Mukanda wa Mbadi wa Samuele
10 Gungima fumu wa enya Amona wafuile, mun’enji Hanuna wabuile fumu ha fundo dienji. 2 Hene Davidi wazuelele egi: “Ngudi naye gumonesela Hanuna mun’a Nahasha gisemo* gifua luholo sh’enji wangumonesele gisemo.” Hene Davidi watumine enya mudimo enji ha guya muhana Hanuna gikhesa mukunda nu gufua gua sh’enji. Uvi tangua enya mudimo a Davidi ahetele mu mavu a enya Amona, 3 atuameji a enya Amona awambelele fumi’awo Hanuna egi: “Udi mutangiza egi Davidi watumi athu enji ha guguhana gikhesa ha gumonesa egi udi munemesa sh’aye? Ndo. Waatumi ha guza mutala dimbo hagula atuluise. 4 Hene Hanuna wakuatele enya mudimo a Davidi, waakokele wevu khanda imoshi; waabatuile nji milele uu nu mu matago. Gungima waakayele. 5 Tangua awambelele Davidi ndaga yene, watumine athu mbala imoshi ha guya guatagana, handaga athu ene ahanewe diago musonyi. Fumu waawambelele egi: “Khalenu gu Yeliko uu nu tangua wevu wenu mbawuzoga, ngenyi muajiya guvutuga.”
6 Gungima enya Amona akotelesele egi abuile mbalagaji jia Davidi. Hene atumine athu ha guya muhana mbongo gudi enya Siliya a gu Bete-Lehoba nu gudi enya Siliya a gu Soba ha gualuila. A ahanele masuta 20 000 akhalele muwenda hashi. Fumu wa gu Maka waahanele masuta 1 000; gu Ishetoba* ahetele masuta 12 000. 7 Tangua Davidi wavuile ngenyi, watumine Yoabe nu masuta enji a ngolo nu masuta ako agasue. 8 Masuta a enya Amona azogele, adilondele ha guya mulua ita, amaganele ha mufulo wa dimbo. Uvi masuta a enya Siliya a gu Soba nu gu Lehoba nu masuta a gu Ishetoba* nu gu Maka amaganele hakhawo mu temu.
9 Hamonele Yoabe egi akhalele gualuisa gutuama nu gungima, watombele masuta a ngolo mukatshi dia masuta a gu Isalele, waalondele ha gulua nu enya Siliya. 10 Wabembele masuta ako ha mago a phangi’enji Abishayi. Wamuwambelele ha gualonda ha guya mulua ita nu enya Amona. 11 Gungima wamuwambelele egi: “Gula enya Siliya angubalega ngolo, uze ungukuatese. Uvi gula enya Amona agubalega ngolo, ngumuza gugukuatesa. 12 Tudi naye gukhala nu ngolo nu gikhesa mukunda nu akuakh’etu nu mukunda nu membo a Nzambi wetu. Yehowa mbawutshita ndaga jidi jiabonga gu meso enji.”
13 Yoabe nu masuta enji ayile muluisa enya Siliya. Enya Siliya alengele. 14 Tangua enya Amona amonele egi enya Siliya alenga, ene nji alengele Abishayi, ayile gudisuega mu dimbo. Hamanesele Yoabe gulua ita nu enya Amona, wavutugile gu Yelusalema.
15 Tangua enya Siliya amonele egi enya Isalele a abinga, adibungishile luko. 16 Gungima Hadadezele watumine athu ha guya mutamega enya Siliya akhalele gu khanda ya Muta.* Ajile gu Helame. Shobake fumu wa masuta a Hadadezele wakhalele guatuameza.
17 Tangua awambelele Davidi ndaga yene, wabungishile masuta agasue a gu Isalele mbala imoshi, azawugile muta wa Yordane, ayile gu Helame. Enya Siliya adilondele mukunda nu ita, asendesele gulua nu Davidi. 18 Uvi enya Siliya alengele gutuama dia enya Isalele; Davidi washiyile masuta a enya Siliya 700 akhalele muwendesa phusu-phusu jia ita, nu masuta 40 000 akhalele muwendesa tubalu. Gungima washiyile Shobake fumu wa masuta awo. 19 Tangua mafumu agasue akhalele mu uhinyinyi wa Hadadezele amonele egi enya Isalele a abinga, ayile muphushi ha gudivua nu enya Isalele; abuile nji enya mudimo awo. Enya Siliya avuile woma, atshiginyilego luko nga hazonda gukuatesa enya Amona.