Mukanda wa Thomo wa Mafumu

13 Yehowa wawambelele muthu mumoshi wa Nzambi ha gukatuga gu Yuda ha guya gu Betele. Muthu muene wahetele guene tangua Yeloboama wakhalele wa gumagana gu giwotshielo ha guwetshia milambu. 2 Gungima wazuelele mu dijui diakola mbimbi jiamuwambelele Yehowa mukunda nu giwotshielo egi: “Oo giwotshielo, giwotshielo! Yehowa wazuela egi: ‘Tala! Mona mumoshi mbawuvualewa mu fami ya Davidi, jina dienji Yoziase. Mona muene mbawuhana nganga-nzambi jia mu mafundo a gukombelela gifua milambu holu diaye, nganga-nzambi jinyi jiana wetshia milambu holu diaye. Mbawuwetshia ifuwa ya athu holu diaye.’” 3 Mu lusugu luene, muthu wa Nzambi wahanele gijiyishilo egi: “Gijiyishilo giahanyi Yehowa giene egi: Tala! Giwotshielo mbagimuangana, fuphi* idi holu dia giwotshielo giene mbayibunduga.”

4 Tangua fumu Yeloboama wavuile mbimbi jiakhalele muzuela muthu wa Nzambi wa giamatshidia mu dijui diakola mukunda nu giwotshielo giakhalele gu Betele, wakatuile koko dienji gu giwotshielo, wadisunuine gudi muthu muene, wazuelele egi: “Mukuatenu!” Mbala imoshi, koko diasunuine muene diamiginyile,* gakhalelego luko nu luholo lua guvutula koko diene gungima. 5 Gungima giwotshielo giamuanganele, fuphi yakhalele holu yabundugile. Yakhalele gijiyishilo giahanele muthu wa Nzambi wa giamatshidia, gifua muamuwambelele Yehowa.

6 Gungima fumu wawambelele muthu wa Nzambi wa giamatshidia egi: “Ngabuba, bubila Yehowa Nzambi waye, tshita nji gisambu mukunda nu ame hagula asage koko diami.” Muthu wa Nzambi wa giamatshidia wabubidile Yehowa, hene koko gua fumu guavutugile gifua luholo guakhalele thomo. 7 Gungima fumu wawambelele muthu wa Nzambi wa giamatshidia egi: “Tuye gumbo diami hagula udie, gungima nguguhane kado.” 8 Uvi muthu wa Nzambi wa giamatshidia wawambelele fumu egi: “Ngatshima wanguhana gitshinyi gia umonyi waye,* ngushigo muya nu aye, ngajiyilego nji gudia dipha nga gunua meya ha fundo edi. 9 Handaga Yehowa wanguwambela egi: ‘Ushigo naye gudia dipha nga gunua meya, ushigo naye nji guvutugila mu njila wajila.’” 10 Muthu muene wayidile mu njila iko, gavutugilego mu njila yajidile muene gu Betele.

11 Guakhalele nu profete mumoshi wa gukola gu Betele. Tangua an’enji avutugile gu inzo, amuwambelele ndaga jiagasue jiakalegele muthu wa Nzambi wa giamatshidia mu lusugu luene gu Betele nu mbimbi jiawambelele muene fumu. Gungima dia gutela sh’awo ndaga yene, 12 sh’awo waahudile egi: “Wayila njila itshi?” An’enji amudijigile njila yayidile muthu wa Nzambi wa giamatshidia munu wakatugile gu Yuda. 13 Profete muene wawambelele an’enji egi: “Ngulondelenu phunda.” Amulondele phunda, gungima wanginyile holu.

14 Walanduile muthu wa Nzambi wa giamatshidia, wamusangele ha mushin’a mutshi wakoma. Wamuhudile egi: “Aye muthu wa Nzambi wa giamatshidia wakatuga gu Yuda ba?” Muene wamuvutudile egi: “Ayi, ame.” 15 Profete muene wamuwambelele egi: “Tuye gumbo diami udie dipha.” 16 Uvi muthu muene wamuwambelele egi: “Ngushigo muvutuga nu aye, ngushigo nji mutshigina ndaga wanguwambela. Ngajiyilego gudia dipha nga gunua meya ha fundo edi. 17 Handaga Yehowa wanguwambelele egi: ‘Ushigo naye gudia dipha nga gunua meya guene. Ushigo naye nji guvutugila mu njila wajila.’” 18 Muene wamuwambelele egi: “Ame nji ngudi profete gifua aye. Yehowa wanguwambela mu njila ya muanjelo egi: ‘Nda umuwambele muvutuge n’enji gumbo diaye, hagula adie dipha nu anue meya.’” (Wamuhuigile.) 19 Hene, wavutugile nu profete muene gumbo dienji ha gudia dipha nu ha gunua meya.

