Mukanda wa Mbadi wa Mafumu
9 Gungima profete Elisha watamegele muthu mumoshi mukatshi dia ana a baprofete, wamuwambelele egi: “Wonga milele yaye mu mbunda, uye phushi nu mulondo wuwu wa maji gu Ramote ya gu Gileade. 2 Gula waheta guene, kamba Yehu mun’a Yosafata mujigulu wa Nimishi, udi nu mafumu ako a masuta. Muzule uye n’enji gu sugu ya mukatshi. 3 Gungima uzule mulondo wa maji, umumbe maji holu dia muto, umuwambele egi: ‘Yehowa wazuela egi: “Ngagumba maji ha gugubuisa fumu gu Isalele.”’ Gungima dienji udi naye gukangula mufulo, ulengi; ushigo naye gushipha.”
4 Hene, muthu muene wayile gu Ramote ya gu Gileade. 5 Hahetele muene guene, wasangele mafumu a masuta a gukhala hashi. Wazuelele egi: “Fumu, ngudi nu ndaga ya guguwambela.” Yehu wamuhudile egi: “Udi mutshigina guwambela nanyi?” Muene wamuvutudile egi: “Aye fumu.” 6 Yehu wazugile, wanginyile monzo. Muthu muene wamumbile maji holu dia muto, wamuwambelele egi: “Yehowa Nzambi wa Isalele wazuela egi: ‘Ngagumba maji ha gugubuisa fumu wa athu a Yehowa gu Isalele. 7 Udi naye gushiya enya fami ya fumi’aye Ahaba, mbanguvutula gubola mukunda nu mahatshi a baprofete ami nu a enya mudimo a Yehowa agasue anyi Yezabele washiyile. 8 Enya fami ya Ahaba agasue mbaafua; mbangushiya mala agasue* a mu fami ya Ahaba, ikhale athu a gituhu nga athu aleba gu Isalele, agasue mbaafua. 9 Mbangukalegela enya fami ya Ahaba ndaga gifua luholo ngakalegele enya fami ya Yeloboama mun’a Nebate nu enya fami ya Basha mun’a Ahiya. 10 Jimbua mbajidia Yezabele mu gilanga gia gu Yizelele, nga muthu mumoshi mbagashigo gumufunda.’” Gungima muthu muene wakangudile mufulo, walengele.
11 Tangua Yehu wavutugile gudi mafumu a masuta a fumi’enji, amuhudile egi: “Ndaga itshi yabua? Mukunda natshi muenya malui yowu waji gugukamba?” Muene waavutudile egi: “Gima ndo. Mudi mujiya muabonga luholo athu ene ana khala nu ndaga ana zuela.” 12 Uvi ene amuwambelele egi: “Udi gutuhuiga! Tuabuba, tuwambele giamatshidia.” Hene Yehu waawambelele ndaga jiazuelele muthu muene. Wazuelele luko egi: “Muthu muene wazuedi nji egi: ‘Yehowa wazuela egi: “Ngagumba maji ha gugubuisa fumu gu Isalele.”’” 13 Muthu nu muthu mukatshi diawo wavuluile mu phushi mulele wenji wa holu, ayimbile hashi ha fundo dia gudiatela hagula Yehu awende holu. Ashigile nji phungi, azuelele egi: “Yehu wabua fumu!” 14 Gungima Yehu mun’a Yosafata, mujigulu wa Nimishi wayidile Yolama giphungi.
Yolama nu masuta agasue a gu Isalele ayile gu Ramote ya gu Gileade ha gulua nu Fumu Hazaele wa gu Siliya. 15 Gungima Fumu Yolama wavutugile gu Yizelele hagula amusage phuta jiamunamenesele enya Siliya tangua diakhalele muene muluisa Fumu Hazaele wa gu Siliya.
Gungima Yehu wazuelele egi: “Gila muatshigina, mubembigo nga muthu mumoshi ha guzoga mu dimbo ha guya muta lumene gu Yizelele.” 16 Yehu wanginyile holu dia phusu-phusu yenji, wayile gu Yizelele. Yolama wakhalele guene ya gubanda handaga wanamenele. Fumu Ahaziya wa gu Yuda wajile mutala Yolama. 17 Mutaledi mumoshi wakhalele holu dia gibayi gia dimbo dia Yizelele, wamonele hunji dia masuta a Yehu muza. Wazuelele mbala imoshi egi: “Ngudi mumona hunji dia masuta.” Yolama wazuelele egi: “Tuma muwendeshi mumoshi wa gabalu ha guatagana. A ahule egi: ‘Mudi muza mu guhuima ba?’” 18 Hene muwendeshi wa gabalu wayile mutagana nu Yehu, wamuwambelele egi: “Fumu wazuela egi: ‘Udi muza mu guhuima ba?’” Uvi Yehu wamuvutudile egi: “Ndaga ya guhuima ishigo gugutadila. Iza gungima diami ungulandule!”
