Gumonesa Gudi Yone
2 “Sonegela muanjelo wa hungu dia gu Efeso egi: Muthu udi nu themua sambadi ha koko dienji dia madia, udi muwenda ha katshi dia ihagelo ya mienda sambadi ya wolo udi muzuela egi: 2 ‘Ngudi mujiya makalegelo aye nu mudimo waye wakola nu gukolesela guaye. Ngudi mujiya egi wana tshigina ndo athu ana kalagala ndaga jiabola nu waphagele* athu ana zuela egi adi apostolo, uvi ene ashigo apostolo. Wamonele egi adi enya mambo. 3 Aye udi mukolesela nji nu udi mufubidila mukunda nu jina diami nu walebelego muila. 4 Uvi ndaga ngudi gugumonela gubola yenyeyi, ushigo luko nu guzumba gunu wakhalele nago ha thomo.
5 “‘Tangiza fundo wabuile, balumuna mutshima, tshita midimo watshitshile ha thomo, uvi gula watuna gubalumuna mutshima, mbangugujila, mbangukatula gihagelo giaye gia muenda ha fundo dienji. 6 Uvi ndaga yabonga ngudi mumona gudi aye yenyeyi: aye wana tshigina ndo midimo ya Nikola,* ame nji ngana guyitshigina ndo. 7 Muthu udi nu matshui a guvua avue ndaga nyuma idi muwambela mahungu: Muthu mbawubinga, mbangumuhua njila ha gudia mabundu a mutshi wa monyo, unu udi mu phaladiso ya Nzambi.’
8 “Sonegela muanjelo wa hungu dia gu Similene egi: ‘Muthu wa Thomo nu wa Gisugishilo’ yonu wafile gungima wafuzumuga, udi muzuela egi: 9 ‘Ngumujiya malamba aye nu uphutu waye—uvi udi muenya umonyi—ngumujiya athu anyi ana gugushinga, anyi ana zuela egi adi enya Yuda uvi ashigo enya Yuda, ene adi sinagoga ya Satana. 10 Uvigo woma mukunda nu ndaga jidi mutshigina gugubuila. Tegelela! Diabulu mbawulandula gumba athu ako mukatshi dienu mu bologo hagula muajiya gulolewa diago, mbamumona lamba masugu kumi. Khala yagujinginyina uu nu gu gufua, ame mbanguguhua gipho gia lutumbu gia monyo. 11 Muthu udi nu matshui a guvua ave ndaga nyuma idi muwambela mahungu: Muthu mbawubinga, mbagafigo gufua gua mbadi.’
12 “Sonegela muanjelo wa hungu dia gu Phelegame egi: Muthu munu udi nu phogo ya khusa yaleha ya mazo abala udi muzuela egi: 13 ‘Ame mujiya fundo wana khala, yakotelesa fundo diana khala nguasa ya ufumu ya Satana; uvi aye udi ya gujinginyina gu jina diami, wabembelego gusha gutshigina gudi ame ikhale mu masugu ashiyiwe Antipase temue wami wa gujinginyina gu dimbo dienu, fundo diana khala Satana.
14 “‘Uvi gudi nu ima iko ngudi gugumonela gubola. Gudi nu athu ako mukatshi diaye adi mulandula malongo a Balama, yonu walongesele Balaka luholo lua guhaga gikhakhuishilo gutuama dia ana a Isalele, ha gudia ima yahanewe mulambu gudi nzambi jia isongo nu ha gukalagala uthambi.* 15 Luholo lumoshi nji, gudi nu athu ako mukatshi diaye adi mulandula malongo a Nikola.* 16 Hene, balumuna mutshima, gula ndo mbangugujila muphushi, mbangualuisa nu phogo ya khusa yaleha ya mu kano diami.
17 “‘Muthu udi nu matshui a guvua avue ndaga nyuma idi muwambela mahungu: Muthu mbawubinga, mbangumuhana ndambo ya mana asuegewe, mbangumuhana nji gaseso galaphe, gaseso gadi gagusonega jina dihe-dihe holu, dinyi muthu muko gajiyilego gujiya, phamba muthu wagahetshi udi naye gujiya.’
18 “Sonegela muanjelo wa hungu dia gu Tiyatile egi: Mun’a Nzambi munu udi nu meso gifua dimi dia tshuya, udi nu ikanzo gifua kuivre yabonga, udi muzuela egi: 19 ‘Ngudi mujiya makalegelo aye nu guzumba guaye nu gutshigina guaye nu mudimo waye nu gukolesela guaye. Ngudi mujiya egi midimo yaye ya luenyelu idi yavula gubalega inyi ya thomo.
20 “‘Uvi gudi nu ndaga ngudi gugumonela gubola. Udi mubemba mukhetu yowu Yezabele, yonu wana guditamega egi profete, ha gulongesa nu guhuiga ahiga ami ha gukalagala uthambi* nu ha gudia ima yahanewa gudi nzambi jia isongo. 21 Ame ngamubembediele tangua hagula abalumune mutshima, uvi muene gashigo mutshigina gubalumuna mutshima mu uthambi* wenji. 22 Tala! Ngudi hehi ha gumubishila ha gitanda gia misongo. Athu anyi adi mukalagala n’enji uthambi, mbanguabatela lamba diakola gula abalumuinego mitshima mu ndaga jiabola jiana guatuma muene ha gukalagala. 23 Mbangushiya an’enji nu misongo yana bata gu gufua hagula mahungu agasue ajiye egi ame ngana tala ndaga jiagasue jidi mu mutshima nu ndaga muthu wana tangiza,* nu mbangukalegela muthu wagasue ndaga mukatshi dienu gifua mudi makalegelo enji.
24 “‘Uvi athu ako a mu hungu dia Tiyatile anyi alanduilego malongo wawa nu akambelego ha gujiya ndaga athu ako ana tamega egi “gisuegi giakoma gia Satana,” ngudi guawambela egi: Ngushigo gumilezela ginemo giko. 25 Uvi kuatenu mangololo ndaga mudi najio uu nu tangua mbanguza. 26 Muthu mbawubinga nu mbawutumagela ndaga ngazuelele uu nu gu gisugishilo, mbangumuhana ufumu wa guhinyina ifutshi 27 gifua luholo ame ngawuhetele gudi Tata. Muene mbawutuameza ifutshi nu muhango wa utadi, ngenyi, mbayibudiga gifua muana budiga nzungu jia wuma. 28 Mbangumuhana nji themua ya gimenegena. 29 Muthu udi nu matshui a guvua avue ndaga nyuma idi muwambela mahungu.’