Mukanda wa Thomo wa Mafumu
8 Mu tangua diene, Salomo watamegele akulu a gu Isalele, mafumu agasue a iphuta nu mafumu a fami jia gu Isalele. Ajile gudi Fumu Salomo gu Yelusalema ha gubata mushete wa gikotelo wa Yehowa wakhalele mu Dimbo dia Davidi, yakotelesa egi Siona. 2 Enya Isalele agasue adibungishile gutuama dia Fumu Salomo mu tangua dia wano* mu mbeji ya Etanime,* yakotelesa egi mbeji ya 7. 3 Tangua akulu agasue a gu Isalele ahetele, nganga-nzambi jiatuphudile Mushete. 4 Abatele Mushete wa Yehowa nu tenta ya gudibungishila nu ikadigilo yagasue ya gijila yakhalele mu tenta yene. Nganga-nzambi nu enya Levi abatele ima yene. 5 Fumu Salomo nu enya Isalele agasue anyi atamegewe ha gudimona n’enji akhalele gutuama dia Mushete. Ahanele milambu ya imeme nu ngombe jiavula, guakhalelego nu luholo lua guyitanga.
6 Gungima nganga-nzambi jiahagele mushete wa gikotelo wa Yehowa ha fundo dienji, goshi’a mahambu a basheribe mu sugu ya monzo ya mukatshi, yakotelesa egi ha Fundo Diabalega Gijila.
7 Mahambu a basheribe akhalele a gusununa holu ha fundo diakhalele Mushete, ha gutshuiga Mushete nu mihitu yenji. 8 Mihitu yene yakhalele yaleha diago, songi jienji jiakhalele mumuenega uu nu ha Fundo dia Gijila gutuama dia sugu ya mukatshi, uvi jiakhalelego mumuenega hanze. Mihitu yene yana khala guene uu nu mangino. 9 Guakhalelego nu gima giko mukatshi dia Mushete, phamba maseso mbadi ambile Moize gu Horebe tangua Yehowa wakotele gikotelo nu enya Isalele hazogele ene gu Ejipitu.
10 Tangua nganga-nzambi jiazogele ha Fundo dia Gijila, tuta diazalele mu inzo ya Yehowa. 11 Nganga-nzambi jiakhalelego nu luholo lua gulandula gutshita mudimo mukunda nu tuta diene; handaga lutumbu lua Yehowa luazalele mu inzo ya Yehowa. 12 Mu tangua diene, Salomo wazuelele egi: “Yehowa wazuelele egi mbawukhala mukatshi dia phipha yakola. 13 Ngagutungila inzo imoshi ya gushimana diago, fundo mbawukhala mayilago.”
14 Gungima Salomo wabalumugile, wasendesele gushimbiga enya Isalele agasue, hakhalele ene agumagana. 15 Wazuelele egi: “Yehowa Nzambi wa Isalele atumbuishiwe, muene* wahanele tata wami Davidi laji nu watagenesa* laji diene! Handaga wazuelele egi: 16 ‘Sendese lusugu ngazolele athu ami enya Isalele gu Ejipitu, khenji ngatombelego dimbo mukatshi dia iphuta yagasue ya Isalele ha gutunga inzo, hagula jina diami dikhale guene. Uvi ngatombele Davidi ha guhinyina athu ami enya Isalele.’ 17 Tata wami Davidi wakhalele diago mutshigina gutunga inzo mukunda nu jina dia Yehowa Nzambi wa Isalele. 18 Uvi Yehowa wawambelele tata egi: ‘Udi diago mutshigina gutunga inzo mukunda nu jina diami. Idi ndaga yabonga. 19 Uvi ishigo aye mbawutunga inzo yene; mona mbawuvuala* muene mbawutunga inzo mukunda nu jina diami.’ 20 Yehowa watagenesele laji dienji, ngahinganele ha fundo dia tata wami Davidi, ngudi ha nguasa ya ufumu ya Isalele gifua mualayele Yehowa. Ngatunga nji inzo mukunda nu jina dia Yehowa Nzambi wa Isalele, 21 ngalondji nji fundo mukunda nu Mushete udi nu gikotelo giakotele Yehowa nu akhakh’etu haazolele muene gu Ejipitu.”
