Mukanda wa Thomo wa Mafumu
7 Salomo watungile inzo yenji.* Wakitshile ivo 13 ha guyimanesela.
2 Watungile Inzo ya Gishitu gia Libane: yakhalele guleha bakude* 100, gukoma bakude 50 nu gitala gia bakude 30. Wahagele makunji a mitshi ya sedre mu ndonga nguana; mabaya akoma a sedre akhalele holu dia makunji ene. 3 Ahagele mabaya a sedre holu dia mitandala yakhalele holu dia makunji. Yakhalele 45, mu ndonga yagasue yakhalele 15. 4 Inzo yakhalele nu fenetre* mu ndonga thathu, ndonga iko goshi, iko holu; fenetre jiagasue jiakhalele guditala. 5 Mifulo yagasue nu makunji enji yakhalele nu ba ankadrema akhalele khanda jiagasue nguana luholo lumoshi, gifua muakhalele fenetre jinyi jiakhalele guditala sambua nu sambua mu ndonga thathu, jiko goshi, jiko holu.
6 Watungile Inzo* ya Makunji: yakhalele guleha bakude 50, gukoma bakude 30. Gutuama dia inzo yene guakhalele nu fundo dia gunginyila nu makunji nu yangi holu dia makunji.
7 Watungile nji Inzo ya Nguasa* ya Ufumu, fundo diakhalele musophesa muene. Akhalele nji guyitamega egi Inzo ya Usopheshi. Atshuigile mabaya a sedre gu ibayi ya inzo yene sendese hashi uu nu gu plafo.
8 Inzo yakhalele naye gukhala fumu Salomo yakhalele mu gibanzala giko giakhalele gungima dia inzo.* Ayitungile luholo lumoshi nu inzo yene. Salomo watungile nji inzo iko ya luholo lumoshi nu inzo yene mukunda nu mun’a Farao wa mukhetu munu wakhalele mukaji’enji.
9 Ima eyi yagasue yatungiwe nu maseso a ndando yavula sendese gu fondasio uu nu gu yangi, nu hanze uu nu gu luphango luakoma. Akhalele muthesa maseso ene gutuama dia guakoka. Akhalele agukoka mukatshi nu hanze nu si ana kokela maseso. 10 Atungile fondasio nu maseso akoma diago a ndando yavula. Maseso ako akhalele bakude 10, ako bakude 8. 11 Holu dia maseso ene guakhalele nu maseso ako a ndando yavula diago, akhalele guathesa gutuama dia guakoka. Guakhalele nji nu mabaya a sedre. 12 Mu khulo ya gibanzala giakoma atungile luphango nu ndonga thathu jia maseso a gusonga nu ndonga imoshi ya mabaya a sedre. Luakhalele luholo lumoshi nu luphango lua mukatshi lua inzo ya Yehowa nu fundo dia gunginyila mu inzo.
13 Fumu Salomo watumile mbimbi gudi Hirame gu Tile ha guza; Hirame wajile. 14 Gin’enji wakhalele mukhetu wa gafunda wa mu giphuta gia Nefetali, sh’enji wakhalele muenya gu Tile, wakhalele mbembo ya ima ya kuivre. Hirame wakhalele mutshita muabonga midimo ya mago, wakhalele nji nu ndunge, wakhalele mujiya gulonda ima ya maluholo agasue nu kuivre.* Hene, wajile gudi Fumu Salomo, wakalegele midimo yagasue yamuhanele fumu.
15 Walondele makunji mbadi a kuivre. Kunji diagasue diakhalele nu gitala gia bakude 18. Ha guthesa gukoma gua kunji* diagasue, yakhalele mutoga gujietesa shinga ya bakude 12. 16 Wazudile kuivre wayifudile, walondele ima mbadi gifua mabungu. Ima yene yakhalele nu gitala gia ba kude 5; wayihagele gu songi ya makunji. 17 Wahagele miyungulu nu tumalenge tua gudiwonga gu gima giagasue giakhalele gifua bungu gu songi ya kunji. Gu gima gimoshi, miyungulu 7; gu gima giko miyungulu 7. 18 Walondele mabundu a grenade mu ndonga mbadi, waajietesele gu muyungulu umoshi ha gutshuiga ima yalondewe gifua mabungu yakhalele gu songi ya makunji; watshitshile ngenyi gu ima yene mbadi. 19 Ima ya kuivre yalondewe gifua mabungu gu songi ya makunji akhalele ha fundo dia gunginyina yakhalele gifua giyaji gia lis; yakhalele nu gitala gia bakude 4. 20 Ima ya kuivre yakhalele gifua mabungu yakhalele gu songi ya makunji mbadi holu dia gitshinyi giakoma giakhalele gia gukuatagana nu muyungulu. Ahagele mabundu a grenade 200 mu ndonga mu khulo ya gima giagasue gia kuivre giakhalele gifua bungu.
