Gumonesa Gudi Yone
19 Gungima dia ndaga eji, ngavile dijui gifua dijui diakola dia thundu yakoma ya athu mu dilu. Azuelele egi: “Tumbuisenu Yah!* Guhuluga nu lutumbu nu ngolo jiakhala jia Nzambi wetu, 2 handaga usopheshi wenji udi wa giamatshidia nu watagana. Wasophesa mukhetu wakoma wa thambi munu wabolesele mavu nu uthambi* wenji nu wavutula gubola mukunda nu mahatshi a ahiga enji, anyi adi ha mago a mukhetu muene.”* 3 Nu dishimbu ndo, azuelele luko mbala ya ngiadi egi: “Tumbuisenu Yah!* Mishi ya dimbo diakondewe idi mukanduga ivo nu ivo.”
4 Akulu 24 nu ba sheribe muwana afugamele nu akombelele Nzambi munu udi ya gukhala ha nguasa ya ufumu nu azuelele egi: “Amen! Tumbuisenu Yah!”*
5 Dijui dimoshi diakatugile nji mu nguasa ya ufumu, diazuelele egi: “Tumbuisenu Nzambi wetu, enue ahiga enji agasue muana gumuvila woma, athu azonda nu athu akoma.”*
6 Ngavile matululu gifua dijui dia thundu yakoma ya athu, gifua matululu a meya avula nu gifua matululu a miandu yakola. Azuelele egi: “Tumbuisenu Yah,* handaga Yehowa Nzambi wetu, Nzambi wa Ngolo Jiagasue wasendesa guhinyina! 7 Tusuangulugenu muavula, tumutumbuisenu handaga ulo wa Mun’a Gimeme waheta, mukaji’enji wadilondega gale. 8 Ayi, amuhanele luendu lua gusudiga linene idi mungedima yaphelegeta nu yabonga. Linene yabonga idi mumonesa makalegelo atagana a athu a gijila.”
9 Muanjelo wanguwambelele egi: “Sonega: Gusuanguluga gudi nu athu atamegewa mu gudia gua mu ngueze gua ulo wa Mun’a Gimeme.” Wanguwambelele luko egi: “Jiji mbimbi jia giamatshidia jiazuela Nzambi.” 10 Hene, ngabuile gu ikanzo yenji ha gumukombelela. Uvi wanguwambelele egi: “Ndo! Utshitshigo ngenyi! Ame nji ngudi muhiga gifua aye nu muhiga wa aphangi’aye anyi adi mutshita mudimo wa gulongesa lukuma luatadila Yesu. Kombelela Nzambi! Handaga gishina gia profesi gidi gulongesa giamatshidia giatadila Yesu.”
11 Ngamonele dilu dia gukanguluga! Ngamonele nji gabalu galaphe. Muthu wakhalele holu dia gabalu gene jina dienji Gujinginyina nu Giamatshidia. Wana sophesa nu wana lua ita mu luholo luatagana. 12 Meso enji adi gifua dimi dia tshuya, udi nu ipho ya ufumu yavula holu dia muto wenji. Udi ya gusonega jina dinyi muthu muko gajiyilego gujiya, phamba muene. 13 Udi ya gusudiga mulele wa holu udi nu matona a mahatshi, wana tamegewa egi Mbimbi ya Nzambi. 14 Masuta a mu dilu akhalele nji gumulandula holu dia tubalu tulaphe. Akhalele agusudiga linene ilaphe, yaphelegeta nu yabonga. 15 Phogo ya khusa yaleha ya mazo abala idi muzoga mu kano guenji. Yene mbayiwasela muene ifutshi. Mbawutuameza ifutshi yene nu muhango wa utadi. Muene udi mukama mabundu a vinyo mu gikamelo gia khabu jiakola jia Nzambi wa Ngolo Jiagasue. 16 Holu dia mulele wenji wa holu, ayi, holu dia kulu dienji, hadi ha gusonega jina dimoshi, Fumu wa mafumu nu Muhinyinyi wa ahinyinyi.
17 Ngamonele nji muanjelo muko mumagana gu kumbi, wakologogele mu dijui diakola nu wawambelele tunjila tuagasue tuana zuga ha katshi na katshi dia dilu* egi: “Izenu haha, dibungisenu gu wano wakoma wa Nzambi, 18 hagula mudie misunyi ya mafumu, nu ya mafumu a masuta, nu ya enya ngolo, nu ya tubalu, nu ya athu adi holu dia tubalu tuene, nu misunyi ya athu agasue, ya athu anyi ashigo ahiga nu ya ahiga, nu ya athu azonda nu ya athu akoma.”*
19 Ngamonele shitu ya mu foto nu mafumu a ha mavu nu masuta awo a gudibungisa ha guya muluisa muthu udi holu dia gabalu nu masuta enji. 20 Akuatele shitu ya mu foto nu profete wa mambo munu wakhalele mukalagala ndaga jia gushimana ha meso ayo, ha guhuiga athu anyi ambiwe njimbu ya shitu ya mu foto nu athu anyi akhalele mukombelela gifuanesa gia shitu yene. Mukut’awo agasue mbadi abishidiwe nu monyo mu kianga gia tshuya gia sufre. 21 Uvi athu anyi asalele, ashiyiwe gu phogo ya khusa yakhalele muzoga mu kano dia muthu munu udi holu dia gabalu. Tunjila tuagasue tuakutshile misunyi ya mila yawo.