Mukanda wa Mbadi wa Mafumu

13 Mu givo gia 23 gia uhinyinyi wa Yoase mun’a Ahaziya fumu wa gu Yuda, Yoahaza mun’a Yehu wabuile fumu gu Isalele. Wahinyine ivo 17 gu Samaliya. 2 Wakhalele mukalagala ndaga jiabola gu meso a Yehowa, gabembelego nji gukalagala gubola gunu Yeloboama mun’a Nebate watumine enya Isalele ha gukalagala. 3 Yehowa wavuidile enya Isalele khabu jiakola, waahanele ha mago a fumu Hazaele wa gu Siliya nu ha mago a mun’enji Bene-Hadada. A asagesele ivo yavula.

4 Mu tangua diene, Yoahaza wabubidile Yehowa ha guavuila khenda. Yehowa wamutegelele handaga wamonele luholo fumu wa gu Siliya wakhalele mumonesa enya Isalele lamba. 5 Yehowa wahanele enya Isalele muhuluishi ha guahuluisa ha mago a enya Siliya. Hene, enya Isalele akhalele mu guhuima gu jinzo jiawo. 6 (Uvi enya Isalele abembelego gubola guakhalele mutshita enya fami ya Yeloboama, gubola gunu Yeloboama watumine enya Isalele ha gutshita. Alanduile gutshita gubola guene, mutshi wa gijila* wasalele nji wagumagenesa gu Samaliya.) 7 Yoahaza wasalele phamba nu masuta 50 ana wendesa tubalu nu phusu-phusu 10, nu masuta 10 000 ana wenda ha malu; handaga fumu wa gu Siliya waashiyile, waabuishile gifua fuphi ha fundo ana suwila mbuto.

8 Ndaga jiko jiakalegele Yoahaza nu ima yagasue yatshitshile muene nu ngolo jienji, idi ya gusonega mu mukanda wa mene jia mafumu a gu Isalele. 9 Gungima Yoahaza wafuile gifua muafuile akhakh’enji, amufundjile gu Samaliya. Mun’enji Yoase wabuile fumu ha fundo dienji.

10 Mu givo gia 37 gia uhinyinyi wa Yoase Fumu wa gu Yuda, Yoase mun’a Yoahaza wabuile fumu gu Isalele. Wahinyine ivo 16 gu Samaliya. 11 Walanduile gutshita ndaga jiabola gu meso a Yehowa, gabembelego gubola guagasue gunu Yeloboama mun’a Nebate watumile enya Isalele ha gutshita. Walanduile gutshita* gubola guene.

12 Ndaga jiko jiakalegele Yoase nu ima yagasue yatshitshile muene nu ngolo jienji nu ita yaluile muene nu fumu Amazia wa gu Yuda, idi ya gusonega mu mukanda wa mene jia mafumu a gu Isalele. 13 Gungima Yoase wafuile gifua muafuile akhakh’enji, Yeloboama* wabuile fumu ha fundo dienji. Afundjile Yoase gu Samaliya nu mafumu a gu Isalele.

14 Tangua Elisha wakhalele mukata (misongo yene yamubatele uu nu gu gufua), Yoase, fumu wa gu Isalele, wajile gumutala. Wazegemene gudi muene, wadidile egi: “Tata! Tata! Phusu-phusu ya Isalele nu awendeshi enji a tubalu!” 15 Gungima Elisha wamuwambelele egi: “Zula uta wa manana nu mifula.” Hene Yoase wazudile uta wa manana nu mifula. 16 Gungima Elisha wawambelele fumu Yoase wa gu Isalele egi: “Zula uta wa manana ha mago.” Yoase wazudile uta wa manana ha mago. Elisha wahagele mago enji holu dia mago a Yoase. 17 Gungima Elisha wamuwambelele egi: “Kangula fenetre gu khanda ya mazogelo a kumbi.” Yoase wakanguile fenetre yene. Elisha wamuwambelele egi: “Sonona mufula!” Yoase wasonuene mufula. Gungima Elisha wazuelele egi: “Mufula wa uhuluishi wa Yehowa, mufula wagubingila enya Siliya! Mbawubinga enya Siliya gu Afeka uu nu tangua mbawamanesela.”

18 Elisha wamuwambelele luko egi: “Zula mifula.” Wazudile mifula. Gungima Elisha wawambelele fumu wa gu Isalele egi: “Itue mu mavu!” Hene fumu Yoase wayituile mu mavu mbala thathu, gungima wabembele. 19 Muthu wa Nzambi wa giamatshidia wavuidile Yoase khabu, wamuwambelele egi: “Wakhala naye guyitua mu mavu mbala thano nga 6! Ngenyi wakhadi naye gubinga enya Siliya agasue, waamanesela nji. Uvi henyaha mbawubinga enya Siliya phamba mbala thathu.”

20 Gungima dia ndaga yene, Elisha wafuile, amufundjile. Gu gisendeselo gia givo giagasue,* mahunji a nzangi jia gu Moaba akhalele nu khadilo dia guza mu gifutshi. 21 Lusugu lumoshi, athu ayile mufunda yala mumoshi. Hamonele ene hunji dia nzangi, abishidile kimbi gienji mu malumba a Elisha, alengele. Tangua kimbi giene giakumine ifuwa ya Elisha, yala muene wafuzumugile, wazugile mu molu.

22 Fumu Hazaele wa gu Siliya wamonesele enya Isalele lamba masugu agasue a uhinyinyi wa Yoahaza. 23 Uvi Yehowa wavuidile enya Isalele khenda, waamonesele gisemo nu wadisagesele mukunda nu ene ha gunemesa gikotelo giakotele muene nu Abalahama nu Izake nu Yakoba. Muene gatshiginyilego guamanesela uu nu mangino gaakatudilego nji gu meso enji. 24 Hafuile Fumu Hazaele wa gu Siliya, mun’enji Bene-Hadada wabuile fumu ha fundo dienji. 25 Yoase mun’a Yoahaza watambudile luko membo ha mago a Bene-Hadada mun’a Hazaele, membo anyi Hazaele watambudile Yoahaza gu ita. Yoase wabingile Bene-Hadada mbala thathu, wazudile luko membo a Isalele.