Lutango
24 Tangua Balama wakotelesele egi Yehowa wakhalele genji mutshigina* gushimbiga enya Isalele, gayilego luko mukamba* gujiya gula ndaga yabola mbayibuila enya Isalele; uvi wabalumugile, watalele mu mavu a luselenga. 2 Tangua Balama wathuphudile meso, wamonele egi enya Isalele ahagi phundo yawo mu giphuta nu giphuta, wahetele nyuma ya Nzambi. 3 Gungima watele gishima egi:
“Eji ndaga jidi muzuela Balama mun’a Beole,
Ndaga jidi muzuela muthu munu meso akangudiwe,
4 Ndaga jidi muzuela muthu udi mutegelela mbimbi ya Nzambi,
Muthu wamonele vizio ya Nzambi wa Ngolo Jiagasue,
Muthu wafugamele meso a gukangula:
5 Oo Yakoba, tenta jiaye jidi jiabonga,
Oo Isalele, jinzo jiaye jia tenta jidi jiabonga!
6 Jidi muya gualeha gifua mababa,
Gifua ilanga idi hehi nu muta,
Gifua tumitshi tua alowe tuakunyile Yehowa,
Gifua mitshi ya sedre idi hehi nu meya.
7 Meya adi mulandula guzoga mu bakantine enji mbadi alondewe nu ilema ya shitu,
Mbuto* jienji jiakunyiwe hehi nu meya avula.
Fumu wenji mbawukhala nji nu lutumbu luavula gubalega Agaga,
Ufumu wenji mbawukhala wakola.
8 Nzambi wazolele Isalele gu Ejipitu;
Muene udi gifua mbinga jia ngombe yakoma ya mulume mukunda nu Isalele.
Isalele mbawushiya ifutshi, athu ana gumusagesa,
Mbawubogola ifuwa yawo nu mbawaashiya nu mifula yenji.
9 Wabanda, wabanda hashi gifua khoshi,
Nanyi wajiya gumuzugisa?
Athu adi gugushimbiga, ene nji ana shimbigiwa,
Athu adi guguta mukumbu, ene nji ana gutewa mukumbu.”
10 Gungima Balaka wavuidile Balama khabu jiakola. Wabundjile giphuphu, wawambelele Balama egi: “Ngagutamega haha ha guta mbalagaji jiami mukumbu, uvi aye waashimbiga mbala thathu. 11 Henyaha vutuga gumbo diaye. Ngatshigina guguhana lutumbu luavula, uvi Yehowa wagukanga njila ha guheta lutumbu luene.”
12 Balama wavutudile Balaka egi: “Ngawambelele athu watumile egi: 13 ‘Ikhale Balaka wanguhana inzo yenji yaguzala pha nu utadi wa siliva nu wolo, ngajiyile ndo gutshita nga ndaga imoshi mu gutshigina guami hakhami, ikhale yabonga nga yabola, inyi ishigo gudivua nu ndaga yanguwambela Yehowa. Mbanguzuela phamba ndaga Yehowa mbawunguwambela.’ 14 Henyaha ngudi muvutuga gami gudi akuaku’ami. Iza nguguwambele ndaga athu awa mbaatshita athu aye mu masugu adi muza.”* 15 Gungima Balama watele gishima egi:
“Eji ndaga jidi muzuela Balama mun’a Beole,
Ndaga jidi muzuela muthu munu meso akangudiwe,
16 Ndaga jidi muzuela muthu udi mutegelela mbimbi ya Nzambi,
Muthu udi nu ujiyi wa Nzambi wa Gudinyinyiga,
Muthu wamonele vizio ya Nzambi wa Ngolo Jiagasue
Hakhalele muene yagufugama meso a gukangula:
17 Mbangumumona, uvi henyaha ndo,
Mbangumutala, uvi luenyelu ndo.
Themua mbayizoga gudi Yakoba,
Muhango wa ufumu mbawuzoga gu Isalele.
Muene mbawumuanga diago mbombo ya Moaba,
Mbawubula nji ibozo-bozo ya mito ya mbundudi jiagasue.
18 Mavu a Edome mbaabua a Isalele,
Yadiago, mavu a Seyile mbaabua a mbalagaji wenji,
Tangua Isalele mbawumonesa ngolo jienji.
19 Mujigulu mumoshi wa Yakoba mbawubinga mbalagaji jienji,
Mbawushiya athu agasue anyi mbaasala nu monyo mu dimbo.”
20 Hamonele muene Amaleke, walanduile guta gishima egi:
“Amaleke yakhalele gifutshi gia thomo mukatshi dia ifutshi,
Uvi gu gisugishilo mbagishiyiwa.”
21 Hamonele muene enya Kena, walanduile guta gishima egi:
“Inzo yaye idi mu ubambi, fundo diaye dia gukhala didi holu dia seso.
22 Uvi muthu mumoshi mbawukonda Kaine tshuya.
Masugu guvula gutshi asala hagula enya Asiliya agubate mu uhiga?”
23 Walanduile guta gishima egi:
“Idi lamba! Nanyi mbawusala nu monyo tangua Nzambi mbawutshita ndaga eyi?
24 Masuwa mbaakatuga gu mbungu ya Kitime, mbaaza,
Ene mbaamonesa Asiliya lamba,
Mbaamonesa Ebere lamba.
Uvi muene nji mbawushiyiwa diago.”
25 Gungima Balama wavutugile gumbo dienji. Balaka nji wayile genji.