gujiya,
Gudi nzambi jinyi akhakh’enu ajiyilego.
18 Muajimbidile Seso yago udi Sh’enu,
Muawungulugilego Nzambi wamivualele.
19 Tangua Yehowa wamonele ndaga yene, waatunyile
Handaga an’enji a mala nu a akhetu amuhanele khabu.
20 Wazuelele egi: ‘Mbangusuega phala yami gudi ene;
Mbangutala ndaga mbajiabuila.
Handaga adi gindongo gia athu abola,
Ana anyi ashigo agujinginyina gudi ame.
21 Anguhanele khabu* mukunda nu nzambi jia mambo;
Anguhanele khabu mukunda nu isongo yawo ya githuhu.
Ame mbangukalegela athu ashigo athu ami hagula ene avue ginjiongo;
Mbangukalegela gifutshi gia athu aheya ha guahana khabu.
22 Handaga khabu jiami jialemesa tshuya
Mbatukonda uu nu moshi’a Malumba,*
Mbatukonda nji mavu nu mbuto jienji,
Mbatukonda fondasio jia milundu.
23 Mbanguvudisa malamba awo;
Mbanguasonona mifula yavula.
24 Mbaahuila mukunda nu nzala,
Fievre yakola mbayamanesela, mbaashiyiwa diago.
Mbanguatumina shitu jiabala ha guasuma
Nu nyoga* jia malengo-lengo jiana wenda mu fuluguta dia mavu.
25 Athu mbaakhala hanze, phogo ya khusa mbayishiya an’awo;
Athu mbaakhala monzo, mbaavua woma wakola
Nu muvuala wa yala nu gandongo,
Nu ana nu athu agukola.
26 Ngakhalele naye guzuela egi: “Mbanguamuanga;
Mbangutshita egi athu a awungulugago luko,”
27 Uvi ngavuile woma mukunda nu ndaga jiajiya gutangigiza mbalagaji,
Handaga mbalagaji jiajiya gukotelesa ndaga yene mu luholo luabola.
Jiajiya guzuela egi: “Tuabinga mu ngolo jietu;
Ishigo Yehowa wakalagala ndaga eji jiagasue.”
28 Handaga gidi gifutshi gia athu aheya,*
Ashigo nu ndunge jia gukotelesa ndaga.
29 Gula nga akhadi nu ndunge, nga atangigiza ndaga eyi!
Akhadi naye gutangigiza ndaga mbajiabuila.
30 Luholo lutshi muthu mumoshi wajiya gukaya athu 1 000?
Nu athu 10 000 ajiya gulenga athu muyadi?
Ndaga ya luholo elu yajiyilego gukalegewa gula nga Seso diawo dia adigilego
Nu gula nga Yehowa gaahanelego ha mago a mbalagaji jiawo.
31 Handaga seso diawo dishigo gifua Seso dietu,
Nu jiene mbalagaji jietu jiakotelesele gale ndaga yene.
32 Handaga vinyo yawo yakatuga gu Sodoma
Nu mu mahia a gu Gomola.
Mabundu awo a vinyo adi nu puazo,
Isuga yawo ya vinyo idi yalula.
33 Matombe awo adi gifua malengo-lengo a nyoga,
Puazo yabala ya kobra.
34 Idi ya gubamba hehi nu ame,
Idi ya gukanga mu inzo yami ya gubambela ima.
35 Ame ngudi naye guvutula gubola mukunda nu gubola,
Nu guhana ndola mu tangua diatagana tangua malu awo mbaadiadiumuga,
Handaga lusugu lua malamba awo luasuena hehi,
Ndaga idi naye guabuila mbayiza muphushi.’
36 Handaga Yehowa mbawusophesa athu enji,
Muene mbawuvuila enya mudimo enji khenda*
Tangua mbadimona muene egi ngolo jiawo jiahua,
Nu guasala phamba athu ashigo nu ngolo nu adi aguleba.
37 Ene mbaazuela egi: ‘Nzambi jiawo jidi gui?
Seso akhalele muya ha gudisuega,
38 Nzambi jiakhalele mudia maji a milambu yawo,*
Nu gunua matombe a milambu yawo ya matombe jidi gui?
Jizuge jimikuatese.
Jibue fundo dienu dia gudisuegela.
39 Henyaha talenu, ame ngudi muene,
Gushigo nu nzambi jiko phamba ame.
Ngana shiya, ngana hana nji monyo.
Ngana namenesa, nu ngana saga,
Gushigo nga nu muthu wajiya guhuluisa muthu muko ha mago ami.
40 Handaga ngathuphula mago ami gosa mu dilu,
Ngadiloga egi: “Gifua luholo ngudi nu monyo mayilago,”
41 Gula ngaviga phogo yami ya khusa
Nu ngalonda koko diami ha gusophesa,
Mbanguvutula gubola gudi mbalagaji jiami,
Mbaguhana nji ndola gudi athu anago gunguzumba.
42 Mbangutshita egi mifula yami yikuatewe mahatshi,
Mahatshi a athu ashiyiwa nu a ahiga,
Phogo yami ya khusa idie misunyi,
Mito ya mafumu a mbalagaji.’
43 Enue athu a mu ifutshi yagasue nu athu enji, khalenu nu gusuanguluga,
Handaga muene mbawuvutula gubola mukunda nu mahatshi a enya mudimo enji,
Mbawuvutula gubola gudi mbalagaji jienji,
Muene mbawutotesa* gubola gua gifutshi gia athu enji.”
44 Moize wayile, wazuelele mbimbi jiagasue jia lungimbo luene ha meso a athu, wakhalele nu Hoshea* mun’a Nune. 45 Hamanesele Moize guwambela enya Isalele mbimbi jiene jiagasue, 46 waawambelele egi: “Bambenu muabonga diago mbimbi jiagasue ngudi gumiwambela mangino ha gumitemesa, ha gujilongesa an’enu hagula akalegele muabonga mbimbi jiagasue jidi mu Mukhuala owu. 47 Handaga mbimbi jiene jidi nu ndando yavula, mbajimihana monyo, mbajimikuatesa ha gukhala masugu avula mu gifutshi mudi muzawuga muta wa Yordane ha guzula.”
48 Yehowa wawambelele Moize mu lusugu luene egi: 49 “Kanduga gu khanda ya milundu ya Abalima, gu Mulundu wa Nebo udi mu gifutshi gia Moaba ha sambua dia Yeliko, utale gifutshi gia Kanana ngudi muhana enya Isalele gifua khapho. 50 Gungima mbawufua* gu mulundu udi mutshigina gukanduga gifua muafuile phangi’aye Alona gu Mulundu wa Hola, 51 handaga muyadi enu muakhalelego agujinginyina gudi ame mukatshi dia enya Isalele gu meya a Meriba gu Kadeshe mu mavu a luselenga a Sine, muangutumbuishilego gutuama dia enya Isalele. 52 Mbawumona gifutshi giene gualeha, uvi mbawushigo mungina mu gifutshi ngudi muhana enya Isalele.”