Ezela
10 Hakhalele Ezela mutshita gisambu nu guzuela gubola gua athu enji nu gudila yagufugama gutuama dia inzo ya Nzambi wa giamatshidia, thundu ya mala nu akhetu nu ana a enya Isalele amujietele, akhalele mudila mangololo. 2 Gungima Shekania mun’a Yehiele mukatshi dia ana a Elama wawambelele Ezela egi: “Tuasalelego ya gujinginyina gudi Nzambi wetu luholo tuazudi akhetu a mu ifutshi iko mu ulo. Ikhale ngenyi gudi nu felela mukunda nu Isalele. 3 Henyaha tukotenu gikotelo nu Nzambi wetu ha gukaya akhetu ene agasue nu an’awo mu gudivua nu utuameji wa Yehowa nu wa athu ana nemesa mikhuala ya Nzambi wetu. Tutshitenu ndaga gifua luholo mikhuala idi muzuela. 4 Zuga, handaga aye udi naye gulondega mulonga owu, jiya egi tudi nu aye. Khala nu gikhesa, tshita ndaga udi naye gutshita.”
5 Ezela wazugile, watamegele mafumu a nganga-nzambi nu enya Levi nu enya Isalele agasue, waatogele ha gudiloga egi mbaakalagala ndaga yazuelele Shekania. Hene adilogele. 6 Gungima Ezela wakatugile gutuama dia inzo ya Nzambi wa giamatshidia, wayile gu sugu* ya Yohanana mun’a Eliyashibe wa yala. Ngatshima wayile guene, gadilego nga gima, ganuilego nji nga meya handaga wakhalele mudila mukunda nu gubola guakalegele athu akatugile mu uhiga.
7 Gungima atumile mbimbi mu mavu agasue a gu Yuda nu gu Yelusalema egi, athu agasue adiangele gukatuga mu uhiga aye adibungise gu Yelusalema. 8 Manene nu akulu azudile desizio egi muthu wagasue mbawutuna guza mu masugu thathu, mbaamutambula ima yenji yagasue, mbawukayewa nji mu hungu dia athu akatugile mu uhiga. 9 Hene mala agasue a mu giphuta gia Yuda nu gia Benjame adibungishile gu Yelusalema mu lusugu lua 20 lua mbeji ya 9 mu masugu thathu ahagewe. Athu agasue akhalele hashi mu gibanzala gia inzo ya Nzambi wa giamatshidia, akhalele mudigita mukunda nu mulonga wene nu mukunda nu mvula yakola yakhalele munoga.
10 Gungima nganga-nzambi Ezela wazugile, waawambelele egi: “Muatshitshi diago gubola gutuama dia Nzambi luholo muazudile akhetu a mu ifutshi iko, muavudishile gubola gu Isalele. 11 Henyaha, balumunenu mitshima gutuama dia Yehowa Nzambi wa akhakh’enu, kalagalenu gutshigina guenji. Dikhaphumunenu nu athu a mu ifutshi eyi nu akhetu a mu ifutshi yene.” 12 Hene hungu diagasue diamuhanele mvutu mu dijui diakola egi: “Mbatutshita ndaga gifua luholo wazuela. 13 Uvi tudi athu avula, tudi nji mu sungi ya mvula. Tuajiyilego gumagana haha hanze, tuajiyilego nji gumanesela mulonga owu mu lusugu lumoshi nga masugu mbadi, handaga athu avula mukatshi dietu alumbugile diago Nzambi. 14 Henyaha, tuabuba manene etu aze ha fundo dia hungu diagasue; athu agasue nji a mu membo etu anyi azudile akhetu a mu ifutshi iko aze mu tangua mbaatoga ha guza, hamoshi nu akulu nu manzuji a dimbo nu dimbo, uu nu tangua khabu jia Nzambi wetu mukunda nu mulonga owu mbajihua.”