Gungima mutaledi wazuelele egi: “Muwendeshi wa gabalu watagana nawo, uvi gashigo muvutuga.” 19 Hene fumu watumile muwendeshi muko wa gabalu. Hahetele muene gudi Yehu, wazuelele egi: “Fumu wazuela egi: ‘Udi muza mu guhuima ba?’” Uvi Yehu wamuvutudile egi: “Ndaga ya guhuima ishigo gugutadila. Iza gungima diami ungulandule!”
20 Gungima mutaledi wazuelele egi: “Watagana nawo uvi gashigo muvutuga. Muthu udi muwendesa phusu-phusu udi muwendesa gifua muana wendesa Yehu mujigulu wa* Nimishi, handaga udi muwendesa gifua muenya malui.” 21 Yolama wazuelele egi: “Ngulondelenu phusu-phusu!” Amulondele phusu-phusu yenji ya ita. Fumu Yolama wa gu Isalele nu Fumu Ahaziya wa gu Yuda anginyile muthu nu muthu ha phusu-phusu yenji ya ita, ayile mutagana nu Yehu. Ataganele n’enji mu gilanga gia Nabote muenya gu Yizelele.
22 Tangua Yolama wamonele Yehu, wamuhudile egi: “Yehu, udi muza mu guhuima?” Uvi Yehu wamuvutudile egi: “Luholo lutshi guhuima guajiya gukhala guene hadi gin’aye Yezabele mutshita uthambi nu ndaga jiavula jia wanga?” 23 Yolama wabalumuine mbala imoshi phusu-phusu yenji ha gulenga, wawambelele Ahaziya egi: “Ahaziya, atutela muheto!” 24 Yehu wazudile uta wenji wa manana, wasonuene Yolama hakatshi na katshi dia phanga. Mufula wene wamuzogele gu mutshima, Yolama wabuile mu phusu-phusu yenji ya ita. 25 Gungima Yehu wawambelele Bidekale, suta wakhalele gumukuatesa egi: “Muzule umubishile mu gilanga gia Nabote muenya gu Yizelele. Ujimbilago ndaga yazuelele Yehowa mukunda nu sh’enji Ahaba tangua aye nu ame tuakhalele muwendesa tubalu gungima dienji. 26 Yehowa wamuwambelele egi: ‘Hamene ngamonyi mahatshi a Nabote nu mahatshi a an’enji. Jiya egi mbangugutshita nji luholo lumoshi mu gilanga gigi. Ame Yehowa ngazuela.’ Henyaha muzule umubishile mu gilanga gifua muazuelele Yehowa.”
27 Tangua Fumu Ahaziya wa gu Yuda wamonele ndaga yabuile, walengele mu njila idi muya gu inzo ya gilanga. (Gungima Yehu wamulanduile, wazuelele egi: “Mushiyenu nji!” Hene amuwasele hakhalele muene mu phusu-phusu mukanduga ha guya gu Gule idi hehi nu Ibeleame. Uvi walanduile gulenga uu nu gu Megido, wafuidile guene. 28 Gungima enya mudimo enji amubatele mu phusu-phusu, ayile n’enji gu Yelusalema. Amufundjile mu malumba enji hamoshi nu akhakh’enji mu Dimbo dia Davidi. 29 Ahaziya wabuile fumu gu Yuda mu givo gia 11 gia uhinyinyi wa Yolama mun’a Ahaba.)
30 Tangua diahetele Yehu gu Yizelele, Yezabele wavuile. Wadisembegele nu mukubu wabuita gu meso, walondele sanga dienji. Wayile mutala ha fenetre. 31 Tangua Yehu wahetele ha mufulo, Yezabele wamuhudile egi: “Ndaga jiabalegele muabonga mukunda nu Zimiri munu washiyile fumi’enji ba?” 32 Yehu watalele gosa gu fenetre, wazuelele egi: “Nanyi udi gu khanda yami? Nanyi?” Athu muyadi nga mutatu akhalele mutshita mudimo mu inzo ya fumu atalele mbala imoshi hashi gudi muene. 33 Yehu wazuelele egi: “Mubishilenu hashi!” Hene abishidile Yezabele hashi. Ndambo ya mahatshi enji yasaphugile gu gibayi nu holu dia tubalu. Gungima Yehu wamudiatele nu tubalu tuenji. 34 Yehu wanginyile, wadile, wanuile. Gungima wazuelele egi: “Zulenu mukhetu yowu watewe mukumbu mumufunde, handaga udi mun’a fumu.” 35 Uvi tangua ayile gumuzula ha gumufunda, asangele phamba gibozo-bozo gia muto wenji nu ikanzo yenji nu ikata ya mago enji. 36 Athu ene avutugile, awambelele Yehu ndaga yene. Muene wazuelele egi: “Ndaga eyi yataganesa mbimbi Yehowa wazuelele mu njila ya muenya mudimo wenji Eliya muenya gu Tishebe egi: ‘Jimbua mbajidia Yezabele mu gilanga gia gu Yizelele. 37 Kimbi* gia Yezabele mbagikhala mu gilanga gia gu Yizelele gifua tuji tua shitu tudi tuagumuanga mu mahia; hagula athu azuedigo egi: “Yowu Yezabele.”’”