21 Wamaganesele makunji ha fundo dia gunginyila mu tempelo.* Wahagele kunji dimoshi gu koko dia madia,* wadihanele jina egi Yakine,* wahagele diko gu koko dia mahidi,* wadihanele jina egi Boaze.* 22 Songi jia makunji ene jiakhalele gifua iyaji ya lis. Gungima mudimo wa makunji wahuile.
23 Walondele kianga* nu utadi wa guzoza. Giakhalele gifua longa diakoma; sendese ha sambua dimoshi uu nu gu sambua diko, giakhalele bakude 10. Giakhalele nu gitala gia bakude 5, yakhalele mutoga gujietesa shinga ya bakude 30 ha guthesa gukoma gua kianga giene.* 24 Ajietesele ifuanesa ya mathethe gu mbongo ya mubalo wenji, akhalele guyimba 10 mu kude imoshi mu khulo yagasue ya kianga giene; ayihagele mu ndonga mbadi. Ifuanesa ya mathethe yalondewe hamoshi nu kianga nu utadi wa guzoza. 25 kianga giene giakhalele holu dia ngombe 12 jia milume, ngombe thathu jiakhalele mutala gu khanda ya nord, thathu gu khanda ya mayilo a kumbi, thathu gu khanda ya sud, jiko thathu gu khanda ya mazogelo a kumbi. Kianga giakhalele holu dia ngombe jiene, mbunda jiagasue jia ngombe jiene jiakhalele mutala hakatshi na katshi. 26 Mudito* wenji wakhalele gukoma gifua gikata gia koko;* mubalo wenji wakhalele gifua mubalo wa khopho, wakhalele nji gifua giyaji gia lis gia gusagumuna. Kianga giene giakhalele mungina babate* 2 000 a meya.
27 Gungima walondele phusu-phusu 10 jia kuivre. Phusu-phusu yagasue yakhalele guleha bakude nguana, gukoma bakude nguana nu gitala gia bakude thathu. 28 Lulu luholo alondele phusu-phusu jiene: Jiakhalele nu pano khanda nu khanda, pano jiene jiakhalele hakatshi na katshi dia balate. 29 Holu dia bapano akhalele hakatshi na katshi dia balate, guakhalele nu ifuanesa ya khoshi, ya ngombe jia milume nu ya basheribe; alondele nji ifuanesa yene holu dia balate. Wasembegele ima yakhalele muya nu gukondomoga gifua mifundunda holu nu goshi’a ifuanesa ya khoshi nu ya ngombe jia milume. 30 Phusu-phusu yagasue yakhalele nu pine nguana jia kuivre jiakhalele mubalumuga mu tiyo jia kuivre nu ima yakhalele gu khomo nguana ha guyikuata. Longa diakhalele holu dia makunji, alondele mifundunda yakhalele mukondomoga nu utadi wa guzoza gu khanda nu khanda jia makunji ene. 31 Kano dia longa diakhalele mukatshi dia gitshinyi gia holu gia phusu-phusu, diakhalele gifua munengu. Sendese hashi uu nu holu dia longa, diakhalele kude imoshi. Gitshinyi gia holu nu makunji a longa diene, akhalele kude imoshi nu ndambo. Alondele ifuanesa gu gitshinyi gia holu. Khanda jiagasue nguana jia pano jienji jiakhalele luholo lumoshi, jiakhalelego gifua munengu. 32 Pine nguana jiakhalele goshi’a pano jiakhalele gu khanda nu khanda ya phusu-phusu. Ima yakhalele mukuata pine yakhalele ya gukuatenesa nu phusu-phusu. Pine yagasue yakhalele nu gitala gia kude imoshi nu ndambu. 33 Alondele pine jia phusu-phusu yene luholo lumoshi nu pine jia phusu-phusu jiana kalegela athu agasue. Ima yakhalele gujikuata nu bajante nu bareyo nu bamuaye, yalondewe nu utadi wa guzoza. 34 Phusu-phusu yagasue yakhalele nu ima nguana gu khomo nguana ha guyikuata; ima yene yalondewe nu utadi wa guzoza hamoshi nu* phusu-phusu. 35 Guakhalele nu gima gimoshi giakhalele mujieta longa gu gitshinyi gia holu gia phusu-phusu, giakhalele nu gitala gia gitshinyi gia kude. Tubaankandrema nu pano jiakhalele gu khanda nu khanda ya gitshinyi giene, jialondewe hamoshi nu* utadi wa guzoza. 36 Walondele ifuanesa ya basheribe nu ya khoshi nu ya samba gu ba ankandrema nu gu bapano akhalele khanda nu khanda mu gudivua nu gukoma gua fundo dia gima nu gima, walondele nji mifundunda yakhalele mukondomoga gu khulo yagasue. 37 Elu luholo lualondele muene phusu-phusu 10. Wajilondele jiagasue nu utadi wa guzoza, jiagasue jiakhalele luholo lumoshi.