15 Uvi Yonatana mun’a Asaele nu Yahezia mun’a Tikeva atshiginyilego ndaga yene, Meshulame nu Shabetayi anyi akhalele enya Levi atshiginyile nji matangi’awo. 16 Uvi athu adiangele gukatuga mu uhiga atagenesele ndaga azuelele. Nganga-nzambi Ezela nu mafumu a fami jia mu iphuta ya enya Isalele anyi majina awo agasue asonegewe, adibungishile hakhawo mu lusugu lua thomo lua mbeji ya 10 ha gutadila mulonga wene; 17 mu lusugu lua thomo lua mbeji ya thomo amanesele mulonga wa mala agasue adizudile mu ulo nu akhetu a mu ifutshi iko. 18 Gungima amonele egi ana ako a nganga-nzambi azudile akhetu a mu ifutshi iko mu ulo. Mukatshi dia ana a Yeshua mun’a Yosadake nu phangi’enji wa yala guakhalele: Maseya nu Eliezele nu Yalibe nu Gedaliya. 19 Uvi alayele egi mbaakaya akaji’awo. Luholo akalegele gubola, muthu nu muthu wakhalele naye guhana gimeme gia mulume mukunda nu gubola guenji.
20 Mukatshi dia ana a Imele a mala guakhalele, Hanani nu Zebadia; 21 mukatshi dia ana a Halima a mala guakhalele, Maseya nu Eliya nu Shemaya nu Yehiele nu Oziase; 22 mukatshi dia ana a Pashule a mala guakhalele, Eliyohenayi nu Maseya nu Ishemayele nu Netanele nu Yozabada nu Eleasa. 23 Mukatshi dia enya Levi guakhalele, Yozabada nu Shimeyi nu Kelaya (yakotelesa egi Kelita) nu Phetahiya nu Yuda nu Eliezele; 24 mukatshi dia ayimbi a ngimbo, Eliyashibe. Mukatshi dia abambi a mifulo guakhalele, Shaluma nu Teleme nu Uri.
25 Mukunda nu enya Isalele ako, mu vumo dia Palosha guakhalele nu Ramiya nu Yiziya nu Malakiya nu Miyamine nu Eleazale nu Malakiya nu Benaya; 26 mukatshi dia ana a Elama a mala guakhalele, Matania nu Zakaliya nu Yehiele nu Abedi nu Yelemota nu Eliya; 27 mukatshi dia ana a Zatu a mala guakhalele, Eliyohenayi nu Eliyashibe nu Matania nu Yelemota nu Zabade nu Aziza; 28 mukatshi dia ana a Bebayi a mala guakhalele, Yohanana nu Hananiya nu Zabayi nu Atelayi; 29 mukatshi dia ana a Bani a mala guakhalele, Meshulame nu Maluka nu Adaya nu Yashuba nu Sheale nu Yelemota; 30 mukatshi dia ana a Phahata-Moaba a mala guakhalele, Adina nu Kelale nu Benaya nu Maseya nu Matania nu Besalele nu Binuyi nu Manase; 31 mukatshi dia ana a Halima a mala guakhalele, Eliezele nu Yishiya nu Malakiya nu Shemaya nu Simeone, 32 nu Benjame nu Maluka nu Shemaliya; 33 mukatshi dia ana a Hashuma a mala guakhalele, Matenayi nu Matata nu Zabade nu Elifelete nu Yelemayi nu Manase nu Shimeyi; 34 mukatshi dia ana a Bani a mala guakhalele, Madayi nu Amerame nu Wele, 35 nu Benaya nu Bedia nu Keluhu, 36 nu Vania nu Melemota nu Eliyashibe, 37 nu Matania nu Matenayi nu Yasayi; 38 mukatshi dia ana a Binuyi a mala guakhalele, Shimeyi 39 nu Shelemiya nu Natana nu Adaya, 40 nu Makenadebayi nu Shashayi nu Shalayi, 41 nu Azalele nu Shelemiya nu Shemaliya, 42 nu Shaluma nu Amaliya nu Yozefe; 43 mukatshi dia ana a Nebo a mala guakhalele, Yeyele nu Matitia nu Zabade nu Zebina nu Yadayi nu Yowele nu Benaya. 44 Athu awa agasue azudile akhetu a mu ifutshi iko mu ulo, gungima akayele akhetu ene nu an’awo a mala.