Yoshua
7 Uvi enya Isalele atumagelego ndaga jiaawambelele Nzambi, azudile ima yakhalele naye gushiyiwa. Akana mun’a Kalemi, mujigulu wa Zabedi wa mu fami ya Zela wa mu giphuta gia Yuda, wazudile ndambo ya ima mukatshi dia ima yakhalele naye gushiyiwa. Hene Yehowa wavuidile enya Isalele khabu jiakola.
2 Hakhalele ene gu Yeliko, Yoshua watumine mala mu dimbo dia Ayi diakhalele hehi nu Bete-Avene, gu khanda ya mazogelo a kumbi a Betele. Waawambelele egi: “Ndenu mutale dimbo dia Ayi nu mafundo ako adi hehi nu dimbo diene.” Mala ene ayile, atalele dimbo dia Ayi mu gisuegi. 3 Tangua avutugile gudi Yoshua, amuwambelele egi: “Utumigo athu agasue ha guya guene. Mala 2 000 nga 3 000 adi avula ha gubinga dimbo dia Ayi. Utumigo masuta agasue, gula ndo udi mulaba guahuidisa handaga dimbo diene didi nu athu azonda.”
4 Hene, masuta hehi nu 3 000 akandugile gu Ayi, uvi alengele enya gu Ayi. 5 Enya gu Ayi ashiyile masuta 36 a gu Isalele, a alanduile hanze ya mufulo wa dimbo uu nu gu Shebalima,* ayile nu guashiya tangua akhalele mubulumuga. Hene mitshima ya athu yasendesele gubudiga, mila yaalebele.
6 Yoshua watawudile milele yenji, muene nu akulu a gu Isalele afugamele, abuile phala mu mavu gutuama dia Mushete wa Yehowa uu nu mu ngueze, akhalele gudimba fuphi mu muto. 7 Yoshua wazuelele egi: “Oo Yehowa Fumu Wabalega Gukoma, wabatshi athu agasue ha sambua dia Muta wa Yordane hagula uze utuhane ha mago a enya Amole ha gutushiya ba? Ngatuasalele getu ha sambua dinyi* dia Muta wa Yordane! 8 Oo Yehowa, ngabuba, henyaha itshi ngajiya guzuela luko? Enya Isalele alenga gutuama dia mbalagaji jiawo! 9 Tangua enya Kanana nu athu agasue a mu gifutshi mbaavua ndaga eyi, mbaatujieta, mbaatotesa diago jina dietu ha mavu. Itshi mbawutshita mukunda nu jina diaye diakoma?”
10 Yehowa wavutuile Yoshua egi: “Zuga! Mukunda natshi udi ya gufugama phala mu mavu? 11 Enya Isalele akalagala gubola. Ashiyi gikotelo giami ngaawambelele ha gunemesa. Azudi ima iko yakhalele naye gushiyiwa. Ayikuyi, ayisuega mukatshi dia ima yawo. 12 Hene, enya Isalele mbaashigo mubinga mbalagaji jiawo. Mbaalenga gutuama dia mbalagaji jiawo, handaga abui gima gidi naye gushiyiwa. Mbangushigo mukhala n’enu gula muakatudilego muthu udi naye gushiyiwa mukatshi dienu. 13 Zuga uphelegetese athu! Awambele egi: ‘Hamene mbamudiphelegetesa handaga Yehowa Nzambi wa Isalele wazuela egi: “Oo Isalele, gima gidi naye gushiyiwa gidi mukatshi dienu. Mbamushigo mubinga mbalagaji jienu gula muakatudilego gima giene mukatshi dienu. 14 Hamene mu gimenegena mudi naye guza giphuta nu giphuta, giphuta ginyi Yehowa mbawutomba mbagisuena hehi; fami nu fami, fami inyi Yehowa mbawutomba mbayisuena hehi; inzo nu inzo, inzo inyi Yehowa mbawutomba mbayisuena hehi, yala nu yala. 15 Muthu mbaasanga nu gima gidi naye gushiyiwa, mbawukondewa ha tshuya, muene nu ima yenji yagasue handaga washiyi gikotelo gia Yehowa nu wakalagala ndaga ya musonyi gu Isalele.”’”
16 Mu lusugu lualanduile, Yoshua wazugile nu gimenegena giagasue, wawambelele enya Isalele ha gusuena hehi, giphuta nu giphuta, giphuta gia Yuda giatombewe. 17 Wawambelele fami jia mu giphuta gia Yuda ha gusuena hehi, fami ya Zela yatombewe. Gungima wawambelele fami ya Zela ha gusuena hehi yala nu yala, Zabedi watombewe. 18 Gungima watamegele enya inzo ya Zabedi ha gusuena hehi, yala nu yala, Akana mun’a Kalemi, mujigulu wa Zabedi wa mu fami ya Zela wa mu giphuta gia Yuda watombewe. 19 Yoshua wawambelele Akana egi: “Mun’ami ngabuba, tumbuisa Yehowa Nzambi wa Isalele, muwambele gubola watshitshi. Ngabuba, nguwambele ndaga watshitshi. Ungusuegelago.”
20 Akana wavutuile Yoshua egi: “Yadiago, ame ngakalagala gubola gu meso a Yehowa Nzambi wa Isalele. Ndaga ngatshitshi yenyeyi: 21 Tangua ngamonele mulele wabonga wa gu Shineale mukatshi dia ima tuatambudile gu ita, nu bashekele* 200 a utadi wa siliva nu gitshinyi gia wolo gunema bashekele 50, yangusuanguluishile, hene ngayizudile. Idi ya guvumbiga mu tenta yami, makuta adi goshi.”
22 Yoshua watumile athu mbala imoshi, ayile muphushi mu tenta ya Akana. Amonele mulele wagusuega muene nu makuta goshi. 23 Hene, azudile ima yene mu tenta, ayibatele gudi Yoshua nu gudi enya Isalele agasue, ayihagele gutuama dia Yehowa. 24 Gungima Yoshua nu enya Isalele agasue akhalele n’enji azudile Akana mun’a Zela nu utadi wa siliva nu mulele wabonga nu gitshinyi gia wolo, nu an’enji a mala nu a akhetu nu ngombe jienji nu phunda nu imeme nu khombo jienji nu tenta yenji nu ima yenji yagasue, ayibatele mu baba dia Akola. 25 Yoshua wazuelele egi: “Mukunda natshi watubatela malamba? Yehowa udi gugubatela nji malamba mangino.” Hene, enya Isalele agasue a asonuene maseso, gungima a akondele tshuya. Luene luholo a ashiyile nu maseso. 26 Ahagele musonga wa maseso holu dia kimbi gia Akana. Musonga wene wuwu guene uu nu mangino. Hene khabu jiakola jia Yehowa jiahuile. Gishina giene fundo diene diana tamegewa uu nu mangino egi baba dia Akola.*