22 Gungima Salomo wamaganele gutuama dia giwotshielo gia Yehowa, gutuama dia enya Isalele agasue. Wathuphuile mago enji gosa, 23 wazuelele egi: “Oo Yehowa Nzambi wa Isalele, gushigo nu Nzambi muko gifua aye gosa mu dilu nu hashi’a mavu. Aye wana nemesa gikotelo giaye, wana monesa guzumba gua giamatshidia gudi akombeledi aye adi muwenda gutuama diaye nu mutshima wawo wagasue. 24 Watagenesa ndaga walayele tata wami Davidi, muenya mudimo waye. Wamuhanele laji, mangino watagenesa laji diene. 25 Henyaha, Oo Yehowa Nzambi wa Isalele, tagenesa ndaga walayele tata wami Davidi, muenya mudimo waye, tangua wazuelele egi: ‘Gula an’aye adituameza muabonga, awenda gutuama diami gifua luholo aye wawendele gutuama diami, mbagukhala nu muthu mukatshi dia ajigulu aye ha nguasa ya ufumu gu Isalele tangua diagasue.’ 26 Henyaha, Oo Nzambi wa Isalele, ngabuba, tagenesa ndaga walayele tata wami Davidi muenya mudimo waye.
27 “Uvi Nzambi wajiya diago gukhala ha mavu ba? Dilu nu guene gosa gua gudinyinyiga, gudi guazonda mukunda nu aye ha gukhala; luholo lutshi wajiya gukhala mu inzo eyi ngatungi! 28 Henyaha tegelela gisambu giami nu gububa guami, ame muenya mudimo waye. Oo Yehowa Nzambi wami, ngudi mudila ha gugutoga ukuateshi, ngutegelele; tegelela gisambu ngudi mukita mangino gutuama diaye. 29 Ngabuba, meso aye akhale mutala inzo eyi phipha nu muanya, atale fundo wazuelele egi: ‘Jina diami mbadikhala guene,’ ha gutegelela gisambu gidi mutshita muenya mudimo waye ha fundo edi. 30 Tegelela gububa gua muenya mudimo waye nu gua athu aye enya Isalele tangua mbaatshita isambu ha fundo edi. Ngabuba, tegelela mu dilu fundo udi; ngabuba, tegelela, tutotesele.
31 “Gula muthu wakalegela muthu n’a muko gubola nu amutoga ha gudiloga,* gula muthu muene waza gutuama dia giwotshielo giaye mu inzo eyi hadi muene wadilogi gale,* 32 tegelela mu dilu, sophesa enya mudimo aye, fuisa muthu wabola milonga, haga ndaga yatshitshi muene ha muto wenji; bingisa muthu gatshitshilego gubola,* mushimbige gifua mudi gubonga guenji.
33 “Gula mbalagaji jiabinga athu aye enya Isalele handaga adi mulandula gukalagala ndaga jiabola gu meso aye, gungima gula athu aye avutuga gudi aye, atumbuisa jina diaye, agukombelela nu agububila mu inzo eyi ha guavuila khenda, 34 ngabuba, tegelela mu dilu, totesela athu aye enya Isalele gubola guawo, avutule mu gifutshi wahanele akhakh’awo.
35 “Gula dilu diadikanga, mvula nji ishigo luko munoga handaga adi mulandula gutshita gubola gu meso aye, gungima gula agukombelela gu khanda ya inzo eyi, atumbuisa jina diaye nu abemba gukalagala gubola handaga waamonesa lamba, 36 ngabuba, tegelela mu dilu, totesela enya mudimo aye gubola guawo, gubola gua athu aye enya Isalele; handaga mbawaadijiga njila yabonga adi naye gulandula, nogesa nji mvula mu mavu wahanele athu aye gifua khapho.