38 Walondele malonga a kuivre 10; longa diagasue diakhalele mungina babate a meya 40. Longa diagasue diakhalele bakude nguana. Phusu-phusu jiagasue 10 jiakhalele nu longa dimoshi-dimoshi holu. 39 Gungima wahagele phusu-phusu thano gu khanda ya koko dia madia dia inzo, wahagele nji phusu-phusu jiko thano gu khanda ya koko dia mahidi dia inzo. Wahagele kianga gu koko dia madia dia inzo gu khanda ya sud ya mazogelo a kumbi.
40 Hirame walondele nji malonga akoma nu jiphawu nu malonga azonda.
Gungima wamanesele midimo yagasue yamutogele Fumu Salomo ha gukalagala mukunda nu inzo ya Yehowa: 41 makunji mbadi nu ima ya kuivre yalondewe gifua malonga a khobo inyi yakhalele holu dia makunji ene mbadi; nu miyungulu mbadi ha gutshuiga ima ya kuivre yakhalele holu dia makunji; 42 mabundu a grenade 400 mukunda nu miyungulu mbadi, ndonga mbadi jia mabundu a grenade mukunda nu muyungulu wagasue, ha gutshuiga ima mbadi ya kuivre yalondewe gifua malonga a khobo inyi yakhalele holu dia makunji mbadi; 43 phusu-phusu 10 nu malonga 10 akhalele holu dia phusu-phusu jiene; 44 nu kianga nu ngombe 12 jia milume jiakhalele goshi’a kianga giene; 45 nu bakantine agukatudila fuphi, nu jiphawu nu malonga nu ikadigilo yagasue. Hirame walondele ima eyi yagasue nu kuivre yalondewe muabonga gifua muamutogele Fumu Salomo mukunda nu inzo ya Yehowa. 46 Fumu wawambelele athu ha guzozesa ima yene yagasue mu mavu a wuma mu baba didi hehi nu Muta wa Yordane, hakatshi na katshi dia Sukote nu Saletana.
47 Fumu Salomo gatheselego gunema gua ikadigilo yagasue handaga yakhalele yavula diago. Akambelego gujiya gunema gua kuivre. 48 Salomo walondele ikadigilo yagasue mukunda nu inzo ya Yehowa: giwotshielo gia wolo nu mesa a wolo ha guhaga mapha ana hanewa gudi Nzambi; 49 nu ihagelo ya mienda ya wolo wabonga, yakhalele thano gu koko dia madia, thano gu koko dia mahidi gutuama dia sugu ya mukatshi; nu iyaji nu mienda nu sizo* jia ihagelo ya mienda, ima eyi yagasue yalondewe nu wolo; 50 nu malonga akoma nu ima ya gujimina tshuya nu malonga azonda nu makhopho nu malonga a gubatela tshuya, ima eyi yagasue yalondewe nu wolo wabonga; nu mawina a mifulo ya sugu ya mukatshi, yakotelesa egi Fundo Diabalega Gijila, nu mawina a mifulo ya Fundo dia Gijila,* yalondewe nu wolo.
51 Fumu Salomo wamanesele midimo yagasue yakhalele naye gutshita muene mukunda nu inzo ya Yehowa. Gungima wabatele ima inyi sh’enji Davidi wabuishile ya gijila, wambile utadi wa siliva nu wolo nu ima iko mu sugu akhalele mubambela ima ya ndando mukunda nu inzo ya Yehowa.