Mukanda wa Mbadi wa Gudilanduluila

5 Salomo wamanesele midimo yagasue yakhalele naye gutshita muene mukunda nu inzo ya Yehowa. Gungima wabatele ima inyi sh’enji Davidi wabuishile ya gijila. Wambile utadi wa siliva nu wolo nu ima iko yagasue mu sugu akhalele mubambela ima ya ndando ya mu inzo ya Nzambi wa giamatshidia. 2 Mu tangua diene, Salomo watamegele akulu a gu Isalele, mafumu agasue a iphuta nu mafumu a fami jia gu Isalele. Ajile gu Yelusalema ha gubata mushete wa gikotelo wa Yehowa wakhalele mu Dimbo dia Davidi, yakotelesa egi Siona. 3 Enya Isalele agasue adibungishile gutuama dia fumu mu tangua dia wano* wana kalegewa mu mbeji ya 7.

4 Tangua akulu agasue a gu Isalele ahetele, enya Levi athuphudile Mushete. 5 Abatele Mushete nu tenta ya gudibungishila nu ikadigilo yagasue ya gijila yakhalele mu tenta yene. Nganga-nzambi nu enya Levi* abatele ima yene. 6 Fumu Salomo nu enya Isalele agasue anyi atamegewe ha gudimona n’enji akhalele gutuama dia Mushete. Ahanele milambu ya imeme nu ngombe jiavula, guakhalelego nu luholo lua guyitanga. 7 Gungima nganga-nzambi jiahagele mushete wa gikotelo wa Yehowa ha fundo dienji, goshi’a mahambu a basheribe mu sugu ya mukatshi ya monzo, yakotelesa egi Fundo Diabalega Gijila. 8 Mahambu a basheribe akhalele a gusununa holu ha fundo diakhalele Mushete ha gutshuiga Mushete nu mihitu yenji. 9 Mihitu yene yakhalele yaleha diago, songi jienji jiakhalele mumonega uu nu ha Fundo dia Gijila gutuama dia sugu ya mukatshi, uvi jiakhalelego mumonega hanze. Mihitu yene yana khala guene uu nu mangino. 10 Guakhalelego nu gima giko mukatshi dia Mushete, phamba maseso mbadi ambile Moize mu Mushete wene gu Horebe tangua Yehowa wakotele gikotelo nu enya Isalele hazogele ene gu Ejipitu.

11 Tangua nganga-nzambi jiazogele ha fundo dia gijila (handaga nganga-nzambi jiagasue jinyi jiakhalele hene jiadiphelegetesele* ikhale jiakhalele mu hunji ditshi), 12 enya Levi agasue anyi akhalele ngimba anyi akhalele mutuamezewa gudi Asafe nu Hemane nu Yedutuna nu gudi an’awo a mala nu aphangi’awo a mala, akhalele a gusudiga milele ya linene yabonga. Akhalele nu sembale ha mago nu ima ya gushigila miziki yana khala nu shinga nu itare; akhalele a gumagana gu khanda ya mazogelo a kumbi a giwotshielo, akhalele nji nu nganga-nzambi 120 jiakhalele mushiga phungi. 13 Tangua ashigi a phungi nu ngimba akhalele mutumbuisa Yehowa nu gumuhana mersi hamoshi, majui a phungi nu a sembale nu a ima iko ya gushigila miziki akhalele mukanduga; hakhalele ene mutumbuisa Yehowa, “handaga muene udi wabonga; guzumba guenji gua giamatshidia guana khala mayilago,” tuta diazalele pha mu tempelo, inzo ya Yehowa. 14 Nganga-nzambi jiakhalelego nu luholo lua gulandula gutshita mudimo mukunda nu tuta diene, handaga lutumbu lua Yehowa luazalele mu inzo ya Nzambi wa giamatshidia.