Mukanda wa Thomo wa Gudilanduluila
21 Lusugu lumoshi, Satana* wazudile desizio dia guluisa enya Isalele; washinjigile nji Davidi ha gutanga enya Isalele. 2 Hene Davidi wawambelele Yoabe nu mafumu a athu egi: “Ndenu mutange enya Isalele sendese gu Belesheba uu nu gu Dane; gungima muze munguwambele hagula ngujiye gula adi guvula gutshi.” 3 Uvi Yoabe wamuwambelele egi: “Yehowa avudise athu enji mbala 100! Fumu, athu awa agasue ana khala gale enya mudimo aye. Na mukunda natshi udi mutshigina gukalagala ndaga ya luholo elu? Mukunda natshi udi mutshigina gunginyisa enya Isalele mu gubola?”
4 Uvi fumu watunyile ndaga yamuwambelele Yoabe. Yoabe wayile, wawendele gu Isalele yagasue, gungima wavutugile gu Yelusalema. 5 Yoabe wahanele Davidi mutango wa athu anyi atangewe: enya Isalele agasue anyi akhalele atagana ha gulua nu phogo jia khusa akhalele 1 100 000, uvi mala a enya Yuda anyi akhalele atagana ha gulua nu phogo jia khusa akhalele 470 000. 6 Uvi enya giphuta gia Levi nu gia Benjame atangewego mukatshi dia athu ene, handaga mbimbi jiazuelele fumu jiasuanguluishilego Yoabe.
7 Ndaga yene yasuanguluishilego Nzambi wa giamatshidia. Hene, wahanele enya Isalele ndola. 8 Davidi wawambelele Nzambi wa giamatshidia egi: “Ngatshita gubola guakoma luholo ngatanga athu. Ngabuba, totesela muenya mudimo waye gubola guenji handaga ngatshitshi ndaga nu guheya guagasue.” 9 Gungima Yehowa wawambelele Gade, muthu wa Davidi wakhalele mumona vizio egi: 10 “Nda uwambele Davidi egi: ‘Yehowa wazuela egi: “Ngudi nu ndola thathu jia guguhana. Tomba ndola imoshi ngudi naye guguhana.”’” 11 Hene, Gade wanginyile mu inzo ya Davidi, wamuwambelele egi: “Yehowa wazuela egi: ‘Ndola itshi udi mutshigina? 12 Udi mutshigina egi nzala ingine mu gifutshi ivo thathu, nga ndo ukhale mulenga mbalagaji jiaye mbeji thathu? Mu mbeji jiene, phogo ya khusa ya mbalagaji jiaye mbayigusagesa. Nga udi mutshigina egi phogo ya khusa ya Yehowa isagese gifutshi masugu thathu? Mu masugu ene thathu, misongo ya gisambugila mbayingina mu gifutshi, muanjelo wa Yehowa mbawushiya athu agasue gu Isalele.’ Tangigiza muabonga hagula nguye nguwambele muthu wangutumi.” 13 Davidi wawambelele Gade egi: “Ngudi nu gikenene giavula. Ngabuba, ngudi mutshigina egi ngubue ha mago a Yehowa handaga udi muenya khenda jiavula diago. Uvi ngubuigo ha mago a muthu.”
14 Gungima Yehowa watumine misongo ya gisambugila gu Isalele, enya Isalele 70 000 afuile. 15 Gungima Nzambi wa giamatshidia watumile muanjelo ha gushiya Yelusalema. Uvi tangua Yehowa wamonele egi muanjelo muene udi mutshigina gushiya dimbo, wavuile gikenene* mukunda nu lamba diene. Wawambelele muanjelo wakhalele mutshigina gushiya dimbo egi: “Guahui! Shigula koko diaye.” Muanjelo wa Yehowa wakhalele wa gumagana hehi nu fundo dia gusuwila mbuto dia Olenana muenya Yebuse.
16 Tangua Davidi watuphuile meso, wamonele muanjelo wa Yehowa wa gumagana hakatshi dia mavu nu dilu nu phogo ya khusa ha mago ya gusununa gu khanda ya Yelusalema, Davidi nu akulu asudigile sagi, abuile mbala imoshi phala mu mavu. 17 Davidi wawambelele Nzambi wa giamatshidia egi: “Ame ngatogele egi atange athu. Gubola gudi guami, ame ngatshitshi ndaga yabola. Uvi imeme eyi yatshita itshi? Oo Yehowa Nzambi wami, ngabuba, nguhane ame ndola nu enya fami ya tata wami. Uvi ubatelago athu aye malamba awa.
18 Muanjelo wa Yehowa wawambelele Gade ha guwambela Davidi egi akanduge ha fundo dia gusuwila mbuto dia Olenana muenya Yebuse, atunge giwotshielo mukunda nu Yehowa guene. 19 Hene Davidi wakandugile gifua muamuwambelele Gade mu jina dia Yehowa. 20 Mu tangua diene, Olenana wakhalele musuwa mbuto jia ble. Wabalumugile, wamonele muanjelo, hene muene nu an’enji a mala nguana akhalele n’enji adisuegele. 21 Davidi wayile gudi Olenana. Tangua Olenana wamumonele muza, wakatugile mbala imoshi ha fundo dia gusuwila mbuto, wayile mufugama gutuama dia Davidi, washiwugile phala mu mavu. 22 Davidi wawambelele Olenana egi: “Ngudigile* fundo edi dia gusuwila mbuto hagula ngutungile Yehowa giwotshielo. Ngudi gudisumba mu ndando yadio yagasue hagula malamba adi mubuila athu ahue.” 23 Uvi Olenana wawambelele Davidi egi: “Fumu, zula gaye fundo diene dibue diaye, utshite ndaga yagasue idi yabonga gu meso aye.* Ngudi guguhana ngombe mukunda nu milambu ya guwotshia. Mukunda nu khunyi, tudi nu mitshi ya gusuwila mbuto, wajiya guyizula nu mbuto jia ble mukunda nu mulambu wa mbuto. Ngaguhana ima eyi yagasue.”
24 Uvi Fumu Davidi wawambelele Olenana egi: “Ndo, ngudi gudisumba mu ndando yadio yagasue, handaga ngajiyilego guzula ima yaye nguyihane gudi Yehowa. Ngajiyilego nji guhana milambu ya guwotshia yangutelego nga gima.” 25 Hene Davidi wahanele Olenana wolo wakhalele nu gunema gua bashekele* 600 mukunda nu fundo diene. 26 Gungima Davidi watungile giwotshielo mukunda nu Yehowa, wahanele milambu ya guwotshia nu milambu ya guhuima. Gungima wakombelele Yehowa, muene wamuhanele mvutu, tshuya tuakatugile mu dilu, tuakondele milambu yakhalele ha giwotshielo gia milambu ya guwotshia. 27 Gungima Yehowa wawambelele muanjelo ha guvutula phogo yenji ya khusa mu gindalo. 28 Mu tangua diene, Davidi wakotelesele egi Yehowa wamuhanele mvutu ha fundo dia gusuwila mbuto dia Olenana muenya Yebuse. Hene, walanduile guhana milambu guene. 29 Uvi mu tangua diene, tabernakle ya Yehowa inyi yalondele Moize mu mavu a luselenga nu giwotshielo gia milambu ya guwotshia yakhalele ha fundo dia gukombelela* gu Gibeona. 30 Uvi Davidi gayilego gutuama dia giwotshielo giene ha guhula Nzambi, handaga wavuile woma wa phogo ya khusa ya muanjelo wa Yehowa.