37 “Gula nzala yangina mu gifutshi, nga misongo ya gisambugila, nga gikalala giakola giana miginyisa mbuto, nga misongo yana kuata mitshi, nga matulu* ana wenda avula fundo dimoshi, nga ndo gula mbalagaji jiawo jiaajieta mu dimbo dimoshi dia mu gifutshi, nga gula misongo nga malamba a luholo lutshi a abuila, 38 gula muthu mumoshi nga athu aye agasue enya Isalele atshita gisambu nu agububila ha guavuila khenda (handaga muthu nu muthu udi mujiya lamba didi mu mutshima wenji), gula asununa mago awo gu khanda ya inzo eyi, 39 ngabuba, tegelela mu dilu fundo wana khala, atotesele, tshita gifua mudi matangi aye. Hana lufuto gudi muthu wagasue gifua mudi makalegelo enji, handaga udi mujiya mutshima wa muthu wagasue (phamba aye wana jiya diago ndaga jiana khala mu mutshima wa muthu wagasue), 40 hagula ajiya guguvuila woma masugu agasue mbaakhala mu mavu wahanele akhakh’etu.
41 “Gula ngenji munu gashigo mukatshi dia athu aye enya Isalele, wakatuga mu gifutshi gia gualeha mukunda nu jina diaye* 42 (handaga mbaavua lukuma lua jina diaye diakoma nu ngolo jiaye jiavula), gungima waza, watshita gisambu gu khanda ya inzo eyi, 43 ngabuba, tegelela mu dilu fundo wana khala, kalagala ndaga yagasue idi gugutoga ngenji muene; hagula athu agasue a ha mavu ajiye jina diaye, aguvuile woma gifua muana tshita athu aye enya Isalele, ajiye nji egi inzo ngatungile idi mutumbuisa jina diaye.
44 “Gula athu aye aya mulua ita nu mbalagaji jiawo ikhale fundo ditshi, atshita gisambu gudi aye Yehowa gu khanda ya dimbo watombele nu gu khanda ya inzo ngatungi mukunda nu jina diaye, 45 tegelela gisambu giawo mu dilu nu luholo adi gugububila ha guavuila khenda, batula mulonga mukunda nu gubonga guawo.
46 “Gula agukalegela gubola (handaga gushigo nu muthu ganago gukalagala gubola), gula waavuila khabu, waabemba ha mago a mbalagaji jiawo, mbalagaji jiene jiaabata mu uhiga mu gifutshi giawo, ikhale gualeha nga hehi; 47 gula mu gifutshi a abatele mu uhiga akotelesa egi akalegele gubola, avutuga gudi aye nu agububila ha guavuila khenda mu gifutshi giene gia mbalagaji jiawo, azuela egi: ‘Tuakalegele gubola, tuajimbidile; tuatshitshile diago ndaga yabola,’ 48 gula avutuga gudi aye nu mutshima wawo wagasue nu monyo* wawo wagasue hadi ene mu gifutshi gia mbalagaji jiawo jiaabatele mu uhiga, atshita gisambu gu khanda ya gifutshi giawo ginyi wahanele akhakh’awo, gu khanda ya dimbo watombele nu gu khanda ya inzo ngatungi mukunda nu jina diaye, 49 tegelela gisambu giawo mu dilu fundo wana khala, tegelela nji luholo adi gugububila ha guavuila khenda, batula mulonga mukunda nu gubonga guawo. 50 Totesela athu aye anyi akalegele gubola gu meso aye, atotesele mukunda nu ndaga jiagasue jiabola akalegele gu meso aye. Mbawutshita egi athu a abatele mu uhiga a avuile khenda, ene mbaavuila khenda 51 (handaga adi athu aye, khapho diaye wazolele gu Ejipitu, fundo akhalele mumona lamba diakola gifua utadi mukatshi dia fulu ya tshuya tuakola). 52 Kangula meso aye ha gumona luholo muenya mudimo waye udi gugububila ha gumuvuila khenda, nu ha gumona luholo athu aye enya Isalele adi gugububila ha guavuila khenda. Ategelele tangua adi gugutamega fundo diagasue adi. 53 Handaga waatombele mukatshi dia athu agasue a ha mavu ha gukhala khapho diaye, gifua luholo wawambelele muenya mudimo waye Moize tangua wazolele akhakh’etu gu Ejipitu, Oo Yehowa Fumu Wabalega Gukoma!”
