Mukanda wa Mbadi wa Mafumu

10 Ahaba wakhalele nu ana a mala 70 gu Samaliya. Yehu wasonegele mikanda, wayitumile gu Samaliya gudi mafumu a gu Yizelele nu akulu nu athu akhalele mubamba ana a Ahaba.* Wazuelele egi: 2 “Mudi nu ana a fumi’enu nu phusu-phusu jienji jia ita nu tubalu tuenji nu dimbo didi nu ibayi yakola nu iluilo. Gula muaheta mukanda owu, 3 tombenu mona mumoshi udi wabalega gubonga nu watagana mukatshi dia ana a fumi’enu, mumuhage ha nguasa ya ufumu ya sh’enji. Gungima luenu mukunda nu fami ya fumi’enu.”

4 Uvi ene avuile woma, azuelele egi: “Gula mafumu mbadi amaganelego gutuama dienji, esue tudi akhuatshi hagula tumagane gutuama dienji?” 5 Hene, mutuameji wa inzo ya fumu nu guvernere wa dimbo nu akulu nu athu akhalele mubamba ana a fumu atumile mbimbi gudi Yehu egi: “Tudi enya mudimo waye, mbatutshita ndaga yagasue mbawutuwambela. Tushigo mubuisa nga muthu mumoshi fumu. Kalagala ndaga yagasue idi yabonga gu meso aye.”

6 Gungima waasonegele mukanda uko wa mbadi egi: “Gula mudi gu khanda yami, mudi mutshigina gungutumagela, hamene ngubatelenu mito ya ana a fumi’enu mu tangua edi gu Yizelele.”

Mu tangua diene, ana 70 a fumu akhalele nu athu a lutumbu a mu dimbo anyi akhalele guasansa. 7 Tangua athu ene ahetele mukanda wene, azanguile ana 70 a fumu, a ashiyile. Ambile mito yawo mu misanda, ayitumidile Yehu gu Yizelele. 8 Muthu mumoshi wajile gumuwambela egi: “Aji gale nu mito ya ana a fumu.” Yehu wazuelele egi: “Ihagenu mu misonga mbadi ha mufulo wa dimbo, ikhale guene uu nu mu gimenegena.” 9 Tangua diazugile muene mu gimenegena, wamaganele gutuama dia athu agasue, wazuelele egi: “Enue muatshitshilego gubola.* Ame ngayidile fumu wami giphungi, ame nji ngamushiyile. Uvi nanyi washiya athu awa agasue? 10 Jiyenu egi ndaga jiagasue jiazuelele Yehowa mukunda nu enya fami ya Ahaba mbajitagenesewa gifua muazuelele Yehowa. Yehowa watagenesa ndaga jiazuelele muene mu njila ya muenya mudimo wenji Eliya.” 11 Yehu washiyile nji athu agasue a mu fami ya Ahaba asalele gu Yizelele nu athu enji agasue a lutumbu nu mafuta enji nu nganga-nzambi jienji. Gabembelego nga muthu mumoshi nu monyo.

12 Gungima wakuatele njila ha guya gu Samaliya. Mu njila yene guakhalele nu inzo imoshi abambi a imeme akhalele mujitshiga imeme yawo.* 13 Yehu wataganele nu aphangi’a Fumu Ahaziya wa gu Yuda guene, waahudile egi: “Enue mudi akhuatshi?” Ene azuelele egi: “Tudi aphangi’a Ahaziya. Tudi muya ha gujiya gula ana a fumu nu ana a fumu-mukhetu adi muabonga.” 14 Yehu wazuelele mbala imoshi egi: “Akuatenu!” A akuatele, a ashiyile mu wina dia meya diakhalele mu inzo abambi a imeme akhalele mujitshiga imeme yawo. Ashiyile mala 42, abembelego nga mumoshi nu monyo.

15 Yehu wakatugile guene, gungima wataganele nu Yonadaba mun’a Lekabe munu wakhalele muza ha gumutagana. Yehu wamuhanele lumene,* wamuhudile egi: “Udi gu khanda yami nu mutshima waye wagasue* gifua luholo ngudi gu khanda yaye nu mutshima wami wagasue ba?”

Yonadaba wamuvutudile egi: “Ayi.”

Yehu wazuelele egi: “Gula idi ngenyi, nguhane koko diaye.”

Wamuhanele koko dienji. Yehu wamukuatele, wamunginyishile holu dia phusu-phusu yenji. 16 Gungima Yehu wazuelele egi: “Tuye udimonele hakhaye, ngushigo mubemba nga muthu mumoshi munu gashigo ya gujinginyina gudi* Yehowa.” Ayile n’enji mu phusu-phusu yenji ya ita. 17 Yehu wahetele gu Samaliya, washiyile athu agasue a mu fami ya Ahaba anyi asalele gu Samaliya, waamanesele mukut’awo agasue gifua luholo Yehowa wawambelele Eliya.

