Gudi Enya gu Efeso
6 Ana, tumagelenu mvuaji jienu mu gudivua nu Fumu, handaga idi ndaga yabonga. 2 “Nemesa sh’aye nu gin’aye,” wuwu mukhuala wa thomo udi nu laji didi muzuela egi: 3 “Ndaga jiagasue mbajiyila muabonga mukunda nu eye,* mbawukhala nji nu monyo masugu avula ha mavu.” 4 Enue atata muhanyigo an’enu khabu, uvi landulenu guasansa mu malongo nu mu mikhuala ya Yehowa.
5 Enue ahiga, tumagelenu mafumu enu nu woma nu gudigita, atumagelenu nu mutshima umoshi gifua luholo muana tumagela Klisto, 6 muatumagelago phamba tangua athu adi gumitala ha guasuanguluisa,* uvi atumagelenu gifua ahiga a Klisto adi mukalagala gutshigina gua Nzambi nu mutshima umoshi. 7 Tshitenu mudimo nu matangi abonga gifua mudi mukalegela Yehowa uvi athu ndo, 8 handaga mudi mujiya egi Yehowa mbawushimbiga muthu wagasue mukunda nu ndaga yagasue yabonga idi mutshita muene, ikhale muthu muene udi muhiga nga ndo. 9 Enue mafumu kalegelenu nji ahiga enu ndaga mu luholo luabonga, muasagesago handaga mudi mujiya egi enue nu ahiga enu mudi nu Fumu mumoshi udi mu dilu, muene gakhala ndo nu khadilo dia gukhaphumuna.
10 Ha gusugisa, landulenu guheta ngolo gudi Fumu handaga muene udi nu ngolo jiavula. 11 Sudigenu iluilo yagasue yana hana Nzambi hagula mubuigo mu miheto* ya Diabulu; 12 handaga tushigo mulua nu mahatshi nu muila, uvi tudi mulua nu baguvernema nu mafumu nu ahinyinyi a ha mavu awa adi mu phipha nu nyuma jiabola jia mu mafundo a mu dilu. 13 Gishina giene, sudigenu iluilo yagasue yana hana Nzambi hagula muajiya gubinga gula mbalagaji wamiluisa.* Ngenyi gula mualua uu nu gu gisugishilo, mbamusala yagumagana tenyi.
14 Khalenu yagumagana, sudigenu giamatshidia gifua mukaba ha kete.* Tshitenu ndaga jiabonga gifua muthu wasudiga gazawu ga ita ha thulo ha gudibamba. 15 Sudigenu gikhesa gia gulongesa lukuma luabonga lua guhuima gifua saphata gu malu enu. 16 Zangulenu nji tshibu yakoma ya gutshigina, ha gujima mifula yagasue ya tshuya idi musonona Diabulu.* 17 Tshiginenu nji gifulu giajiya gumikuatesa ha guhuluga, nu phogo ya khusa ya mu nyuma, yakotelesa egi mbimbi ya Nzambi. 18 Kalagalenu isambu ya maluholo agasue, khalenu mububila Nzambi tangua diagasue mu gudivua nu nyuma yenji. Khalenu nji nu gikolekole, bubilenu Nzambi tangua diagasue mukunda nu athu agasue a gijila. 19 Kombelelenu nji mukunda nu ame hagula tangua ngudi mutshigina guzuela, Nzambi anguhane mbimbi jia guzuela, nu hagula nguvigo woma wa guzuelela gisuegi gia gijila giatadila lukuma luabonga. 20 Mukunda nu lukuma luene, ngudi mutumiwi udi wagujitshigiwa malenge hagula ngajiya guzuelela lukuma luene nu gikhesa gifua luholo ngudi naye guzuela.
21 Tishike mun’etu wa guzumba, mukuateshi wa gufubidila mu mudimo wa Fumu, uza gumitela lumene lua ndaga jiagasue hagula mujiye luholo ngudi nu ndaga ngudi mukalagala. 22 Gishina giene ngudi gumitumila n’enji, hagula mujiye luholo tudi nu ha gumihana gikhesa.*
23 Tata Nzambi nu Fumu Yesu Klisto ahane aphangi guhuima, a akuatese ha guzumba athu ako nu ha gukhala nu gutshigina. 24 Nzambi amonese khenda jienji jiavula gudi athu agasue ana zumba Fumu wetu Yesu Klisto mayilago.