54 Hamanesele Salomo gutshita gisambu egi giagasue gudi Yehowa nu gumububila, wazugile gutuama dia giwotshielo gia Yehowa, fundo diakhalele muene ya gufugama mago gosa. 55 Gungima wamaganele, washimbigile enya Isalele agasue mu dijui diakola, wazuelele egi: 56 “Yehowa atumbuishiwe handaga wahanyi athu enji enya Isalele fundo dia gukhala mu guhuima gifua luholo lualayele muene. Ndaga jiagasue jiabonga jialayele muene mu njila ya muenya mudimo wenji Moize jiataganesewe, nga mbimbi imoshi yasalelego. 57 Yehowa Nzambi wetu akhale nu esue gifua muakhalele muene nu akhakh’etu. Gatubembigo, gatutunyigo nji. 58 Abalumune mitshima yetu gudi muene hagula tuwende mu njila jienji, tutumagele mikhuala nu badesizio enji anyi awambelele muene akhakh’etu ha gutumagela. 59 Yehowa Nzambi wetu awunguluge phipha nu muanya gububa guami hagula Yehowa wajiya gubatula mulonga mukunda nu gubonga gua muenya mudimo wenji nu gua athu enji enya Isalele lusugu nu lusugu, 60 hagula athu agasue a ha mavu ajiye egi Yehowa udi Nzambi wa giamatshidia. Gushigo nu Nzambi muko! 61 Hene, dihanenu nu mutshima wagasue gudi Yehowa Nzambi wetu, tumagelenu mikhuala yenji gifua luholo mudi guyitshita mangino.”
62 Gungima fumu nu enya Isalele agasue akhalele n’enji ahanele milambu yavula gutuama dia Yehowa. 63 Salomo wahanele milambu ya guhuima gudi Yehowa: Wahanele ngombe 22 000 nu imeme 120 000. Luene luholo fumu nu enya Isalele agasue akalegele wano tangua amanesele gutunga inzo ya Yehowa. 64 Mu lusugu luene, fumu wabuishile fundo didi hakatshi na katshi dia gibanzala giakhalele gutuama dia inzo ya Yehowa dia gijila, handaga wakhalele naye guhana milambu ya guwotshia nu milambu ya mbuto nu maji a shitu jia milambu ya guhuima; handaga giwotshielo gia kuivre ginyi giakhalele gutuama dia Yehowa giakhalele diago giazonda mukunda nu milambu ya guwotshia nu milambu ya mbuto nu maji a shitu jia milambu ya guhuima. 65 Mu tangua diene, Salomo wakalegele wano hamoshi nu enya Isalele agasue. Athu avula akatugile sendese gu Lebo-Hamate* uu nu mu baba* dia Ejipitu. Akalegele wano wene gutuama dia Yehowa Nzambi wetu masugu 7, gungima alundjile masugu ako 7, masugu agasue akhalele 14. 66 Mu lusugu lualanduile,* wawambelele athu ha guvutuga. Athu ashimbigile fumu, avutugile gu jinzo jiawo nu gusuanguluga. Akhalele nu gusuanguluga guavula mu mitshima yawo mukunda nu ndaga jiagasue jiabonga Yehowa wakalegele muenya mudimo wenji Davidi nu athu enji enya Isalele.