Yoshua
22 Gungima Yoshua watamegele enya giphuta gia Ribene nu gia Gade nu gitshinyi gia giphuta gia Manase, 2 waawambelele egi: “Muakalagala ndaga jiagasue jiamiwambelele Moize muenya mudimo wa Yehowa, muatumagela nji ndaga jiagasue ngamiwambelele. 3 Muabembelego aphangi’enu masugu awa agasue uu nu mangino; muatumagela nji ndaga yamiwambelele Yehowa Nzambi wenu. 4 Henyaha Yehowa Nzambi wenu wahana aphangi’enu guhuima, gifua luholo luaalayele muene. Muajiya giwa guvutuga mu tenta jienu mu mavu amihuile Moize muenya mudimo wa Yehowa ha sambua diko* dia Yordane. 5 Tshitenu yagasue ha gutumagela ndaga jiamiwambelele Moize muenya mudimo wa Yehowa nu Mikhuala yamihanele muene, ha guzumba Yehowa Nzambi wenu, ha guwenda mu njila jienji jiagasue, ha gutumagela mikhuala yenji, ha gusala yagujinginyina gudi muene nu ha gumukalegela nu mutshima wenu wagasue nu monyo* wenu wagasue.”
6 Gungima Yoshua waashimbigile, waawambelele ha guya, avutugile mu tenta jiawo. 7 Moize wahanele gitshinyi gia giphuta gia Manase khapho gu Bashana, uvi Yoshua wahanele gitshinyi giko gia giphuta gia Manase khapho gu khanda ya mayilo a kumbi a Yordane mukatshi dia aphangi’awo. Tangua Yoshua waawambelele ha guvutuga mu tenta jiawo, waashimbigile, 8 waawambelele egi: “Vutugenu mu tenta jienu nu umonyi wavula nu shitu jiavula nu utadi wa siliva nu wolo nu kuivre nu utadi nu milele yavula diago. Zulenu nji ima muatambula gu ita gudi mbalagaji jienu, mukhaphe nu aphangi’enu.”
9 Gungima enya giphuta gia Ribene nu gia Gade nu gitshinyi gia giphuta gia Manase adikhaphele nu enya Isalele ako gu Shilo mu gifutshi gia Kanana, avutugile mu mavu a Gileade, mavu azudile ene ha gukhala gifua luholo Yehowa wawambelele Moize. 10 Tangua enya giphuta gia Ribene nu gia Gade nu gitshinyi gia giphuta gia Manase ahetele gu khanda ya Yordane mu gifutshi gia Kanana, atungile giwotshielo giakoma diago hehi nu Yordane. 11 Gungima enya Isalele avuile egi: “Enya giphuta gia Ribene nu gia Gade nu gitshinyi gia giphuta gia Manase atungi giwotshielo mu mudidilo wa mavu a Kanana, gu khanda ya Yordane ha sambua dia enya Isalele.” 12 Tangua enya Isalele avuile ndaga yene, mukut’awo agasue adibungishile gu Shilo ha guya gualuisa.
13 Gungima enya Isalele atumine Fineyase mun’a nganga-nzambi Eleazale gudi enya giphuta gia Ribene nu gia Gade nu gudi gitshinyi gia giphuta gia Manase mu mavu a Gileade. 14 Mafumu kumi ayile n’enji, mu giphuta giagasue fumu mumoshi; mukut’awo agasue akhalele mafumu a fami jiawo mukatshi dia iphuta ya enya Isalele. 15 Tangua ahetele gudi enya giphuta gia Ribene nu gia Gade nu gitshinyi gia giphuta gia Manase mu mavu a Gileade, a awambelele egi:
16 “Athu agasue a Yehowa azuela egi: ‘Mukunda natshi muakalegela Nzambi wa Isalele ndaga yabola ya luholo elu? Mangino muabemba gulandula Yehowa luholo muatunga giwotshielo gienu hakhenu, mualumbugila Yehowa. 17 Gubola guakalegewe gu Pheole guatutagenelego ba? Uu nu mangino khenji tuadiphelegetesele galego mu gubola guene, ngatshima lamba diabuidile athu a Yehowa. 18 Uvi enue mangino mudi mutshigina gubemba gulandula Yehowa. Gula mualumbugila Yehowa mangino, hamene muene mbawuvuila enya Isalele agasue khabu. 19 Gula muatshitshi ngenyi handaga mavu enu adi usala, zawugenu muze mu mavu a Yehowa, fundo didi tabernakle ya Yehowa, mukhale mukatshi dietu. Uvi mulumbugilago Yehowa, mutungigo giwotshielo giko hagula ibuigo gifua esue nji tudi gumulumbugila, handaga tudi gale nu giwotshielo gia Yehowa Nzambi wetu. 20 Tangua Akana mun’a Zela watunyile gutumagela ndaga jiazuelele Nzambi mukunda nu ima yakhalele naye gushiyiwa, lamba diabuidile enya Isalele agasue. Akana gafuilego muene hakhenji mukunda nu gubola guenji.’”
