Mukanda wa Thomo wa Mafumu
5 Tangua fumu Hirame wa gu Tile wavuile egi Salomo wambiwa maji ha gubua fumu ha fundo dia sh’enji, watumine enya mudimo enji gudi Salomo handaga wakhalele futa dia Davidi.* 2 Salomo watumine Hirame mbimbi egi: 3 “Udi mujiya muabonga egi tata wami Davidi gakhalelego nu luholo lua gutunga inzo mukunda nu jina dia Yehowa Nzambi wenji, handaga waluile ita yavula nu mbalagaji jienji jiakhalele muza gumuluisa gu khanda jiagasue uu nu tangua Yehowa wamukuatesele ha guabinga.* 4 Uvi henyaha Yehowa Nzambi wami wanguhanyi guhuima gu khanda jiagasue. Gushigo nga nu muthu mumoshi udi gunguluisa, gushigo nji nu ndaga imoshi yabola yangubuila. 5 Ngudi mutshigina gutunga inzo mukunda nu jina dia Yehowa Nzambi wami, gifua luholo Yehowa walayele tata wami Davidi egi: ‘Mun’aye munu mbanguhaga ha nguasa yaye ya ufumu ha fundo diaye, muene mbawutunga inzo mukunda nu jina diami.’ 6 Henyaha wambela athu aye ha gungukokela mitshi ya sedre ya gu Libane. Enya mudimo ami mbaatshita hamoshi nu enya mudimo aye, mbangufuta nji enya mudimo aye lufuto mbawutoga. Handaga udi mujiya muabonga egi gushigo nga muthu mumoshi mukatshi dietu wajiya gale gukoka mitshi muabonga gifua enya gu Sidona.”
7 Tangua Hirame wavuile mbimbi jia Salomo, wasuangulugile muavula, wazuelele egi: “Mangino Yehowa atumbuishiwe, handaga wahanyi Davidi mona watema ha guhinyina athu awa avula!” 8 Hirame watumine mbimbi gudi Salomo egi: “Ngahetshi mbimbi yaye. Mbangutshita ndaga jiagasue wangutogi, mbanguguhana mitshi ya sedre nu mitshi ya jenevriye. 9 Enya mudimo ami mbaayizula gu Libane, mbaabulumuga nayo gu kianga. Mbanguyijitshiga gifua isagi* ha guyibulumuisa mu kianga uu nu ha fundo mbawunguwambela. Mbanguyijitulula ha fundo diene, gungima uji uyizudi. Uvi aye mbawunguhana ima ya gudia mbangugutoga mukunda nu enya inzo yami.”
10 Hene Hirame wahanele Salomo mitshi yagasue ya sedre nu ya jenevriye yatogele muene. 11 Salomo wahanele Hirame ima eyi ya gudia mukunda nu enya inzo yenji: bakore* 20 000 a mbuto jia ble nu bakore 20 a maji a olive abonga diago. Yene ima Salomo wakhalele muhana Hirame givo nu givo. 12 Yehowa wahanele Salomo ndunge gifua luholo luamulayele muene. Hirame nu Salomo akhalelele mu guhuima, akotele nji gikotelo.
13 Fumu Salomo wazudile athu mu Isalele yagasue ha gutshita midimo ya gu ngolo; akhalele mala 30 000. 14 Wakhalele guatuma 10 000 gu Libane mbeji nu mbeji. Akhalele mutshita mbeji imoshi gu Libane, mbeji mbadi gu jinzo jiawo. Adonilama wakhalele mutuameza athu azudiwe ha gutshita midimo gu ngolo. 15 Salomo wakhalele nu enya mudimo 70 000 nu athu* 80 000 akhalele musonga maseso gu milundu, 16 Salomo wakhalele nji nu atuameji 3 300 anyi akhalele mutala athu akhalele mutshita midimo yene. 17 Akhalele mubula maseso akoma a ndando yakola, a asongi ha gutunga fondasio ya inzo gifua luholo luaawambelele fumu. 18 Enya mudimo a Salomo nu enya mudimo a Hirame nu enya gu Gebale asongele maseso, alondele nji mabaya nu maseso ha gutunga inzo.