20 Hakhalele ene gu mesa, mbimbi ya Yehowa yajile gudi profete wavutugile nu muthu muene. 21 Profete muene wawambelele muthu wa Nzambi wa giamatshidia munu wakatugile gu Yuda mu dijui diakola egi: “Yehowa wazuela egi: ‘Watumagelego ndaga yaguwambelele Yehowa nu wanemeselego mukhuala waguhanele Yehowa Nzambi waye, 22 uvi wavutuga ha guya mudia dipha nu gunua meya ha fundo ngaguwambelele egi: “Ushigo naye gudia dipha nga gunua meya guene.” Gishina giene, kimbi giaye mbagishigo mufundjiwa mu malumba a akhakh’aye.’”

23 Tangua muthu wa Nzambi wa giamatshidia wamanesele gudia nu gunua, profete wa gukola* wamulondediele phunda. 24 Gungima yala muene wayile genji, uvi khoshi yazogele mu njila, yamushiyile. Kimbi gienji giakhalele mu njila, phunda yamaganele gu khanda ya kimbi giene; khoshi nji yakhalele yagumagana hehi nu kimbi giene. 25 Athu akhalele mubalega mu njila yene amonele kimbi mu njila, nu khoshi yakhalele yagumagana hehi nu kimbi giene. Ayile muta lumene mu dimbo diakhalele mukhala profete wa gukola.

26 Tangua profete munu wamuvutuile wavuile ndaga yene, wazuelele mbala imoshi egi: “Idi muthu wa Nzambi wa giamatshidia munu watunyi gutumagela ndaga yamuwambelele Yehowa. Gishina giene, Yehowa wamuhanyi ha mago a khoshi yamukalula nu yamushiyi, gifua muamuwambelele Yehowa.” 27 Gungima profete wawambelele an’enji egi: “Ngulondelenu phunda.” Amulondele nayo. 28 Hene wayile, wasangele kimbi mu njila, phunda nu khoshi yakhalele yagumagana hehi nu kimbi giene. Khoshi yadilego kimbi giene, yakaluilego nji phunda. 29 Profete muene wathuphuile kimbi gia muthu wa Nzambi wa giamatshidia, wagihagele holu dia phunda yenji, wavutugile nu kimbi giene gu Betele ha gugidila nu ha gugifunda. 30 Wayile muhaga kimbi giene mu malumba enji.* Akhalele gumudila mu dijui diakola egi: “Aa mun’etu, ndaga ya lamba diago!” 31 Gungima dia gumufunda, profete wawambelele an’enji egi: “Gula ngafua, mudi naye gungufunda ha fundo edi tuafunda muthu wa Nzambi wa giamatshidia. Mbamuhaga ifuwa yami hehi nu ifuwa yenji. 32 Mbimbi jia Yehowa jiazuedi muthu muene mukunda nu giwotshielo gidi gu Betele nu mukunda nu jinzo jiagasue jiana khala mu mafundo a gukombelela mu membo a gu Samaliya mbajitagenesewa.”

33 Gungima dia ndaga eji, Yeloboama walanduile gukalagala ndaga jiabola. Walanduile nji gutomba nganga-nzambi mukatshi dia athu agasue ha gutshita mudimo mu mafundo a gukombelela. Muthu wagasue munu wakhalele mutshigina gubua nganga-nzambi, muene wakhalele gumubuisa nganga-nzambi.* Wakhalele muzuela egi: “Mubembenu abue nganga-nzambi ha gutshita mudimo mu mafundo a gukombelela.” 34 Fami ya Yeloboama yashiyiwe nu yatotele ha mavu mukunda nu gubola guakalegele ene.