21 Enya giphuta gia Ribene nu gia Gade nu gitshinyi gia giphuta gia Manase avutudile mafumu a fami* jia Isalele egi: 22 “Yehowa Nzambi wa jinzambi!* Yehowa Nzambi wa jinzambi! Muene udi mujiya, enya Isalele nji aza mujiya. Gula tualumbugila Yehowa nu tushigo ya gujinginyina gudi muene, gatubembigo nu monyo mangino. 23 Gula tuatungi giwotshielo ha gulumbugila Yehowa nu ha guhana milambu ya guwotshia nu milambu ya mbuto nu milambu ya guhuima hene, Yehowa mbawutuhana ndola. 24 Matangi etu akhalelego ngenyi, tuazuelele egi: “Mu masugu adi muza, an’enu mbaahula an’etu egi: ‘Mukunda natshi muana kombelela Yehowa Nzambi wa Isalele?* 25 Yehowa wahagele Yordane gifua mudidilo hakatshi dietu nu enue enya giphuta gia Ribene nu enya giphuta gia Gade. Mushigo nga nu khapho dimoshi nu Yehowa.” Ngenyi an’enu mbaatunyisa an’etu ha gukombelela* Yehowa.’
26 “Hene tuazuelele egi: ‘Tutungenu giwotshielo; giwotshielo giene gishigo mukunda nu guhana milambu ya guwotshia nga milambu iko, 27 uvi mbagikhala temue mukatshi dienu nu esue nu ajigulu* etu, ha gumonesa egi mbatukombelela Yehowa nu mbatuhana milambu yetu ya guwotshia gutuama dienji nu milambu yetu iko nu milambu ya guhuima. Hagula an’enu awambelago an’etu mu masugu adi muza egi: “Mushigo nu khapho gudi Yehowa.”’ 28 Hene tuazuelele egi: ‘Gula mu masugu adi muza atuwambela ngenyi nu ajigulu* etu, esue mbatuzuela egi: “Talenu giwotshielo giatungile akhakh’etu gidi luholo lumoshi nu giwotshielo gia Yehowa; gishigo mukunda nu guhana milambu ya guwotshia nga milambu iko, uvi hagula gikhale temue mukatshi dienu nu esue.”’ 29 Matangi ajiyilego gutujila nga hazonda ha gulumbugila Yehowa nga ha gubemba gulandula Yehowa mangino ha gutunga giwotshielo giko ha guhana milambu hene. Mbatuhana milambu ya guwotshia nu milambu ya mbuto nu milambu iko, phamba ha giwotshielo gia Yehowa Nzambi wetu gidi gutuama dia tabernakle yenji!”
30 Tangua nganga-nzambi Fineyase nu mafumu a Isalele nu mafumu a athu 1 000* a enya Isalele akhalele n’enji avuile ndaga jiazuelele ajigulu a Ribene nu a Gade nu a Manase, asuangulugile. 31 Hene Fineyase mun’a nganga-nzambi Eleazale wawambelele ajigulu a Ribene nu a Gade nu a Manase egi: “Mangino tuajiya egi Yehowa udi mukatshi dietu handaga mualumbugilego Yehowa. Muahuluisa enya Isalele ha mago a Yehowa.”
32 Gungima Fineyase mun’a nganga-nzambi Eleazale nu mafumu abembele enya giphuta gia Ribene nu gia Gade mu mavu a Gileade, avutugile gu Kanana gudi enya Isalele ako, a atele lumene. 33 Enya Isalele asuangulugile nu lumene luene. Atumbuishile Nzambi, azuelelego luko ndaga ya guya muluisa enya giphuta gia Ribene nu gia Gade nu gubolesa mavu akhalele ene mujinga.
34 Gishina giene enya giphuta gia Ribene nu gia Gade ahanele giwotshielo giene jina,* azuelele egi “gidi temue mukatshi dietu gidi mumonesa egi Yehowa muene Nzambi wa giamatshidia.”