Yoshua
21 Mafumu a fami jia mu giphuta gia Levi ayile gudi nganga-nzambi Eleazale nu gudi Yoshua mun’a Nune nu gudi mafumu a fami jia iphuta ya Isalele. 2 Atele nawo maga gu Shilo mu gifutshi gia Kanana, azuelele egi: “Yehowa wazuelele mu njila ya Moize egi mbaatuhana membo ha gukhala nu matemu adi hehi nu membo ene mukunda nu shitu jietu.” 3 Hene enya Isalele ahanele enya Levi membo akhalele mu mavu awo nu matemu akhalele hehi nu membo ene gifua muazuelele Yehowa.
4 Gungima dia guta mubela, fami jia Kehate jiahetele khapho. Enya Levi anyi akhalele ajigulu a nganga-nzambi Alona ahetele membo 13 gungima dia guta mubela mu mavu a giphuta gia Yuda nu a giphuta gia Simeone nu a giphuta gia Benjame.
5 Fami jia Kehate jinyi jiasalele jiahetele membo kumi* mu mavu a fami jia giphuta gia Efrayime nu mavu a giphuta gia Dane nu a gitshinyi gia giphuta gia Manase.
6 Fami jia Geleshona jiahetele membo 13 mu mavu a fami jia giphuta gia Isakale, a giphuta gia Asele, a giphuta gia Nefetali nu a gitshinyi gia giphuta gia Manase gu Bashana.
7 Fami jia Melali jiahetele membo 12 mu mavu a giphuta gia Ribene nu a giphuta gia Gade nu a giphuta gia Zabulona.
8 Gungima dia guta mubela, enya Isalele ahanele enya Levi membo nu matemu akhalele hehi, gifua luholo Yehowa wawambelele Moize.
9 Wawa majina a membo azudiwe mu mavu a giphuta gia Yuda nu a giphuta gia Simeone. 10 Ahanele membo ene gudi ana a Alona a mu fami jia Kehate mu giphuta gia Levi, handaga ene athu a thomo ahetele membo gungima dia guta mubela. 11 A ahanele Kiriyate-Arba (Arba wakhalele sh’a Anaka), yakotelesa egi Hebrone, gu khanda ya milundu ya Yuda nu matemu akhalele hehi. 12 Uvi ahanele Kalebe mun’a Yefune temu dia dimbo diene nu membo azonda-zonda akhalele hehi, diene diakhalele khapho dienji.
13 Ahanele ana a nganga-nzambi Alona Hebrone, dimbo dia gulengela mukunda nu muthu washiyi muthu nu matemu enji; a ahanele nji Libena nu matemu enji, 14 Yatile nu matemu enji, Eshetemoa nu matemu enji, 15 Holone nu matemu enji, Debile nu matemu enji, 16 Ayine nu matemu enji, Yuta nu matemu enji nu Bete-Shemeshe nu matemu enji: azudile membo 9 mu iphuta yene mbadi.
17 Mu giphuta gia Benjame azudile membo awa: Gibeona nu matemu enji, Geba nu matemu enji, 18 Anatota nu matemu enji nu Alemone nu matemu enji: membo akhalele nguana.
19 Membo agasue ahanewe ajigulu a nganga-nzambi Alona akhalele 13 nu matemu awo.
20 Gungima dia guta mubela, fami jiko jia Kehate mu giphuta gia Levi jiahetele membo mu mavu a giphuta gia Efrayime. 21 A ahanele dimbo dia gulengela mukunda nu muthu washiyi muthu; dimbo diene diakhalele Shekeme nu matemu enji gu khanda ya milundu ya Efrayime; a ahanele nji Gezele nu matemu enji, 22 nu Kibesayime nu matemu enji nu Bete-Holone nu matemu enji: membo akhalele nguana.
23 Mu giphuta gia Dane a ahanele membo awa: Eleteke nu matemu enji, Gibetona nu matemu enji, 24 Ayalona nu matemu enji nu Gate-Limone nu matemu enji: membo akhalele nguana.
25 Mu mavu a gitshinyi gia giphuta gia Manase a ahanele membo awa: Tanaka nu matemu enji nu Gate-Limone nu matemu enji: membo akhalele mbadi.
26 Membo agasue ahanewe fami jiko jia Kehate nu matemu awo akhalele kumi.
27 Fami jia Geleshona mu giphuta gia Levi ahetele dimbo dia gulengela mukunda nu muthu washiyi muthu mu mavu a gitshinyi gia giphuta gia Manase, yakotelesa egi Golana gu Bashana nu matemu enji; ahetele nji Beshetela nu matemu enji: membo akhalele mbadi.
28 Mu mavu a giphuta gia Isakale azudile membo awa: Kishiona nu matemu enji, Dabelate nu matemu enji, 29 Yalemuta nu matemu enji nu Ene-Ganime nu matemu enji: membo akhalele nguana.
30 Mu mavu a giphuta gia Asele azudile membo awa: Mishale nu matemu enji, Abedona nu matemu enji, 31 Helekate nu matemu enji nu Lehoba nu matemu enji: membo akhalele nguana.
32 Mu mavu a giphuta gia Nefetali azudile: Kedeshe gu Galilea, dimbo dia gulengela mukunda nu muthu washiyi muthu, nu matemu enji; azudile nji Hamote-Dole nu matemu enji nu Kaletane nu matemu enji: membo akhalele thathu.
33 Membo agasue ahetele fami jia Geleshona nu matemu awo akhalele 13.
34 Fami jia Melali, fami jiko jia mu giphuta gia Levi ahetele membo awa mu mavu a giphuta gia Zabulona: Yokeneame nu matemu enji, Kaleta nu matemu enji, 35 Dimena nu matemu enji nu Nahalale nu matemu enji: membo akhalele nguana.
36 Mu mavu a giphuta gia Ribene azudile membo awa: Besele nu matemu enji, Yahase nu matemu enji, 37 Kedemota nu matemu enji nu Mefata nu matemu enji: membo akhalele nguana.
38 Mu mavu a giphuta gia Gade azudile: Ramote gu Gileade, dimbo dia gulengela mukunda nu muthu washiyi muthu, nu matemu enji; azudile nji Mahanayime nu matemu enji, 39 Heshebona nu matemu enji, Yazele nu matemu enji: membo agasue akhalele nguana.
40 Membo agasue ahanewe fami jia Melali, fami jiko jia mu giphuta gia Levi akhalele 12.
41 Membo agasue enya Levi ahetele mu mavu a enya Isalele nu matemu awo akhalele 48. 42 Dimbo diagasue mukatshi dia membo awa diakhalele dia gujieta nu matemu; membo ene agasue akhalele ngenyi.
43 Yehowa wahanele enya Isalele gifutshi giagasue giadilogele muene ha guhana akhakh’awo. Agizudile, akhalele muene. 44 Yehowa waahanele nji guhuima gu khanda jiagasue gifua luholo luadilogele muene gudi akhakh’awo, gushigo nga mbalagaji wawo mumoshi wakhalele mumagana gutuama diawo. Yehowa wahanele mbalagaji jiawo jiagasue ha mago awo. 45 Ndaga* jiagasue jiabonga Yehowa walayele enya Isalele jiatagenesewe; gushigo nga imoshi yasalele.