18 Yehu wabungishile nji athu agasue, waawambelele egi: “Ahaba gakombelelego Bale muavula, uvi ame Yehu mbangukombelela Bale muavula gubalega. 19 Henyaha tamegenu baprofete agasue a Bale nu akombeledi enji agasue nu nganga-nzambi jienji jiagasue, aze gudi ame. Nga muthu mumoshi gasadigo, handaga ngudi mutshigina guhana Bale mulambu wakoma. Muthu wagasue mbawutuna guza mbawushiyiwa.” Uvi Yehu wakhalele guahuiga, wakhalele mutshigina gushiya akombeledi a Bale.

20 Yehu wazuelele luko egi: “Wambelenu athu egi: ‘Mbatutshita gudibungisa gua ndando yavula mukunda nu Bale.’” Hene awambelele athu ndaga yene. 21 Gungima Yehu watumine mbimbi gu Isalele yagasue, akombeledi a Bale agasue ajile. Nga mumoshi gasalelego. Anginyile mu inzo* ya Bale. Inzo yene yazalele nu athu sendese gu songi iko uu nu gu songi iko. 22 Yehu wawambelele muthu wakhalele mutala fundo akhalele mubamba milele egi: “Zola milele ya akombeledi agasue a Bale.” Muthu muene wazolele milele ya akombeledi a Bale. 23 Gungima Yehu nu Yonadaba mun’a Lekabe anginyile mu inzo ya Bale. Yehu wawambelele akombeledi a Bale egi: “Talenu muabonga gula gushigo nu akombeledi a Yehowa ha fundo edi uvi phamba akombeledi a Bale.” 24 Gungima anginyile ha guhana milambu nu milambu ya guwotshia. Yehu wahagele masuta enji 80 hanze, waawambelele egi: “Athu awa adi ha mago enu. Gula nga mumoshi walenga, mbamufua ha fundo dienji.”

25 Hamanesele muene guhana mulambu wa guwotshia, wawambelele masuta akhalele gumubamba nu masuta akhalele gumukuatesa egi: “Nginenu, ashiyenu! Mubembigo nga muthu mumoshi ha gulenga!” Hene masuta ene ashiyile akombeleledi a Bale nu phogo ya khusa, azolele imbi yawo hanze; ayile nu guashiya uu nu ha fundo dia gijila* dia inzo ya Bale. 26 Gungima azolele makunji a gijila a mu inzo ya Bale hanze, a akondele tshuya. 27 Amuangele kunji dia Bale nu inzo ya Bale, ayibuishile tubine tua athu agasue. Yana khala ngenyi uu nu mangino.

28 Luene luholo Yehu wakatudile gikombelelo gia Bale gu Isalele. 29 Uvi Yehu gakatudilego gubola gunu Yeloboama mun’a Nebate watumile enya Isalele ha gutshita, handaga wabembele isongo ya ana a ngombe a wolo yakhalele gu Betele nu gu Dane. 30 Yehowa wawambelele Yehu egi: “Luholo watshita ndaga jiabonga gu meso ami nu wakalagala ndaga jiagasue ngakhalele mutshigina gutshita mukunda nu enya fami ya Ahaba, an’aye mbaalandula gukhala ha nguasa ya ufumu gu Isalele uu nu gu gidongo gia nguana.” 31 Uvi Yehu gatumagelego mikhuala ya Yehowa Nzambi wa Isalele nu mutshima wenji wagasue. Walanduile gubola gunu Yeloboama watumile enya Isalele ha gutshita.

32 Mu masugu ene, Yehowa wasendesele guzondesa mavu a Isalele ndambo-ndambo. Hazaele wakhalele muluisa enya Isalele mu mavu awo agasue, 33 sendese gu khanda ya mazogelo a kumbi a Yordane, mavu agasue a Gileade (yakotelesa egi mavu a enya giphuta gia Gade nu a enya giphuta gia Ribene nu a enya giphuta gia Manase), sendese nji gu Aloele idi hehi nu baba dia Alenona* uu nu gu Gileade nu gu Bashana.

34 Ndaga jiko jiakalegele Yehu nu ima yagasue yatshitshile muene nu ngolo jienji, jidi jia gusonega mu mukanda wa mene jia mafumu a gu Isalele. 35 Gungima Yehu wafuile gifua muafuile akhakh’enji, amufundjile gu Samaliya. Mun’enji Yoahaza wabuile fumu ha fundo dienji. 36 Yehu wahinyine Isalele ivo 28 gu Samaliya.